自從派比安吹襲香港後，香港近幾天一直受到它的外圍雨帶影響，終日陰氣沉沉。今日，可謂雨過天青，雖然都唔係話好好天，太陽都仲未露面，但至少冇狂風大雨，落既都只係微候細雨。至少，今日我出街都未比雨淋濕過呢。

今晚補完習都7點30分咯，因此送左我補習老師出門口就開飯喇。呢個時候，有線電視娛樂台正在播映我娘親的喜愛節目---《小姐愛無賴》，所以佢一早就坐在係梳化睇電視。終於都舀好飯了，我就索性拎埋碗飯，裝埋餸，然後拎去梳化比我阿媽。然後佢就好無奈咁講：「唉...只有家長縱壞細路之嘛，邊有細路縱壞家長架？！」

受派比安影響，今日香港天氣大致有雨，間中吹烈風咎度的風。本公子今朝一早就去左富亨打羽毛球，係屋企行去果時，d強風吹到把遮都反埋，換句話說，有冇遮都係一樣。下午時份就留係屋企睇書，出面既雨勢時大時細。到了晚上時份，因為得知在強風影響下，青嶼幹線實施左交通管制措施，所有車輛須改行下層管道。所以就同老豆坐E41兜風，我未試過行青嶼幹線既橋底，所以都覺得幾特別，仲拍底左幾段片添，請觀看。

片段一：http://www.youtube.com/watch?v=HTM0I-mt5Ak

片段二：http://www.youtube.com/watch?v=afswxIBVZI4

片段三：http://www.youtube.com/watch?v=EJmPh3BRL-w

片段四：http://www.youtube.com/watch?v=EYxE_ZbRFb4

嘟，現在係晚上10時35分，由TriCat報告天氣情況：香港天氣天致有雨，吹強風。請注意，天文台現己發出三號強風訊號，颱風派比安現正集結於香港之西南備南約340公里，預料向西北偏西移動，吹向廣東西部及海南一帶。另外，由於受颱風影響，富裕小輪宣佈：來往屯門至大澳的渡輪服務暫停，直至另行通知。澳門的氣象局經已改發三號強風訊號，來往香港及澳門之間的直昇機服務亦已停航，海上交通則維持不變。天文台預料，改發更高風球機會不大。今次風暴消息報告完畢。下次天氣報告時間為200X年X月X日，請留意收看。

今日阿媽染髮，染完之後發覺冇晒洗頭水，於是就叫我落去買。買之前已經睇清楚舊樽上面寫左乜野，記熟晒，就胸有成竹咁落街買喇。咁買左上黎之後，第一個用呢支野既就係我。當我將呢個「洗髮水」塗在手上時，發覺佢好「傑」，再睇一次，先知我買錯左護髮素。真係好煩，兩樽野整到99%似，唔加倍小心睇就跌左落陷阱。

唉，唔經唔覺，暑假又過左大半個月咯，得返最後一個月既假期。呢一個月，暫定有8日要返學補課，返學既日子都比理科班學生少好多好多。人地星期一至五日日都要返，我地格格埋埋都係得果8日。希望最後呢31日可以開開心心咁過埋去啦，都知道下個月既呢一日已經問開始受苦架喇。

啱啱係無線播左兩集既配音日劇《女王的教室》，係呢兩星期都成為全港熱話。今日報紙話有人投訴呢套野係侮辱老師同違返教育規則云云，又話會引起學生對模園更反感，更加有家長禁止學生收睇呢套野。無可否認，呢套野係令人反感d，但係都好值得我地去反思。係第一集果時，個女王話：「富人就可擁有特權，窮人就要受到鄙視！」，呢句野就正正要我地努力d，去追尋更好既生活。講返轉頭，我覺得家長係唔應該禁止小朋友收看既，因為你愈禁，小朋友就會更好奇，更加會諗埋一邊，對佢影影響仲大。反而家長係旁邊指導，對佢地心理上既影響應該可以減低。

都好耐冇同阿公阿婆佢地飲茶咯，今朝比電話聲嘈醒左，原來係我阿公打黎。佢就叫我地今日去黃埔博藝會飲茶，時間係1130。咁我地就1030出門口，行路去火車站，坐火車再轉綠van去目的地，時間係1小時。食到1點幾先走。由於通知得太急，加上有人去左旅行，所以冇幾多人去，得10個人。下個禮拜又飲茶，就會多人去，起碼20人，應該要分兩圍台。

今日morning call時間為上午5時50分，因為我老豆應承左九巴之友去幫手賣旗，早上7時30分就要去到美孚。我地坐6時30分開出既73X，係吐露港公路近鹿茵山莊果邊個天突然之間黑晒，唔洗三秒就落大雨。我地係7：20就去到集合地點，影左幾張大合照，做左一個briefing，8：00左右就坐免費巴士去欽洲街果頭開始「搵錢」。係呢個活動中，見到人生百態，有人離遠見到你就掉頭走，有人離遠見到你就拎定錢；有人係度扮拎錢，其實就係玩梗你，有人特登走埋黎袋錢入你袋；有人發覺身上冇硬幣就唔買，有人諗到唔洗諗就一張20蚊紙塞落黎。賣賣下果陣，果天又突然黑晒，又係唔洗三秒就倒狗屎。值得一提既係，係賣旗時間內，有一個哥哥仔，佢係新界果邊啱啱買左旗，黎到我地呢度發覺機構唔同，又再買過。仲教埋我應該去黃金果頭賣，因為果邊會多人d，但最終因天雨同既時間既關係而冇去到。咁我係11點幾就跟專車返去美孚既匯豐銀行交旗袋，然後就頒左張證書比我老豆，上面寫佢「表現熱心」，真係有點兒諷刺。旗袋入面99%既錢都係我搵返黎，而我老豆佢只係行行企企，都冇乜幫手搵錢，只係係我去食早餐果20分鐘先賣左四枝旗。到左傍晚5點幾，當時我正準備係油麻地坐車返大埔時，個天又無啦啦黑晒，然後又落暴雨。

今日我係滂沱大雨下係屋企補習，做中五既數，係果d甚麼等差數列同等比數列之類既垃圾。之前做過一d短題目，都覺得幾易。點知補習老師今日要我做一d長題目，呢類題目只可用兩個字黎形容佢：「好煩！」。開頭果幾題仲未能夠玩殘我，我既戰鬥力未有減退。最尾果題先得人驚，呢條問題簡直深過深圳，仲要難過會考程度。做到我得返半條命都冇，能量值由100迅速下降至20。好彩補完之後即卡要飯食，先至可以吊住條命仔。

今日冇出街呀，成日都係屋企入面，未除過睡衣(除左沖涼果時除過之外)。原來唔出街係好悶架，比個時間表捆死左，冇得開電腦。不過就算開到都冇乜好玩，想裝返winning又裝唔到，所以開唔開都一樣。好彩今日唔係好熱咋，可以唔洗開冷氣，如果唔係？哈哈，中電賺大錢喇！唔記得今日係咪暑假之中第一日冇出過街，放左兩個禮拜有多既假，終於感受到暑假帶結人沉悶既一面。