今日開msn，玩果個來電震動，係度狂震人。後尾肥強send左個加速器比我，仲震得勁，基本上可以每秒都震人一次，超好玩！不過唔知聽日會唔會比人打，因為尋日我狂震劉子建，今朝比佢打左一鑊金；跟住今日我變本加厲，開埋加速器震佢，唔知聽日會唔會比佢打到得返半條命仔。
今日account要re-test呀，測返之前accrued同prepaid果堆野，因為我地呢份卷超差呀，成班都冇2%既人合格。點知阿sir玩野喎，果份re-test既卷超難，難到阿媽都唔認得。咁都算，最抵死既係我突然唔記得左profit and loss係點入，好想交白卷，不過唔夠薑。一路做一路講「食屎」，我諗呢份卷一定差過上次果份。
今日的起心剛，拎部車去單車行驗。原來部車患左大病，一整既話就要$200！咁老豆話索性買過部新車好過，單車行d人就幫我地將舊車既零件逐一拆下，換落部新車到，都換左半個鐘。不過部新車就唔係比我踩返學既，只係比我老豆踩，而我就會踩我老豆用開架車返學。部舊車係係我中一果時買入既，因為果時我話想踩單車返學嘛。點知我一直都冇踩返學，只係用作平時出街之用。直到舊年十月，我先至踩單車返學，大半年來的上課天差唔多日日都有踩。點知部車自從5月24日發生問題之後，就一直冇法子醫返佢。今日，佢係冇影遺照的情況之下就離開左我地咯。祝佢主懷安息啦...唔知以後有冇緣係世界某個角落見返佢呢？
今日約左9點半補習，之前已千叮萬囑我補習老師務必準時，佢叫我今朝8點打比佢叫佢起身。咁我都有打比佢，點知去左留言信箱，我都費事再打，當佢起左身。到左9點半喇，仲唔見人，於是打比佢，佢話仲要遲兩個字先到，有冇搞錯呀？我12點半要出去飲茶架！如果唔係都唔洗約到咁早啦！原來佢所謂既「兩個字」，係我地正常人黎講既半個鐘！佢到10點先到，唯有補一個半鐘啦，補到11：30就算。
今日係我家姐生日呀，所以先出去飲茶。不過佢由於工作關係，都去唔到，係度同佢講生日快樂先。
今朝起身果時見到佢落大雨，仲要行埋雷添，不過乜暴雨警告都冇，都係要照常上課。返到學校都冇乜野發生，直至上econ堂，個天開始黑，跟住就落大雨，行雷閃電，又要一至兩個響既雷...次次都係上econ就有響雷，d雷係咪對econ有興趣呢？小息落去訂飯，都仲係好大雨。肥強問我有冇機會紅雨，佢自已都唔奢望有...諗都諗唔到果時已經係10：50，5分鐘之後就會出紅雨。我地都係係12點幾先知出左紅雨，一心以為唔洗返，可以提早放。點知，宣佈話跟教統局既指引，全日制既學校係唔可以走，直至放學。成班都唔鋸，因為其他中學都有得放，係我地冇得放兼冇得外出午膳！搞到小食部鬼打咁多人，又係講econ既時候，當需求大於供給時，就會出現超額需求...放學，就係今年最後一次團契，咁就一年喇。都唔知今年會唔會係最後一次係靈風參加最後一次團契，因為下年會考，唔夠分既話就冇得返去咯...
今晚食完飯，洗碗果時發現冇水。阿爸阿媽話5點幾果時見到爆水管，到依家終於冇水喇！咁就大鑊啦，我同老豆都未沖涼，點算呢？唯有執埋包袱，過去我阿姨果度沖啦，我地9點2過到去，我姨丈就沖梗涼。我就等到9：30先有得沖，我10分鐘就沖好喇。咁我沖完就到我老豆沖，然後就坐左一陣，係10：15就返歸喇....回家果時就去睇下爆水管現場維修工程既進度啦，見到佢啱啱扑斷條水管，預備左一條新既水管準備鋪落去。希望佢聽日有水供應啦，如果唔係聽朝我就要上學校食早餐咯！
今日出左去我阿婆果到做節，10點就坐車出去幫手煮下野咁啦，順便就拎d野比我家姐。今日有好多野食，有菜心、魚、白切雞、燒肉、冬菇、荷蘭豆...仲有好多，多到數唔晒，不過就冇糭喇！-.-食完野之後就睇DVD啦，睇梅艷芳91年果個告別演唱會，睇到2：30先坐車走人。不過係樂富就塞車喎，因為要鋪路，咁啱啱鋪到燈口位，所以我地架車就唔可以右轉。鋪路都幾好睇呀，睇住佢倒d瀝青落去，然後搵架車壓實，再用水冷卻，d水一倒落塊地果度唔洗三秒就出晒白煙，可想而知塊地係幾咁熱。三分鐘就鋪好塊地，然後就放車行咯。去到荷里活果時就見到後車，不過佢始終都排唔到我地頭。返到屋企睇陣電視就做功課，端午節就咁過去喇。
話說我由上星朔三放學開始，部愛車就開始唔妥喇，踩唔夠兩分鐘就甩鏈，仲要連續三日都係咁，完全踩唔到上學校。於是今日就同老豆一齊整啦，整左30分鐘都係唔得喎，一放個腳踏之後就會甩鏈，於是就費事再整喇。擺返佢入監倉先，遲幾日好天就送佢入醫院。
今日班會有活動喎，就係打邊爐喇。原本係上星期五打既，點知我地大佬miss ada唔得閒，所以就改期改至今日喇，反正未來兩日都唔洗返學，可以玩夜d，今日天氣又較為涼爽，都幾適合打邊爐！都食左好多野呀，有魚蛋呀，公仔面呀，菜呀，仲飽過係屋企食！食完之後就慘咯，要洗野呀，洗n咁多個爐，原本都唔洗我洗既，不過見到d女仔洗得咁辛苦，做男仔都要有d風度既，所以就幫佢洗囉。
今日個天一直落雨，我拎左包糉出去土瓜灣比我阿婆。返黎果時諗住先去旺角買魚既，點知落雨落到好似倒狗屎咁，於是就取消呢個節目，直接坐車返屋企喇。返到屋企就做左兩粒鐘功課，做完之後就同人傾icq，傾下傾下就講下有幾多女仔係icq個buddy list到啦，條友就講話有好多，仲未計msn果d。呢個時候我就想申請返個msn喇，之前都試過申請，但唔成功，今日終於都成功喇，依家已經有3個人係我個buddy list入面，比icq既79個人都仲差一大段距離！
