中五既第二個上學日，依然都係無無聊聊咁過。進行左中五第一次掉位，係女多男少既情況之下，我被迫同女仔坐，好無奈。然後又選埋果d乜鬼班會、科長等等諸如此類既物體。我地學校有個崗位叫閱讀大使，可惜我地班冇人肯自薦做呢個崗位，因此就去到提名階段，一個叫做monkey既同學，無啦啦提名我，又有人和議，於是我就成為四個候選人其中之一。開頭我好樂觀，諗住實冇乜人投我票，應該唔洗做。點知，到左投票果時，驟眼望落去都有好多人投我票，結果係成班36個人當中，有31個人投左我票，真係救命，想唔做都唔得！

今日又冇出街咯，因為又係出返阿婆度，出唔出都罷，咁梗係費事比錢九巴賺啦！據聞我阿婆果度已經完成左99%，聽日釘埋個廚櫃就大功告成。裝修完之後，就只係剩返執屋，下星期就可以去參觀一下，見証一間舊屋於裝修前後的變化。

今晚同埋阿公阿婆去左九龍城食野，係食潮州菜。食完之後就去左行街，行行下果時忽然興起，想由九龍城南角道行去九龍城碼頭，然後係果度坐75X返屋企。於是就沿住舊機場果度行，都行左差唔多30分鐘。行行下果時諗到，如果有人黎香港旅行，想由九龍城廣場行去九龍城碼頭，行到去碼頭果時會唔會爆晒粗呢？因為一個九龍城碼頭同一個九龍城城區可以差咁遠，而且所謂既「九龍城碼頭」其實係座落於土瓜灣區。

唔想咁快到既9月1號今日終於到左，朝早7點鐘就起左身，都好耐未試過咁早起身咯。8點鐘出門口，返到學校大概係8點15分啦。即卡去睇個編班結果，5A得36人，因為4A有四條友要留班，而今年多左兩個重讀中五既人，兩個都係女仔。搞到我地班有20女16男，舊年就一半一半咁啦。上左中五，課室座椅都有所不同，已經唔係由小一坐到中四果款木椅，而係藍色的高背座椅，真係幾舒服。

一年一度，最漫長的，最令人振奮的暑假今日正式終結喇！今年暑期由7月12號起放到今日，歷時51日，即係1,224小時。呢個暑假既完結，亦代表我果張暑假時間表正式功成身退。不過，我跟足時間表做野既百分率真係唔知有冇10%囉！

係暑假既最後一日，我出左去威爾斯接我舅父出院，亦都見到政府醫院安排混亂既一面。陪舅父拎藥果時，指示牌係極不清晰，搞到我地兜左好幾個圈，先知原來要過馬路去另一座大樓果度攞既。明明幾分鐘可以完成既事，差唔多搞左20分鐘。最谷氣就係排隊等拎藥要等成200個人，於是老豆就叫我同舅父返樂民邨先。

回想起呢個暑假，真係過得幾開心，有幾件事真係好難忘。包括：7月20號去左書展；8月8日download到FS黎玩；8月11號去左石澳游水；8月18號同同學出街。而係今年暑假期間，一共打左四次羽毛球，分別係7月20號、8月3號、8月16號同埋今日；又補左九次課，分別係7月12日補會計、7月28日、7月31日、8月4日補英文、8月7日同8月14日補中文、8月11日、8月18日同8月25日又補會計。

好記得啱啱放暑假既頭一星期，成日覺得51日有排先過，冇咁快到8月31號既。估唔到呢51日咁快就過左，而今年暑假係未去過內地/外地旅行既，即係未出過香港特別行政區既邊界。係舊年既暑假，就去左海南島，返黎果時坐中富航空，坐左隻總載客量得50人既機仔，型號係CRJ-200。其實果次原本坐南方航空既，但佢話冇晒位(果架係波音757-200黎架)，所以就要我地轉乘另一班航機，仲送左個午飯比我地食添。

希望中五好好地讀書啦，要應付會考呀，好想有14分以上，可以原校升讀。其實我既目標分數係16-17分，希望係會計同經濟都有C或以上，中英數就D左右啦，中史同地理就希望有E啦。就咁計，都啱啱好有14分既。

好喇，唔講咁多喇，要趁住暑假最後個幾鐘玩下FS先！到正式開學之後，打機既時間可謂少之有少喇！

呢篇日記都打左好多隻字，總共有八百四十一個字！都好耐未試過，可能係從來未試過打咁長既長篇日記喇。

我既回鄉証將會於2006年12月中到期，今日去左申請換領。雖然係早左d，但去到12月先換可能會好多人，反觀今日就唔係好多人，起碼唔洗排隊等交表。不過，填表果時好煩，足足填左10分鐘，然之後又話要影印身份証同現有既回鄉証，又比左兩蚊人地賺。換一張咁既証件，要奉獻港幣240元正比香港中國旅行社，我老豆話佢呃錢，因為佢話以前好平既，依家就因為普羅大眾窌成日要換，所以不斷加價。

「出阿婆到」呢個活動係呢星期不斷進行，今日亦都唔例外。下午2點就同阿媽去養和覆診，佢冇事，一年後再做定期檢查。於是就坐叮叮去維園轉116返我阿婆到，係上車果時，我細舅父打比我阿媽，話佢自己入左醫院，叫我地唔好同阿公阿婆講，免得佢地兩個老人家咁擔心。最後，我同我老豆就走先，去威爾斯探舅父，佢傷左隻手指，中指有骨折，要做手術。原因係咁既，佢係做物流業既，負責揸車。當佢開工果時，隻手放左係車門，準備開匙同開冷氣，點知另一架車就趕住出車，佢個車尾一擺，就撞到我舅父架車個門，一夾就夾親我舅父隻手。好彩就有人車我舅父去醫院，唔洗坐白車，如果唔係，果條友就等坐監！

今晚去左大埔中心間M記食野，因為有好幾張優惠劵。買左一個$22.3既脆香雞翼餐，送一個開心樂園餐；仲有兩張$10既禮劵，所以只係用左$2.3就可以食到兩個餐。M記今晚好冷清，冷清到開得果兩部收銀機都可以唔洗排隊就買到野食。不過，幫我賣野果條友，好似死唔斷氣咁，講野冇離神氣，又唔耐煩，態度又惡劣，勁想port佢！

今日去我阿姨屋企食晚飯，咁我阿媽無啦啦講話佢用梗既果部Samsung Anycall手機唔好，於是我阿姨就換左部700i比佢。Samsung果部野就轉左比我用，係我既第三部手機，亦都係第三手既手機，因為呢部野最初係我老豆既，然後比左我阿媽，最後就比埋我。而我之前用開果部，就可能會比我阿婆用。

今晚去左阿婆果度痴餐食，其實係幫佢手執屋，係8：30左右就預備坐巴士返屋企。正當我地行去巴士站果時，我姨丈打黎，話佢啱啱收工，依家揸梗架車，話接埋我地返去。於是我地就同埋兩個舅父一齊走喇。首先係車左我個舅父去黃埔先，係果度食左個什果涼粉，不過唔係咁好食。然後就車埋我另一個舅父返美孚喇，車程只不過係10分鐘左右。最後，就沿大埔道及吐露港公路車埋我地返屋企，都係廿分鐘既事，咁就完結左一晚喇。