晚上等媽媽回家, 與她談一些事情, 點知媽媽望住我條眉好耐, 可能佢都覺得我條眉不對勁吧 ! 但她没有講什麼, 但她的表情真的讓我覺得佢在好奇什麼似的, 其實有 d 驚阿媽會問去邊到修的？

今日早上陪媽媽食完早餐, 就去投票囉 ~之後就去了樂富吉之島看 luggage, 因為媽媽發現有一個 luggage 壞了。原本睇中了一個, 拿新貨時, 我發現個 luggage 有 d 位爆線, 最後没有要到。

下午好多謝阿三和她的媽媽陪我在西田看 luggage, 點知這裡還比樂富的還要少, 最後没有買, 就去了阿三媽媽介紹的美容院修眉, 都修得不錯。之後媽媽打電話叫我出朗豪坊睇 luggage, 於是下午 5點幾趕回家, 拿返條短褲回旺角換, 條褲其實啱身的, 但我喜歡再鬆身一點, 於是決定換加大碼。點知没有加大碼, 只好換了一條中碼的裙, 點知仲要俾個 sale 串, 話呢條大碼你唔啱著, 我諗呢條裙中碼你未必啱。最後有個 sale 幫我度了度, 佢話條裙啱我, 於是我就找了個地方試一試, 好彩都啱身。

換完褲後, 就可以努力找 luggage 大作戰, 先去旺中附近的皮具店找, 接著就到朗豪坊, 與及佐敦道, 係朗豪坊行返去新世紀時己經 8點幾, 超肚餓, 於是決定不回家食晚飯, 去了大家樂食飯, 逛到真的超累, 最後係先施找到一個不錯的 luggage, 但媽媽嫌貴, 最後没有買到。

逛到真的有點想哭, 因為真的太累。

呢幾日好忙, 長話短說吧！

今日好多謝阿三和阿六陪我出去買褲 for 旅行時著, 最後在聯合找到我想要的牛仔褲 + 短褲一條, 逛到 6點就趕回家食完晚飯, 之後就去上跳舞堂。

星期二公司的飯局照, 終於刊登在 board 上, 今次我也登 board 了, 由於哪晚飲酒, 飲到塊臉很紅, 所以我今輯相片影得不靚, 而且塊臉很飽哦 ~ 看了幾眼, 覺得自己好肥, 就没有再多望落去了, 接著小英話我似笑非笑的, 其實我都不想, 因為我排牙太疏, 如果露齒笑, 中間就會有個洞口咁, 所以每次笑都要合嘴笑, 我都不想。

點知下午, raymond好快就晒返出來給我們, 他俾相我的時候, 他講了一句 "塊臉幾紅亦都幾靚", 我好細聲話 "是咩？我唔覺得靚", 阿姐聽到 raymond 咁講, 又搭嘴話 "個晚全場塊臉最紅的就是阿 wing啦 . . . " 接著阿姐叫 raymond "唔該幫我加紅塊臉呀？", 傻眼耶

今日 mango 原本要落 10幾款貨落黎香港, 而呢 10幾款貨就要走 10幾個口岸, 而且今日 closing, 又要趕著補料 + 上 licence 給 forwarder, and then 仲要 send 套 document 給客人, 真是有排忙, 原本預計今晚要 10點幾先可以放工 . . . 但我等到下午 4:30, 連一張裝箱單都俾唔到我, 真是激死我, 咁我點做嘢呀？於是 licence 我作大左好多數, 諗住俾左 forwarder 先, 於是下午 5點飛的過去九龍灣上 licence, 再飛的回公司趕埋其他寄 sample licence, 點知在 6點先知道部車扣在惠州海關到, 睇黎都交唔切倉, 因為我拿 late 己經拿到最盡 8點, 連一張 packing list 都没有, 所以今晚 ot 都 7點幾就可以走。

