今日因為應承左屋企人同佢地一齊上田耕種，所以一早就出左去喇！你地估唔估到我地去邊到呢？其實我地就係去大埔火車站附近既運頭塘邨，運頭塘邨附近既新峰花園，新峰花園附近既馬窩。我阿媽去呢到都去左成年幾；連我老豆都去左幾次；而我，只係第一次去。今日既任務係摘龍眼，都覺得幾好玩，係有少少累，下次有機會既都想再去。

今日終於可以去睇《加菲貓2》喇，都唔記得等呢日等左幾耐咯，總之就等到頸都長埋啦！套野都幾好笑，雖然只係得果70分鐘左右，但都足以令覲眾笑到肚痛！記得睇《加菲貓1》果時係去又一城睇既，但因為今次有折扣卡，所以就去左沙田睇。開頭唔識路，就行左去禾輋果邊，後來發覺有唔妥，就問人啦。一問之下，原來正正就係新城市廣場果頭，行左好多冤枉路，好彩都趕到係開場之前買飛入去睇。

我姑媽仲有個幾鐘就上飛機去英國喇，坐國泰，仲要坐商務位。一去就去兩個月，希望佢一路順風啦！「商務位」，坐飛機時就成日都會見到，但係同佢冇緣，未坐過。我d屋企人，有次就因為隻機爆左，要轉第二班機所以有得坐商務位。另一次，我係隻機既經濟位冇晒，所以upgrade左，就坐商務位而我，最正果次都係由坐日本亞細亞航空，變左坐日本航空咋。

今朝出街果時都好熱，熱到成身大汗。點知當我補習補到差唔多四點果時，個天突然間黑晒，仲打晒雷咁。夜晚既新聞頭條都係講呢個咁騎呢既天氣情況，仲話西貢同藍田果邊落冰雹。我係香港住左16年，「冰雹」呢個名詞聽過唔少次，但係親眼見過既次數卻係等如零。有機會既話，都好想見識下呢個物體！當然，我唔希望比佢扑中，甚至係扑死，只不過係想同佢見過面姐。

今日又出去飲茶，已經係八日之內既第三次(上星期日+上星期三+上星期五+今日)。都開始覺得有少少悶，因為一星期內有四次食重覆埋同一堆野，離不既腸粉、蔬菜等。今次應該係我姑媽蛋去英國之前最後一次同佢飲茶，下次再同佢飲茶，恐怕已經是兩個月後既事。到時，我都升左中五咯。

由於買醫療保險關係，今日我要去旺角惠豐中心驗身，所以係11點就坐72X出去喇。今次驗身比較簡單，只係要驗小便同問一些身體狀況，但都要用上一個小時。度高，原來我有1.57米呀，好開心！然後就去PCCW果度換禮物，係一部PHILIPS既Hi-Fi音響。老豆就屎忽痕，旺角有間換領中心就唔去，要去元朗果間，於是就坐68X入去。咁就係元朗(西)巴士總站果頭食左午飯，都幾好食。食完之後就去搵果間野，點知搵唔到，激到老豆爆晒粗！後尾佢都費事搵，寧願坐車出返旺角，咁又再次踏上68X的車廂。係旺角果間就排晒長龍，等左十幾分鐘先換到禮物，然後就坐72X返屋企。今日既旅程，係一個V字形，由大埔往旺角，旺角去元朗，反之亦然。原本諗住實坐64K返屋企，點知最後都係坐返72X，所以話呢，今日始終都係同72X有緣。

今日晨咁早就起左身，因為補習時間係上午九時正。補完之後就開始睇書，睇尋日係灣仔會展買返黎既書。其中一本係講船既，就係講由美國波音同日本川崎重工製造既Jetfoil水翼噴射船，唔好睇少呢本野，佢就好似一本教科書咁，有好詳細既介紹，每一個細節都講得好清楚。另外一本就係講青藏鐵路既，雖然係一本簡體字既書，但係都幾好睇，唔錯唔錯。

一年一度既書展係尋日展開，為期6日。今日我就去左幫襯喇，其實自2000年起，年年都會去一次書展，唔經唔覺已經6年了。今年就得我自已一丁友去，因為阿媽隻腳唔妥，行唔到好多路；老豆就北上睇廠，可能有機會可以開工。咁今次就叫阿媽比左$300我，但我只係用左$196.4，枉老豆仲私人醒多$200比我。係呢$500當中，小弟只係用左39.28%既錢，係咪好慳呢？！今次既收獲都叫做OK豐富，都搵到幾多啱我心水既書！

咁今日就約左姑媽佢地去客家好棧飲下午茶啦，由於時間相撞關係，我就將下午既工作掉到上午做喇。12：30就坐車出去，好好彩咁坐中架正車！飲飲下茶果時無啦啦話去我阿叔果度食晚飯，都好既，可以出下街。點知去到8點鐘都冇野落肚，好唔習慣，因為平時6點幾就已經開左餐，突然咁夜都未有野食就唔安樂。結果搞到9點45分先可以坐102返屋企，原本就係去旺角轉72X既，但係阿媽話要坐307。開頭都唔係好想，因為會好貴！返到屋企時間為11時05分，阿媽一返到去就上網。以後都唔想去阿叔果度食，雖然餸係唔錯，但係次次都搞到8點幾先有野食，返到屋企冇11點先奇！連我姑媽都話怕怕，以後都唔想去果度食野！

今朝起身冇耐就落左去游水喇，由10點游到11點45分。然後就返上屋企沖涼，等食飯時間。2點就要補習，開始做中五既數，一d就好難，但有一d就好易，唉！唔知下年點捱喇！食埋晚飯之後就去海濱公園行，又去玩雙槓。不過一下唔小心就應聲倒地，好彩冇整傷。

暑假既第一個星期一，就要去圖書館借書。我阿媽規定我要借一本中文書同一本英文書，初初上到去都唔知借乜好。係圖書館入面遊蕩左十幾廿分鐘，先搵到一本合心水既中文書，呢本野包括散文、詩呀等等，好似幾好睇咁。係英文豬方面，開頭睇到本本都厚到自己都唔認得，好艱難先搵到一本薄薄地而能夠吸引我既書，係講車既。