今日要去地理果個乜鬼河流考察，就係去呢個梅窩既。一起身果時見到落雨，都幾大下，已經知道去到都唔洗點做野。咁我就坐7：15分果班307出去啦，45分鐘出到上環，快到無倫！點知我唔係咁識行喎，係利源東街落左車之後就上左ifc第一期，咁諗住行去ifc第二期既，點知行左落香港站，好彩我都幾熟果頭既路，最終用左20分鐘既時間去到碼頭，又教左美橞點係永吉街行去碼頭，原來我係最早到碼頭既...(miss除外)。有好多人都遲到，不過我地都趕到9點鐘開出既快船，坐左大半個鐘就去到目的地喇。因為落大雨啦，都唔洗分組做野，就咁成班人一齊影下相，做d表面功夫就算啦。不過都要有人落水斟d河水同埋捉d生物上黎做報告。係梅窩逗留左兩個鐘就走咯，坐12：10既船，都係呢個高速船...12：40就出到中環咯。原本諗住坐天星過海轉271架，點知見有少少暈船浪(個人覺得拋下拋下咁)，於是就坐307喇。我地呢個考察團都係得5個人坐307返去咋(miss+呀sir+希賢+另外一個女仔+我)，其他人都搵街去。不過呢個時間咁啱撞正放工時間呀，到到都好塞車，1個鐘先去到大老山隧道，早知冒下生命危險坐船轉返271啦。應該會快好多...

今日又返神經喇，唔經唔覺就到左尾二果次咯。都係講繽紛show果d野，好似話今次會由學生扮老師，老師就扮返學生喎，正呀！我同金仔誓言一定會玩死d呀sir同埋miss...等佢地平時出warning letter出得咁過癮丫，今次我地要一鋪返生，哈哈！！-.-不過今次最煩既就係同劇社果邊合作，佢地果邊又有內訌，次次都冇乜人返，都唔知合唔合作到。

今日補習，都係做數。做呢個軌跡既幾何，都好煩下，煩到有d唔想做，唔知點解佢好累唔累，補習果兩個鐘先黎累喎。搞到我都冇乜心機做，做唔夠兩題就勁想休息。不過點都要撐落去，為左學校考試，最重要既係為左呢個HKCEE，今日果兩個鐘認真難捱，真係好耐都未試過係補習時間會咁累。

今日就要做econ作業啦，嘩！超難做，打鑊佢！！由7點鐘做到依家，做左差唔多兩粒鐘，做到手都軟埋。仲要係未必啱果隻，我諗呢份作業應該得50%~60%分數左右，因為真係好煩加好難！聽日econ仲要小測架，好測唔測測實習老師教果幾課喎，撞鬼佢！我到依家都未溫書。好彩account阿sir好人，免左我地聽日小測，如果唔係聽日真係費事返學。-.-

今朝返學果時見冇乜雨落就決定踩單車返學喇，點知返返下果時開始有毛毛雨，不過唔算太大，所以都冇開遮。咁5：20到就放學啦，一出門口，就見到好大雨，即卡拎把遮出黎，最煩既就係我部車點算呢？開頭都有諗過放棄，繼續將部車鎖起度，聽日先上去拎返架車，但係好驚架車比人撻左，又諗過好唔好一路行一路推呢？但最終我既決定係------照踩。不過就好狼狽喇，因為我一隻手要揸住把遮，得返一隻手控制架車，所以就好似人地醉酒鴐駛咁，左搖右擺，平時一段爽快既回家路頓時變成一條難行的路，返到去仲濕到隻狗咁。

今日終於唔洗對住econ果個實習老師喇，之前上佢堂都唔明佢講乜，對econ冇晒興趣，真係想比$500我補習老師斬死佢。今日開始就由一路教開我地既老師教返啦，佢講四分鐘既野等如實習老師講四星期既野！唉....數學阿sir未來四日又要去中大進修，又整左個代課老師黎，都唔知佢教得好唔好架？！千祈唔好搵d小學老師黎呀，之莉試過幾次，d代課老師以教小學生既方法黎教我地中學生。最搞笑有次個老師唔知我地小息可以返上課室，佢就問個同學：「乜可以返上黎架咩？唔係要係下面小息架咩？」笑死人...佢仲要細細聲講：「小學都係咁架喎！」睇到之後真係哭笑不得，唔知寸佢好定自卑好，咁大個人都比人當小學生。

原本諗住今日去濕地公園既，不過因為落大雨就去唔成，由於我姨丈借左部車返黎又唔想唔用喎，於是就去遊車河喇。首先就去左川龍飲茶，d野唔係太好食，只不過係貪佢以自助餐形式經營，都幾有特色。然後就去左濕地公園既門口，都叫做「到此一遊」。跟住又去左元朗咁啦，去完之後就去埋流浮山，影左興建中既深港西部通道。最後就去左上水食飯，諗住去搵果間以豬手聞名既食肆，原來佢係聯和墟，不過我地就去左石湖墟，所以搵極都搵唔到，就去左大家樂食喇，都係食返雞翼紅腸瀨粉呀。

深港西部通道照片：

今日12：50補習，補到14：50。補完之後就食左條蕉，然後就同老豆出街喇。咁去邊呢？我前幾日屎忽痕就話想由荃灣行出九龍啦，於是今日就去喇。首先就係坐73X去到梨木榭邨落車，然後沿和宜合道行去青山公路。去到青山公路時，我地行左反方向，行左落葵涌道，好彩及早發現，行既冤枉路唔算好多，都算係不幸中之大幸。戲玉到依家先開始，一路行上山，行到成六至七層樓高，成身大汗，好彩就有風，不至於被汗浸死。不過上到青山公路最高點果時就開始有雨落，都唔算好大雨，又係另一個不幸中之大幸既例子。經過90分鐘既行程之後，終於去到汝洲西街，就坐返72返屋企喇。今日又完成左一項創舉喇，之前試過由旺角行去尖沙咀同埋由旺角行去美孚，睇下以後有冇氣力同心情由荃灣行去尖沙咀，甚至係由荃灣行去屯門先。不過，睇黎呢兩項創舉都要等我18歲以後先可以完成，因為我老豆誓言唔會同我咁行，同埋依家佢都唔會放心比我自已一個人咁行啦。

今日放假喎，因為老師要進修。咁趁住今日有假放就出左去沙田文化博物館做music果份專題報告喇，做d關於粵劇既資料搜集。我10：30左右出去，去到差唔多11：00，做下做下，做到13：00先走。好辛苦呀，第時如果唔係要做功課既話都唔會去。做完之後就坐返火車返大埔，然後買左個飯盒食，4點鐘到就去左打波，都係打返羽毛球。

今朝起身都知冇機會唔洗返學架喇，果然乜風球都冇晒，照常上課。返到學校，藍天白雲，雨都冇滴，不上PE堂已成為不可能的事。真係覺得天氣有d唔正常囉，以前打完風之後落雨都會落兩至三天，好少話一打完風就出太陽。不過今日天氣唔錯呀，有藍天白雲，又有涼風，正！