放工後, 阿爸就車左我去小敏屋企樓下拿 luggage, 真是好感激小敏借 luggage 和相機給我。由於阿爸趕住去做點事, 所以小敏教完我點 set 密碼, 就走 lu ~ 之後小敏打俾我, 佢話叫我去到機場拿 <耳水貼紙>, 心諗什麼古怪東西來的, 是不是哪些 for 耳水不平衡的乘客呢？於是我問她有什麼用？她話貼在 luggage到, 我仲覺得好奇怪, <耳水貼紙>貼在 luggage, 關 luggage 咩事？之後我先聽得出 <耳水貼紙> 原來是 <易碎貼紙>, 真是笑爆咀, 哈哈 <耳水貼紙>, 小敏我會記得貼 <耳水貼紙>在你的 luggage 到 ~ hehe

由於昨天飲得太多紅酒的關係, 加上又夜訓, 今朝起身個頭有 d 赤, 隔了一陣, 諗住食個豐富早餐, 令自己精神 d, 點知真的有效, 好快就精神起來了。

晚上約了蕭欣去上 modern dance, 我們7點左右去到黃大仙地鐵站, 跟住去了大家樂食了一個很豐富的晚餐 (蜜糖雞排飯 + 玉米湯 + 芝士焗蔬菜 + 芒果西米露布丁), 真的超豐富, 最後我們都食都好飽, 之後就慢慢行去上課了。

今晚入到班房, miss 就話跳返上次的舞, 我同蕭欣只好跟住跳, 重點是她們的舞步又多, 而且又快, 跳左幾次, miss 就開始教新舞步, 而舞步是要貼住扶巴來跳的, 這段還好, 之後又跳另一種新的舞步, 帶點似 "take達舞", 真的不知怎樣, 我己經跟不上, 隻腳不知如何操控, 之後不停係咁起飛跳, 又轉咁, 轉到我都有點頭暈。今晚咩動作都做齊 - <訓>, <loc>, <跪>, <跳>, <轉>, 我覺得 modern dance 是要身體好柔軟, 跳是要跳得好有美感的, 還要講求拍子, 今晚跳的還要比 garage jam 的舞步還要多, 真是要好有記性去記住 part 舞的每一個動作, but 我紿終都是對 funky dane 大興趣 d。

今晚見蕭欣跳到成個背脊都濕晒, 睇黎佢今晚可以減到很多, 相反我今晚唔是出好多汗。

晚上回到家, 沖完涼, 兩邊膝頭哥都瘀了。我兩雙腿都好易瘀的, 希望快d 好啦 ~

今晚是布行的老闆請全公司同事 6:30 p.m. 於九龍灣 <鍾菜> 食中菜的地方食飯, 布行個老闆一早就去到, 他打了幾次電話來吹我們快 d 去, 於是太子爺 7點就吹我們過去, 由於太子爺駕車去, 所以他問我們有没有人跟他車過去, 由於太多人都話要跟車過, 計埋太子爺 total 有 10個人要跟車過 (當中包括我在內), 點知臨走前, sandy 接到客人的電話, 於是佢 team 人就跟唔到車了。最後只得我, connie, joanne, peggy 和大老闆跟太子爺出去。

落到停車場, 見到太子爺部車, 嘩 ~ 好先進呀！raymond 按搖控器, 部車就會識自動開車門, 他的車是就7人車, 但由於太大, 真是可以坐到 10個同事都得, 第一次坐太子爺的車出去, 要攬實安全帶先得, 他開車後, 就開始播放韓文歌, 超好聽的, 由於我坐第二行, 我開頭還以為 d 音樂由第三行的喇叭發出聲音, 點知原來是車頭部電視發出來的, 真的很先進, 還有 mv 睇, 坐了一會兒, 都未欣賞完部車, 就要下車了, 因為到了目的地囉 ~

到 9點先開席, 今晚 d 餸真是超唔掂, 樣樣都的的式式, 没有鮑魚食, 只有 4道雞, 2碟菜, 1道海芯, 1碟一開2的蝦, 仲有其他餸, 但己經唔係好記得有咩餸了。

