今日返學就對卷，成績都係馬馬地。下午仲要返去聽個乜鬼講座，講果d性既野，咁就浪費左一個半鐘。聽日就最後一日對卷，中文閱讀理解成級都好差，班班都唔夠1%既人合格，阿sir話我地班都唔好得去邊。哈哈，又多科唔合格喇，萬歲！-.-

今日好熱呀，咁今日都去左行萬宜水庫。行左兩步都出晒汗，仲要上山，都幾辛苦！不過上到萬宜水庫，d水好藍，就好似係游泳池既水咁藍，咁影左幾張相，格格埋埋都行左兩個鐘。最後就去左西貢食飯，再係滿記食左個雜果涼粉。

尋晚咪講過我想通頂既，結果尋晚睇完西班牙對沙特亞拉伯之後就較鬧鐘，較左2：40起身，仲特登轉去有線61台。到左2：40胄鐘響，唔想起身，結果就訓埋，冇睇到波。賽果在我之內，瑞士入左十六強。

*呢排成日咒巴西輸比加納。-.-

今晚場場波都好好睇喎，有西班牙對沙特，然後就瑞士對南韓，所以好想試下通頂睇波。之前都試過通頂，就係2004年奧運果時，果日就係睇閉幕典禮，由夜晚11點幾睇到第二朝5點，訓到10點幾就起左身。不過聽日要補習，所以睇完第一場波就可能會訓陣先。

一連九天的期考，今日10：15正式劃上句號。最後一日就考會計，總分86，第一題係manufactiring，好似唔係好識做，做到trading and profit and loss果時，見到個答案唔係net profit，而係net loss，以為自已錯左。見所剩時間唔多，就做左後面果d先。最終都係唔夠時間，好驚會肥，不過計一計過之後又有機會合格，當然希望唔好肥啦。

今日下晝，我落左去海港買個油雞燒肉飯食，一路食一路睇世界盃，正！夜晚，阿爸阿媽話唔想煮飯，又食海港既食盒，今次就食叉油雞飯，唔知係咪連續兩餐都食好多肉，今晚好似冇乜胃口咁，好唔想食！我寧願連續兩餐都食菜好過，我就係一隻咁既田雞，唔係話十分鍾意食肉(更唔鍾意食昆蟲！！)，反而鍾意食菜。

今日考中文卷一同英文listening，中文限時75分鐘，而英文就120分鐘。好不幸，中文就唔夠時間做，100分入面送返33分比呀sir，分分鐘唔合格。英文就啱啱相反，多時間得滯，做晒成份卷仲有差唔多成粒鐘剩，好悶，又唔走得。如果中文同英文既時限掉轉咪好囉。假如中文有兩個鐘既話，唔計錯既題目，我保證我送返0分比阿sir。

今日考這個地理同宗教，由於宗教唔係會考科目，所以之前都冇溫過。諗住試下交白卷啦，等阿sir改得舒服d(奸笑中...)。點知收到份卷果時見到係閱讀理解，然後就係填充題，抄返個答案落去就有分，咁就冇藉口交白卷啦，一定要做。臨尾果part有30分，係要寫首禱告詩，硬係覺得呢30分表面上易攞，但實際上就唔易攞，段估阿sir唔會咁好送30分比我地掛。之前有55分已經有八成係送架喎，另外15分有溫書都係送既。

唔知點解，今日好似唔係好想出街咁。朝早都冇同阿爸阿媽去昌運飲茶，自已一個留係屋企。下晝就好無奈咁同老豆出左去街市買野，然後就去bomb返部單車，因為部車條軚漏晒氣...之前部車踩左大半年都冇漏過氣，但係呢部車踩左唔夠兩星期就冇晒氣。

今日超熱呀，係屋企郁一郁都熱到成身汗。出街就更加唔洗講，行兩步都熱得要命，好彩坐巴士有冷氣姐。所以有時話世界上最偉大既發明唔係電燈而係冷氣呀，如果好似依家咁熱都冇冷氣既話真係「趁你病，攞你命」咯！原來今日有31.7度，破左2006年以來既最高溫度記錄。依家諗梗如果有一日，香港有個熱浪侵襲，氣溫會40度以上，會點呢？