咁就考完一個禮拜試喇，今晚唔少得既梗係睇返場波啦！今晚最精彩既莫過於阿根廷對塞黑，未開波都預左阿根廷必勝，未料到上半場開波5分鐘就入左一球，31分又入第二個，係41分果時仲入多一球，上半場已經去到3：0。下半場就去到77分鐘先有波入，7分鐘之後再入多球，已經去到5：0，破左今屆世界盃既最高紀錄，冇諗到3分鐘之後再入多球，去到6：0，睇到O晒咀！！

今日已經進入考試既第四日，就考我最冇信心既數學。份長題目，一個字------難！預左肥，考完長題目就考mc喇，份卷比長題目易，希望有機會利用mv拉返合格啦。份長題目考兩個鐘，mc考粒半鐘，開頭以為好難捱，好彩唔係嗜。聽日考中史同SBA，中史考到10：00就放咯，SBA就13：10先考，唔知SBA會點死，我個組全部都係勁人。

今日踩單車返學喎，唔知做乜事，架車開到超快。行平路果時時速座底20公里，上斜都過10公里，爽爆！我諗今日應該係遇正順風之中既順風，所以先咁快，就好似坐飛機咁，好彩冇炒車嗜。如果唔係就唔洗考試咯...

曾幾何時，我自已一個出去踩車，係屋企出左冇幾耐，轉左個彎就問始加速，係呢個時候，有個小朋友係我對面迎面而來，一時間唔知點算好，因為如果我左避既話就會跌落坑渠，右避既話就會對「冚」。於是我就唔理，開始剎車，點知都係剎唔切，同個靚仔擦過。佢好彩，佢冇事，我就成個空中飛人咁仆左係地上，隻手損晒，重要部位又痛到飛起。都算啦，最頂唔順既就係汁邊果兩個維園阿伯係到嘈三晒，又對住我指指點點，勁想打鑊甘佢。又唔知乜事，又要嘈嘈嘈！

咁今日一早返到屋企就溫書啦，聽日考英文呀！溫完書之後就玩左陣電腦，9點鐘就睇波喇。之前都睇過好幾場，最好睇既都係尋日澳洲對日本，臨尾果10分鐘比人狂入。依家就睇南韓對多哥，估唔到先開記錄既係多哥囉...

今日係final exam既大日子，第一日就係考中文文卷二同music。開頭以為中文卷二係閱讀理解，點知係作文。咁10 ：40就考music啦，第一部份唔洗講都知係聆聽，我已經知道有幾題做錯左，不過今次座底有10分，因為個工尺譜超易，所以呢10分係送既，我諗music今次合格既機會都幾大，加埋平時分大約有60至70分吧！聽日就考中文卷五同PE，中文卷五就係綜合能力，一次過考晒「聽」、「讀」同「寫」。今次係第一次係hall考，個感覺好high，成班人一齊考，見到有人好快訓教，有人就未到最後一分鐘都唔放棄。

聽日就考試咯，今朝出左黃埔飲茶，飲完就行去九龍城碼頭坐巴士返屋企。返到去就溫書啦，溫左呢個music，先發現有好多notes都未抄，問親d同學都話冇抄到，都唔知點算好。講返尋晚睇果套《海神號遇險記》先，呢套野最主要係講乘客如何逃生，在逃生時遇上的困難和考驗，並唔係好似《鐵達尼號》咁，講隻船如何撞上冰山。海神號最後只是六個人獲救，其餘人士唔係比水浸死就係比火燒死...死亡人數比鐵達尼號更慘重。

朝早睇報紙知明珠台今晚會做《海神號遇險記》，我一直都想睇呢套野！所以準時係9：30睇完《百法百眾》後就轉去明珠台喇。套野都幾好睇，係講海神號最後一程果時遇上海底地震，成隻船被一個巨浪吹翻，好多人死左。有d係船艙入面既人就保住條命，但佢地就要搵路走。有人提議利用聖誕樹爬上閣樓，走到廚房，然後就可通往船底；但船上職員就叫乘客留在原地，要走既都走左。結果一個浪衝左入船艙，留在原地既乘客就咁冇左條命。不過有命既都唔好受，佢地要經過高溫的廚房才可逃生，途中見到一具具慘不忍睹的屍體。套野到依家都仲有個幾鐘先做完...唔知班人可唔可以逃出生天呢？睇完呢套都應該唔洗睇戲院做梗果套咯，因為睇報紙知到新果套只係加左d特技，內容都大致相同。

今日出門口返學果時已經開始閃電行雷，不過就冇雨落。上地理果時望到鳳園果邊個天超黑，冇幾耐之後就開始落大雨，雷電交加！d雷聲仲好響添，望出去個天係超黑囉，過左中史堂就開始光返。小息果時收到風話又出紅雨，不過預左唔洗放，因為上星期五都係咁。到上英文堂，已經出到黑雨，maths果時見到校工拎個黑膠袋上黎，好野，又冇得出去食飯咯！宣佈都係叫我地去小食部買飯食，冇得走既原因係要跟Education and Manpower Bureau(EMB)既指引：「係安全既情況下方可讓學生回家。」一星期聽左呢個無聊既reason兩次，好悶。值得一提既係，上星期五出紅雨知道冇得走果時係數學堂，今日出黑雨知道冇得走既都係數學堂，呢d係咪叫巧合呢？全校既學生好似坐監咁，困晒係學校，門口都唔比出。食飯果時又講econ，都係講呢個叫「超額需求」既物體。去到放學就考呢個oral，希望合格啦。中四既最後一個上課天就係暴雨之下完結，估唔到咁快就一年咯。

今晚10時03分，嘉豪無啦啦係msn add我，原來係要我幫佢print野。就係佢地班既班際歌唱比賽既歌譜，咁我應承左佢。咁print左出黎先發覺效果未如理想，用晒成張A4黎print...d字又朦...不過嘉豪話算，咁就照print，聽朝就交功課比佢。

眨下眼又一年咯，下個禮拜就大考喇。理應呢個禮拜應該冇乜功課，比我地溫書架嘛。點知今日勁多功課喎，包括宗教同英文。宗教就好易姐，因為可以老吹。但英文就真係一路做一路爆粗，因為要騰文呀，仲要唔係騰一篇喎，係騰三篇喎！最抵死既就係要聽日交，又唔早幾日比我地做喎，到今日先一次過比晒我地做。仲要得果得一日限期，真係當我地係人肉影印機咩...？