夜晚7點幾將近8點果時，我老豆正左打機。無啦啦佢覺得好震，話唔知係咪地震。8點50分果時我終於可以上網，睇到新聞同天文台網站都話有地震，震央係香港東南偏南36公里處的擔桿海域，強度係黎克特制3.5級。可惜，我感覺唔到呢次地震，浪費左一個咁好感受地震既機會。

今日起身已經落好大雨，返到學校成個人有20%濕左。上中史果時，淑明話比我地聽出左紅雨，係中五第一次係紅雨之下返學。經歷過中四兩次經驗之後，知道實冇得放，結果亦不出所料。Lunch之前，副校長講左一段我都識背既廢話，就係：「根據教統局規定，全日制學校的學生須留左學校，直至放學時間，校方認為該區安全才可讓學生回家。」講呢段廢話既目的都係要我地留校午膳，比錢小食部賺。唔同既係，今次有好多人因買唔到野食而十分肚餓，包括屍哥。佢條友係班房成日話好肚餓，換黎既結果係比阿巾寸：「你好煩呀，肚餓咪肚餓囉，好出奇咩，講下野就唔肚餓架喇？！」笑死，個百痴仔又再一次比人寸，仲要比人寸到咁盡。放學之後仲要補課，係補會計，補到4點半左右，之後去左102，做乜？Highlight下面果行就知答案喇！

答案係：溝女，哈哈！

又係一个照常返學既日子，不过今日好鬼凍，我仲要係坐門口位添！好彩帶左件冷衫返去，如果唔係实凍死。d阿sir特別鍾意玩人，明知咁Q凍仲要我地開大對門，話等空氣流通喎，点知凍到我同隔離果个女仔死下死下咁。PE堂果時啱啱落雨，仲要跑步，好彩唔洗跑出街嗜！

今日係911，都係要返學。只係覺得天氣好舒服，起碼朝早集隊時冇成身大汗，上到課窒更加唔洗開冷氣。不過lunch時間過後就個個叫救命，因為連續兩堂英文，放學之後仲要整多兩堂，一次過上四堂英文，唔死都冇用！我真係寧願上40堂PA都好過上4堂英文，起碼前者冇咁悶先。

今日天氣好正，又唔係好猛太魦、又冇落雨、天陰得黎又有風。今日下午飯係食韓國燒烤，食左牛肉、雞肉同牛脷，仲有八碟開胃小食，只不過只$99，都算幾抵。然後去左太和商務買書，只有一本英文書，就係PAPER2。最後係寶湖買埋本中史，都仲差英文PAPER1未有，但係老師偏偏教梗呢本野，依家就諗住叫我阿姨係灣仔幫我買。

今日冇出阿婆到，因為根本唔需要我出去。係屋企無無聊聊，無聊到睇有線既直播新聞台，講台北果邊成三十萬人係度大叫「阿扁下台」。夜晚去左海港買燒肉油雞飯食，食左廿分鐘，然後又繼續睇倒扁運動。+.+

今日上完lunch之前果堂，有同學想出街食飯，又唔知帶唔瘉遮好。死屍哥懶勁咁講：「我可以話比你聽，今日一定唔會落雨！」點知好衰唔衰衰樣衰，比野明寸返轉頭，話：「我可以話比你聽，天文台發出左雷暴警告。」搞到屍哥冇晒聲出，笑死。未見過有人咁樣衰，衰到連阿sir都忍唔住要疾佢！

今晚去左大埔中心間迎囍食晚飯，因為我阿公阿婆佢地黎左。食左一個价值$198既套餐，有海鮮豆腐羹、魚香茄子煲同埋海蜇，仲可以加多兩個小菜，我地叫左个咕嚕肉同西檸雞。然後仲叫左兩个白飯，埋單果時既縂数係$297！

上英文堂果時，miss無啦啦話要我地聽日帶本新書返去，但果本書我到依家都仲未買到，於是放左學之後就去左太和商場既商務睇下有冇貨喇。我四點一出門口，去到商務果時排成長龍，排到去大班冰皮月餅果度。幾經艱辛先至去到櫃台，點知佢話我想要果三本書(一本中史+兩本英文)都賣晒，最後我好無奈咁行返屋企，返到屋企既時間係五點一。

今日係9月5號星期二，亦都係中五首個正式上學日。無乜特別，miss同阿sir入黎吹水都吹左一堂，不過數學、中史同會計係頭幾堂仲係教返中四既野。放左學之後去拎新眼鏡，帶落去果時覺得睇野好矇，仲衰過舊果副！於是就叫篩傳幫我睇下，經過修理之後，都冇晒問題咯。然後去百佳買野，買左四包出前一丁，價錢相等於坐一程75X，比錢果時先記得今日係果個乜鬼「無膠袋日」，要用膠袋既就要比$0.5，於是我索性就咁抬返屋企算。