今日原本要跟屋企人出去阿婆到，但我唔想出，因為尋日先出過，而且有可能又要去，所以最後係...........................冇出既。今日大埔天氣極之唔穩定，有時就冇雨落，有時就狂風大雨。我係下午4點幾果時去左圖書館，今日應該係最後一次去圖書館借書，因為今日已經係暑假既最後一個星期五，亦都踏入最後一個星期。只要下次去埋圖書館還書，睇怕都再等n個月之後先會再去圖書館了。去完圖書館，就去左大埔廣場買冷面食，好耐未食過喇，我諗最少都有四個月啦。
今日再一次出去我阿婆到，再一次去幫手執屋，再一次...。今次唔同既係，客廳已經搞掂左，油好晒油，換埋地板。黎梗既要裝修埋間房同個廚房，我諗係9月1日開學之前有機會睇到一間新屋既面貌！
真係諗唔到一個暑假咁快就到尾聲，10日之後，當呢篇日記去到第1頁最底果時，就已經係開學日。今日開始清理自己間房咯，都清理左好多好有歷史價值既垃圾，包括工作紙同通告等等。執下執下都執到兩個大垃圾袋，有d野仲係係中三果時留低既，到今日先至捨得扔左佢。原來執野係好鬼辛苦既，執完之後得返半條命仔，真係唔係講笑！
今日成32度，好熱，熱都算啦，但佢衰到係悶熱果種熱，真係搵命搏！好衰唔衰，約左今日下午3點幾補習，果時係最熱最熱既時候，補習老師仲要我背野，都冇乜心情背。唔好話我，補習老師都好似冇乜心機咁，真係比個天累死。
兩星期前就約左今日11點45分去驗眼既，咁我地10點05分左右就出門口喇。係坐K12去火車站，之後就坐火車去隧道口，再轉117去跑馬地既養和醫院。由巴士總站去醫院期間，途經一間叫竹園海鮮酒家既地方，等陣先講點解我無啦啦會講呢間野。到達既間係11點半，辦好登記手續之後就坐係度等驗眼。12點，我就見姑娘喇，係個靚女姑娘，正！見姑娘都係睇下英文字姐，冇諗到搞下搞下都搞左15分鐘；12：30就見視光師，又浪費左15分鐘，然後出去等見醫生。見完醫生，醫生都係講返年年幫我驗完眼既口頭禪：「對眼冇乜大問題，同上次既度數都係差唔多，一年之後返黎覆診啦！」驗完眼之後，已經係1點幾，我就離開醫院喇，因為約左阿叔係竹園海鮮酒家食午飯，而我老豆就陪阿媽等見醫生。點九左右佢地就到左酒樓，我問我媽的情況，佢就冇我咁好彩，由於佢視網膜薄左，要做激光手術，時間為即日5點半。於是我走先，返屋企睇《多啦A夢》，阿媽佢地就8點半先返到黎。果個唔夠1分鐘既手術，打激光打左91次(叫做少架喇，聽聞有人打左成千次)，收左$8000，痴線既！另外要買支眼藥水，呢支物體得果5ml既，收$140，都唔知痴左邊條筋！
繼尋日之後，今日繼續去我阿婆果度執野喇。朝早八點半就去到富善M記同我阿姨佢地食早餐，然後就坐75X出去。我地尋日約定10點出到去既，結果就遲左15分鐘先到。10：30開始執野加扔野，今日被丟棄既包括舊衣服、梳化、電視櫃等等。我負責將d唔要既木板搬落去垃圾站，而我舅父佢地就將d木櫃抬落去。其他既垃圾如棉被同床單就放起垃圾房，睇下有冇人肯執。去到下午4：45，我覺得好悶，於是就向屋企人申請早d返屋企喇。屋企人批左，我就即卡執野走，落到去啱啱有車，5：45就返到屋企咯。打左陣FS，6：45左右就去買魚旦河食，$13，好貴。
今日去左土瓜灣，因為我阿婆間屋要裝修，依家要開始清理間屋。扔下扔下，都扔左好多垃圾，有衣櫃同儲物櫃等等。咁就扔晒出門口，d唔要既衣服同埋書本就好快有人執左。婆婆佢地搵左個朋友落黎，諗住叫佢幫手搬野去垃圾房，但果位人兄唔肯，剩下收d值錢既野。加上佢份人鬼鬼祟祟，所以我屋企一致認為佢唔係一個好人，更加幫佢起左個名：姓蛇頭，名鼠眼。最大問題係呢位先生介紹另一個人同我阿婆裝修既，因此令我地都好擔心安全問題。
今日補PA，原本話要由上午10點補到下午1點既，結果12：10就走得。下午2點準時去到大埔墟火車站，同fd去遊車河。行程係咁既：坐火車去上水，然後坐城巴902R去嘉湖山莊；轉輕鐵去大興邨，坐66去深水埗；行去旺角始創中心睇展覽，最後坐271返屋企。講下今次行程特色先：城巴902R號路線，將於本月內結束營運，轉由冠忠遊覽車公司繼續營辨；九巴66號路線，係目前唯一一條有非空調巴士(熱狗)行走既屯門公路並全日服務的路線。唔知點解，坐熱狗行屯公果時，好懷念以前有熱狗行吐露港公路既路線，陣陣涼風吹埋黎，真係好爽。依家，除左74S之外，再沒有其他路線的熱狗會行吐公了。
8月17號又過左喇，係一個平凡到唔平凡既日子，又諗唔到野打日記！話時話，暑假都過左一個幾月咯，仲有16日就要返學，依家既心情只係好似放復活節假同聖誕節假咁，只有個多至兩星期假放，都唔係話咁興奮，起碼冇啱啱放暑假果時咁開心囉。最尾呢兩星期，我有以下活動：
8月18日(五)：
上午-補課
下午-同同學遊車河
8月21日(一)：
上午-睇眼
8月25日(五)：
8月31日(四)：
上午-打波
請註意：所有臨時既活動未加上的，(又講廢話)，哈哈！
今日又要補習呀，尋日先補完，今日又再補。皆因螃習老師要入camp，上星期六入到星期一，又由聽日入到星期六，所以得尋日同今日有時間幫我補習。都係做中五既數，做左幾課，不過覺得好煩，好唔想計！