席上有兩枝紅酒, joanne 叫我試下, 其實我仲諗緊要不要飲, 點知佢好快叫 waiter 拿埋酒杯給我。sandy 來到看見我飲酒, 第一件事就是呆左, 她問我 "你仲咩飲酒？萬一飲醉左點算", 我話你不用替我擔心, 我之前己經俾舊老闆訓練飲紅酒有一手, 她話我咁純, 估唔到我會飲酒的。接著就發生了一些有關於口才的問題, 我好討厭公司個個同事都話我個樣純, 接著又將 michael 推俾我, 她們話 michael 個樣好純, peggy 話 michael 個樣純, 又肥, 又唔夠 smart, 實唔會考慮他做男朋友, 點知 joanne 就話 michael 純, 同阿 wing 好襯, 吓 . . . 仲咩有燒埋去我個度, 咁樣講, 即是話我肥, 個樣好蠢啦 . . . 好 hurt 我, sandy 都幫我, 她問 joanne "你咁講咩意思先？", joanne 只是笑而避開這個答案, 唉, 好傷人哦 ~ 之後 connie 亦加入埋戰團, 她覺得如果選 michael, 不如選布行太子爺 (andy), andy同 michael 一樣個樣唔掂, andy 就禿頭 + 四眼 + 矮 + 實際年齡是 24歲, 但望落去似 30歲, 打扮保守, andy 爸打扮得還要年輕過自己的兒子, 但 andy 勝在家底厚, connie 話呢點 michael 己經没法比, 吓 . . . 講錢唔講心, 這樣還會幸福嗎？

唉 . . . 點解呢排都俾公司 d 同事 "hur" 住晒嫁, 成日都話要幫我找個純品的男生俾我做男朋友, 我當場話不用了, 小英問我 "阿 wing 其實是唔是有男朋友?" (我都好想有), 其他同事就係到討論 "可能阿 wing 己經有男朋友了", 接著 peggy 好大聲講了一句 "我 sure 阿 wing 没有男朋友", 此舉真的讓我傻眼耶 ~ 我覺得 d 同事是覺得我個樣是找不到男朋友, 所以先會咁樣 ~ 點解我有没有男朋友, 我覺得她們還比我更關心呢個問題囉 ~ 我覺得順其自然就好了, 其實我之前俾 chris 話過我一 d 嘢, 我諗可能係呢個原因掛, 所以 . . . 先找不到男朋友哦 ~  

今晚的飯局, 太子爺開了一枝價值 1500元的紅酒給我們飲, 真的超好飲呀！1500元果然是唔同 d, 我今晚起碼飲了 5-6杯紅酒了, joanne 話我 d 酒量驚人, 好飲得, haha, 承讓承讓 ~

食完飯, 就同 connie 一齊搭的士回家, 有同事住在我的隔離幢大廈, 真的方便, 可以 share 搭的士的費用。

今日 lunch 時, sandy 成組 merchandiser 一齊出街食飯, 隔了一陣, 我阿姐同埋另一位阿姐出街食飯, 我己經遲過佢地出去食, 點知都同埋佢地一架 lift 落樓下。sandy 問我 "你又玩孤僻, 自己一個人去食飯呀？", 我不是玩孤僻, 而是你又無叫埋我同你地一齊食, 我是唔會主動開口話同你地一齊食的, 而我阿姐也在 lift 內, 我阿姐是唔鐘意 sandy, 所以我保持中立, 唔可以同任何一邊去食飯, 接著 sandy 問 carmen "有無貨俾阿 wing 呀？", 我唔知佢講咩, 我問sandy她指的貨是什麼貨？ carmen話是唔是煙呀？sandy 話唔是, 仲要話 carmen 無理由唔知嫁, 之後 sandy 問 carmen 有無純品的男生介紹俾阿 wing, 吓 . . . carmen話有好的男生都自己 "立" 左先啦, 其他個 d 都唔好嫁啦 . . . sandy 話 阿 wing 我諗呢個世界只有電車男最啱你, 我話唔好玩啦, 電車男最啱我, 我話到時我實悶死了 . . .

