一星期一度既星期五又黎喇，又可以返神經喇！咁我做完地理小測後就去喇。落到去見到亞徐、L萍同金仔喎，個個都揹晒書包，好似想走咁。原來係冇人返，所以亞徐就同我地去食下午茶。去左富善既大家樂食，我食左雞翼紅腸瀨粉，係$16，亞徐津貼左$10，實質我只係比左6蚊雞，依家好飽，飽到晚飯都唔想食。

**牛肉，你係敬拜隊既，有冇試過發生d咁既事呢？**

今日補習呀，之前一個月不停做數，做數，做足1小時45分！(另外15分鐘休息，總共補習2小時)好辛苦，依家仲要好學唔學就學我至憎既圓，係呢課入面，我得到一條公式：

課題抽象+變化萬千+極度艱難=呢課好煩！

呢個星期阿sir不斷比工作紙我地做，堂堂都係咁：佢講10~15分鐘，我地做25~30分鐘，唔熟都操到你熟。咁今日補習老師一黎，就話教英文先，因為成個月冇教過，咁要我做Listening and Integrated Skills(Paper 2)入面既Writing喎,因為6月中就期考喇，仲叫我聽日返學要借pastpaper，話星期六要我做。之前都做過maths，eng同econ既pastpaper，話易就當然唔易，但話難又唔係好難，不過係煩(尤其是maths同econn既mc)。

自從演完話劇之後，今日係第一次返神經劇。原本諗住今日可以睇返套劇，但亞徐話等禮拜五先睇。冇得睇戲，咁今日有乜做呢？就係講返係神經劇入面既得著、經歷等，又要我地寫比一些「神經後輩」的人，分享入左神經後必須付出既代價，好多人都有同一個answer，就係好辛苦，唔想咁辛苦既就等亞徐走左先好入，哈哈！咁分享完就玩UNO，玩一個叫「心臟病」既game，咁就一人抽一張牌，如果張牌同人地相同既就鬥快叫對方個名，叫得最慢果個就要拎晒勝方所有既牌，到最後擁有最多牌既人就為止輸。咁玩左兩round啦，大輸家係亞徐同金仔，哈哈！

今日好多功課喎，不過都係自已攞黎衰，老師放假前已比左我地做，deadline係4月26日，我就唔到4月25日都唔做。結果咪搞到好似今日咁囉，三樣功課迫埋一齊做，最抵死既係三份之中，有兩份唔係易做既野，分別係account同埋中史，不過中史勝在可以老吹，所以好快就做完，依家係差account既第20.12x果題既profit and loss account同balance sheet既一些問題未搞掂。

今日0時26分，我望到窗外有d閃光，閃左兩次，以為自已眼花睇錯野，後來先get到係閃電。咁即卡開收音機聽，原來真係出左雷暴警告，有效時間至2時15分。如無記錯，呢個好似係今年第一個雷暴警告，係0時58分，我聽到今年既第一個雷聲。7點鐘起身睇新聞，原來出左黃色暴雨警告，不過都係要返學。點知新聞話天文台係凌晨掛過晒黃雨，紅雨同黑雨，黑雨仲要係4時30分先落，我一睇到即卡話：「有冇搞錯呀，掛黑雨又唔掛耐d，掛耐一粒鐘都唔洗返學啦！」返到學校，個個都講呢件事，有人仲爆晒粗添。之前好似未試過第一次掛暴雨警告就乜都出齊晒...

今晚食食下飯，7：40時聽到一下剎車聲，然後就「砰」一聲，oh...恭喜發財！炒車呀！！！事件牽涉兩架的士及一架客貨車，懷疑係架的士突然剎車，尾隨兩架車收掣不及，咪撞左囉。8點鐘警察就到場調查意外原因，其中一架警車死左火，四架車於9點幾被拖走。我影左幾張相，仲報埋上報紙添。

今日去完油麻地果頭就係青年會坐271返屋企，咁下晝6點鐘就梗係好多人坐啦。上左車，架車85%滿，基本上所有人已經企左係度，好難得先比我係樓下車尾搵到一千零一個既座位，咁好開心咁坐落去，點知...

當我安坐啱啱五分鐘，

五分鐘後架車停係度，

停係度師傅話壞左車，

壞左車既話就落左車，

落左車就等左兩班車，

兩班車都一樣好多人，

好多人就當然冇位坐，

冇位坐就企到返大埔。

無啦啦作左首咁既「九言詩」，為一件小事作左首詩，真吹漲 ！係咪想知架車乜事呢？話說去到京華國際酒店時，架車停左係度，原來係樓上玻璃窗既膠邊甩左，咁成車人都落左車，分別乘另外兩班271繼續旅程，我就由京華企到廣福道先搵到位坐。-.-

之前試過一次，去完迪欣湖後坐E41返去，係青馬收費廣場企到返廣福。

以前都無試過壞車，就係舊年6月第一次遇上壞車後，呢排就好多時都遇上壞車，有兩次直情要係吐露港公路落車添。^v^

假期真係過得快，話咁快我地已放左9日假喇，仲有兩日就要重回校園喇。今日先發力做功課，做左econ同maths，英文果d諗住聽日先算。算好架喇，以前好多時唔到最尾果日都唔做，冇計啦，今次好多功課，又要寫好多字，唔早d做都唔得。唔知點解，放假永遠都係過得好快既，一返學既時間就好似停留左咁，好耐都未到落堂時間。依家上左中學叫做好好多架喇，曾幾何時係小學果時真係好辛苦，老師講書又悶喎，最抵死就係你郁一郁個身都會比人鬧，要你成碌木咁坐足半日，真係好難頂。依家起碼可以同隔離既同學傾下計，郁下個身做下伸展運動都得，總之唔太過份既，d老師都唔會點理你。

今日去拜山喎，首先去九龍城拜左我阿麻先，然後入屯門拜我爺爺，我未出世佢已經過左身，所以我對佢係完全沒有印象既。拜完阿爺就坐輕鐵去元朗，咁我坐610號路線，約於下午1時50分到塘坊村站。當列車關門時，車門撞到一名年約6歲男童的左邊頭部，由於該名小童沒有哭，只是摸著被撞及的位置，因此小弟估計其傷勢並不算嚴重。這是我第一次親眼看見列車車門如何撞到乘客，幸好今次並沒有釀成大意外，我覺得輕鐵應延長關門時間，讓乘客有足夠時間下車，以及調慢列車關門的速度。

今日9：30就出左去同阿婆阿公飲茶，順便拎d手信比佢地，佢地見到都會心微笑，好開心。仲記得係北京果時，d老師問我地做乜買咁多野，話係深圳都買到，跟住我同佢講：「係度買返去可以同屋企人講話呢d野係係首都買既，坐過飛機架，好巴閉架！」跟住老師就報以無奈的微笑。