原本諗住珍珠都會幾正面咁吹襲香港啦，點知佢尋晚得閒冇野做，同我轉左去東面，吹左去福建果頭。之前仲話佢有機會係深圳登陸，諗住佢冇十號風球都掛個八仔丫，聽日就唔洗返學。點知一切希望都隨住佢吹去東面而幻滅，依家博下佢聽日落大雨就唔洗上PE，都唔奢望佢有紅雨同黑雨喇。

今明兩日學校都會有個全心傳情既活動啦，就係寫返d野比你所敬愛既人喎。當然唔少得老師啦，咁我地就預備左一張張既心意卡，寫左好多野比任教我地既老師，然後插入學校提供既風車入面，就送比老師喇。聽日就有個向班主任致敬既環節，咁我就比人捉左去做一個送禮物既角色，程序係咁既：首先上面會有條友吊條魚絲落黎，我就去接住，然後交比班主任，就等佢自已慢慢咁拉份禮物落黎，不過硬係覺得聽日會好瘀。

今日班中發生一件事，為免令當時人傷心，所以該日誌會受密碼保護。如想要日誌密碼，自已慢慢試，我會把密碼告訴全球其中一人，哈哈哈！

今日掉左位喎，同牛肉坐。唉...預期未來一個月我會好悶，因為佢講明上堂唔講野。同牛肉傾計，係icq都幾好傾，不過佢唔係成日online...佢話佢上堂認真，所以唔會同人講野。同佢坐既話根本同自已一個坐冇乜分別，學校將會有一隻身處孤島的田雞。-.-

今朝9點幾就拎左d報紙去賣啦，搵左$19呀，正！然後就出左去飲茶喇，去新港中心既稻香超級漁港喎。不過我因為要打波啦，11：50又要坐車返去咯。返到大埔先係12：40，仲有20分鐘先開波，所以就去左富亨街市行左一陣，係咪好無聊呢？

唔知個珍珠幾時吹到黎呢？上返天文台個網睇睇，個風都應該吹得幾正，可能會掛8號波。不過佢同我醒醒定定，係掛8號既話就星期四先掛，因為唔想上PE，而且放埋星期四既話就會連放四日假。最多咪豪兩堂account比佢，哈哈！[發夢中...]

今日要補習咯，上次黎都唔黎，今日同我早26分鐘到，頂佢唔順！咁今日又要做數喇，做果d乜鬼「圓的演繹幾何」，呢課"既"野學黎都唔知有乜用，第時出到去返工都唔洗用架啦！你話學呢課係咪多舊魚丫？！今日個補習老師都懵下懵下咁，原來佢尋晚訓都冇訓過，於是佢索性係我做梗野果陣訓。補完習喇，佢就返上水啦，佢話驚坐車坐過龍，我同佢講：「你因住坐火車坐左去羅湖比人罰錢呀！洗唔洗借個夾比你夾住隻眼呀？！」

話說今日要返團契喇，咁我同金仔都剩下想返神經喎，唔想唱歌，於是去左Tuck Shop食野飲野喇。平時都係咁去啦，今日有乜咁特別要打上黎呢？留心聽故仔喇，當我地飲飲下野果時，有班中三既人係果度踢波喎，踢到砰砰聲，差d踢爛d風扇喎，咁金仔就以領袖生既身份去勸佢地啦，佢地就當耳邊風，一於照踢唔理。於是金仔忍無可忍喇，就叫我上去搵訓導，咪上囉。阿sir一出黎果時搭住我博頭問我有冇比波「耍」中，然後見到班友就好大聲咁渴佢地，未試過一分鐘見到阿sir兩個咁極端既面目，爽爆！！咁之後就返神經喇，先至驚驚地人身安全，因為果班友唔係善類，有個仲坐過監添，好驚佢地會搵我報仇....

原本今日要補習架，咁我就冇去補account喇(雖然我唔係被迫要補-.-)。返到屋企係4：00，咁就做下數啦，睇下有乜唔明，等補習老黎教下。做下做下做到唔想做，咁轉行做account喇。一開波果時個Gross profit計極都唔啱，原來留左個Carriage inwards。呢題勁陰人囉，個Trial Balance剩下比左Carriage個數我地，然後係下面寫一句話其中$2,211係Carriage inwards，跟住又要我地自已計個Carriage outwards出黎，真係心水冇咁清都計唔到。咁做account差唔多做左成粒鐘，到左6點個補習老師都未黎，就打電話比佢問下做乜遲半粒鐘啦，點知佢話佢要考試，電話冇電，所以打唔到黎！！！！唉....即卡冇野好講囉！！！！！

今日返神經啦，亞徐原本諗住去106既，但係有人，最後就去左601喇。咁今日就唔係傾劇喎，係寫心意卡喎，因為我地既成員陳欣自從4月26號入左醫院之後都未出得返黎，於是亞徐就叫我地設計一張心意卡啦，寫d祝福字句比佢。

咁之前都講過ada日日都會抽人出去講野啦，唔知我抽中邊條下下籤，尋日就抽中左我喇。尋晚都冇諗到有乜好講啦(其實係自已冇心機諗)，今日出到去成碌木咁企左係度，諗極都諗唔到有乜好講，於是就好無奈咁講左三句就走人。點知返到個位坐左一陣就諗到可以講神經既野，天呀！！！點解我成日都係事後先諗到點講野架？？？到中文堂喇，又要小組討論喎，咁預左自已表現好差架喇，結果不出意料之內，10分滿分我得4分，如果唔係梁xx迫我發言既話，我得2分咋.......