我真是覺得自己 d 口才超唔得, 因為當我每講說話時, 我會考慮下什麼應該講？什麼不應該講？這些的過濾, 導致會慢人幾拍, 俗稱反應慢, 到底我是太過謹慎, 還是反應慢, 太過遲鈍呢？因為我真是唔想講出來的說話 hurt 到人, 同埋講左一 d 無得反轉頭的說話。睇黎我真是要看一看有没有口才訓練班, 去訓練一下自己的口才。

今日下午, 太子爺走過來問我聽晚去唔去食晚飯？其實佢之前講左一段嘢, 實在太細聲, 我聽不清楚, 只聽到有聽晚去食晚飯, 問我去唔去？但我又約了阿六拿 luggage, 於是還在考慮中, 我話遲一點答佢, 點知我阿姐好衰的話我 "你聽晚放左工都無嘢做啦 . . . 你咪去囉~", suki 即刻話我阿姐好衰, 講呢句說話好過份, 我即刻解釋我聽晚約左人, 我是有嘢做嫁 . . . 講到我放工無嘢做, 好得閒咁, 真是氣 . . . 最後阿姐叫我去, 佢話有鮑魚食的, 叫我試一試同朋友改期, 最後同小敏改左星期四晚拿 luggage

今日終於在家看完日劇 <14歲的母親>, d 劇情真是讓我覺得個女主角好傻囉 ~ 識左個男仔兩三日, 就同佢發生關係, 仲要有埋 bb 添, but 個結局都很不錯, 志田未來真的演得不錯, 感覺表妹有些似她 (我指的是表妹個樣 + 個型望落去好似好似咁)

晚上看 <一擲千金>, 覺得李司棋好幸運, 一開始己經開左 d 細銀碼, 而且她拿著的是 300萬寶箱哦 ~ 其實我蠻喜歡李司棋的, 因為覺得佢正派, 同埋佢年輕時真的好漂亮哦 ~ 其實我没有看過 <溏心風暴>, 但我還是很支持李司棋拿視后哦 ~

之後看了一陣 <茶煲阿四>, 其實之前一集都無追過, 因為覺得 d 男女角都唔靚仔靚女, 所以覺得唔好睇, 但看了一陣, 覺得佢 d 劇情好攪笑, 於是就繼續看落去囉 ~

現在家中上網很慢, 要花很多時間才可以上到想要去的網站, 都不知道是寬頻公司的問題, 還是其他因素。

今日早上舊公司阿頭打黎問我 "有没有收到 mango 的一封 email?", 我話没有, 她話不知道如何回答, 想問下我意見, 於是我叫她 send 來給我看看。收到後, 我等她解答了其中一條問題, 接著她問我英文要怎樣寫  . . . 吓, 仲要我幫你翻譯埋, 算啦 . . . 幫下佢啦, 聽佢講老闆嫌佢 d 英文差, 但又要佢用英文回答 email, 她回履完, 又狠狠俾老闆批評, 好似好可憐咁。點知唔譯由知可, 一譯就出大事啦 . . . 她要我幫她譯晒咁多條問題, 即是幫佢答晒全封 email, 但我自己公司都有自己的工作需要趕著完成的, 我話 "你話唔識第三題, 所以我才幫你譯第三題, 其他你話識答, 所以無幫你譯, 因為我公司仲有 d 工作趕著要完成, 所以要做自己嘢, 幫唔到你譯埋其他啦 . . . ", 於是她很無奈, 但是幫得一次就會有第二次, 如果我全部同佢做晒, 咁不如佢份人工都俾埋我啦 . . . 加上我在公司很忙, 幫你譯一條問題己經算人至以盡啦 . . .

