今日係暑假以黎既第一個週日，根據本少爺既時間表，今天全日都係自由時間。於是朝早就去左飲茶，之後就拎報紙去賣，破左紀錄，搵到$21，yeah！然後就坐巴士去旺角買一些養魚既用品，再沿著太子道行去聖德肋撒醫院探我舅父。最後，就坐天星小輪過海，去中上環果邊行下。行完之後就坐天星返尖沙咀，正當我地等梗271既時候，見到有遊行，內容係反共產黨，這場遊行令廣東道交通擠塞得很！你話遊行果班人，如果佢地係大陸咁做會點呢？！

今日都冇乜特別既事發生過，所以諗唔倒有乜好打。話時話，我打日記都打左差唔多四個月，咁有乜得著呢？就係可以懷念一下過往發生既事，有喜又有悲。同時亦都係一個比我練打速成既地方，之前有好多字都唔係好識打，但自從打左日記後就識打。講真，小學果時都寫過日記，不過後尾就無心機寫，於是就有四年幾冇做過日記了。到左今年3月尾，終於申請到網上日記，也重新開始打日記既生活。冇錯，有時係冇乜野打，好唔想打，但諗下諗下又有野打喎，又可以乘機吹下水咁。

今朝起身，只係食左兩條香腸，就同老豆去左踩單車喇。今朝既天氣就幾好，冇猛烈既太陽，又有少少涼風。於是我地由大埔既大埔中心踩到去大圍既隆亨邨，去到就係7仔買左個甜筒食，一食果下透心涼，好正！食完之後就回程喇，係沙田至馬場果段路的確係以超高速航行，但去到馬料水就好似累喇！諗住返到屋企就即卡有飯食，可惜家人話到等下午茶時段去迎囍食，咁咪等下囉。一點半就同我老豆落去排隊等位，等到1：50先派籌，,仲要企係度等多一陣。我開始有d唔舒服，好想嘔，被迫要去休息一下，好彩好快有位，可以入去補充體力，如果唔係真係等白車黎。講開坐白車，我由中一開始，每日放學都會見到架編號係A299既白車經過，當時的確諗過，我第一次坐白車會唔會就係坐佢呢？結果好快揭曉，中一下學期我因事去那打素睇急症，可惜果時撞正沙士，醫院冇足夠人手，於是我就要去威爾斯留醫，咁就成為我咁大個仔第一次坐白車既經歷。等左十幾分鐘，架車終於到達急症室門口，我登車時亦不忘望一望個編號，竟然就係之前成日見倒既A299，都唔知話佢邪住我好定乜喇。果次真係幾爽，坐白車行高速公路，相信冇幾多人試過。

今朝起身，食過早餐，就落去泳池游水喇。成場兩個鐘都係得小貓三四隻，未試過咁少人去游水。始終都係鍾意係泳池溧水多d，因為果度比人既感覺係乾淨d。最重要既係...泳池既水好易見底，有人沉左落去都知，易d救人。係海果度，分分鐘變左浮屍。

一年一度，最漫長的，最令人振奮的暑假又黎喇！今年暑期由今日放到8月31號，不過有幾日都要返去補課，因為出年就中五喇！可惜，我屋企人要我整個時間表，係暑假既每一天都要依規矩行事。今日亦都係第一日跟呢張紙做野，我阿媽要我落去，係一個冇冷氣既地方溫書，好熱！係下面藕左三個鐘，熱到出汁！暑期每天的生活，就會係日記中一一記述。

都係果句：「時光飛逝，咁就一年喇！」，中四黎到今日就正式終結喇，最後一日唔少得既係派成績表。今次考得好差呀，好多科都得4字頭，好彩學校既升班標準係跟會考既標準，40分以下先要留班。咁我就好腐碌啦，科科過晒40分，連試升都唔洗(雖然我未試過要試升)。但今日都有d唔開心，除左成績未如理想外，今日都會講埋邊幾個要留班，班班都會有幾個，我地班都唔例外，有4個要留，連試升既機會都冇，當中有兩個係我既fd，所以覺得下年中五會有d悶，好彩最fd果幾個都升到班。

今日下午同我老豆去沙田買校服，原本我著開加細碼，諗住都係買返細碼。去到試衫果時，原來我要著中碼，果時好開心，因為我終於高左，仲有高咁多添，著衫都要著大幾個碼。然後就好心急咁趕返屋企，諗住睇《多啦A夢》，點知因為曾先生要開記者會，搞到我冇得睇。

今日我姨丈借左部車返黎，咁又車我地去遊車河喇。今次就去清水灣，係2006年第一次去游水。開頭都唔係好習慣，對腳有少少酸軟，但後尾都慣左，不過唔係游左好耐。其實我都唔係幾鍾意去海灘游水，因為d水好污糟，而且水底好多大大少少既石頭，好容易整傷對腳。

今晚食完飯，見無無聊聊，又唔想成晚都打機，於是就提議去海濱公園行下。咁7：45左右食完飯，打左陣機，睇陣電視，8：15就出發。今日好翳，一滴風都冇，比起星期四果日真係熱左好多！結果行左一小時又十五分鐘，9：30就返到屋企。係屋企發毛發左三個字，就沖涼，沖完涼就舒服好多(好似講梗廢話......)。

經過短短三日的綵排，套話劇今日就演出喇。咁今朝8：15就返左去準備，係正式出街之前再排多次。不過就冇神經劇果次咁精彩喇，一來又唔夠時間排，二來就自已都唔係好get到個角色應該點扮先最好，好彩唔洗出高form果場，如果唔係又瘀多次。高form果場繽紛show，最好睇都係果齣歌劇，真係好pro，最緊要係d女靚，唔知迷倒城中幾多男士呢？