晚上去上課, 今晚以 yoga 為主, 覺得今晚做的動作, 簡直好似 d 阿兵哥每朝早在沙灘操練, 係咁做 d 類似掌上壓的動作, 做到手腳軟賴賴啦 . . . 做做吓, 己經無力做, 真是做到有點辛苦。

放學後, 好多謝咁多位姐妹聽我傾訴, 企在學校門口前面傾左 1小時 40分, 講晒出黎, 心情也好多了, 真是多謝你們。

晚上回到家同媽媽講開去日本旅行還錢之事, 我告訴她 "我打算新年不去星加坡了", 點知媽媽同爸爸叫我唔好唔去, 佢話我又話左俾新加坡的表哥知, 又同 d 同學仔傾好晒, 唔去好似不太好, 加上她買了花膠給星加坡 d 親戚, 她諗住我新年去時, 幫她帶過去, 但我宜家又話唔去, 她話她想我去, 幫她做快遞帶呢 d 花膠過去, 好坦白講, 我計過如果在 12月 book 機票過去, 我連訂機票的錢也没有, 怎樣去？  

昨天寫完日記, 就跑下樓諗住提晒銀行戶口 d 錢俾媽媽, 接著阿爸跑出黎阻住我, 於是我落到樓下, 一邊哭, 一邊對阿爸說 "我唔想我今次去旅行去得唔開心, 我要去提錢俾返阿媽", 阿爸阻止唔到我, 於是就打去阿媽公司, 阿媽在電話中叫我唔好理細佬, 跟住我越哭越大聲, 街邊的途人都望住晒, 我都唔理咁多, 我同阿媽理論左一陣, 於是佢在電話中話 "如果我再哭, 你就唔好去日本", 於是我拋返個電話俾阿爸聽, 之後阿爸都是拉返我回家。

回到家, 哭著跑去沖涼, 接著看了一陣電視, 睡覺時又是哭著眼淚入睡, 到今朝早起身, 都是眼濕濕咁。早上阿爸車我返工時, 佢又弄哭了我, 於是實在太唔開心, 我就去了大快活食了一個好豐富的早餐, 好讓自己的心情愉快些。我好想今日遲一點回公司, 我擺明遲到, 回到公司己經 9:50分。回到公司第一件事我就同 connie 講我請假去旅行一事, 點知阿姐的反應是 "咁大鑊, 唔是掛, 唔知 mango 多唔多貨出", 於是我回答她 "我看了手頭上的資料唔見個排有貨出", connie 話 "咁都好 d"

lunch 前, 媽媽打了個電話俾我, 她叫我今日不要去提錢俾佢, 佢叫我遲 d 先還返 d 錢俾佢, 於是就收了線。

由於今日公司拜神, 所以有燒肉和生果食, 所以中午諗住食杯麵算, 因為今朝早食左一個 24.5元的早餐, 中午要慳 d, 之後俾我阿姐話我 "駛唔駛為左個旅行, 攪到食杯麵咁慘", 我只好話 "因為一陣間有燒肉食, 所以食杯麵就 ok", 點知佢話我衰。點知小英拜拜下就出左街做嘢, 於是等佢下午 3點幾回來燒埋 d 醫紙才可以斬燒肉來食, 我們每個人都食了很多。

因為今日不是太多工作, 所以只 ot 左半小時就放工了, 在我走個時, 個 michael 又想黎找 peggy, 我想可能是我地上次屈佢請食下午茶, 所以驚左, 才咁夜上來。

晚上, 爸爸同我講 "媽媽己經話過細佬", 他叫我唔好睇唔開, 我只是覺得親兄弟姐妹講嘢唔駛咁過份, 我告訴爸爸佢己經唔只一次咁話過我, 佢成日又話我俾家用俾得少, 又話我係呢個家無貢獻, 佢講過的嘢多不勝數, 我阿爸竟然叫我當佢唱歌仔, 唔好理佢。我是一個眼淺的人, 我只要俾一話一話, 我就會哭, 我實在好難當佢唱歌仔囉 ~

今日終於可以上來報導行蹤啦 ~

今日早上 9點回到公司, 不停咁做, 終於下午清了一大部份文件, 只久一大堆未 upload 上網的 packing list 和 一大堆未 filing 的文件, 真是好開心, 估計今日也不用 ot, 多天 ot 換來的成果, 臨放工前, 太子爺要我找回我未黎做的文件, 而且要找超多文件, 有些文件還在迷你倉, 我真的不想去哪裡, 但不找又不可以, 好彩最後 angel 通知我, 只找回 invoice就可以了, 於是找回電腦上的 record, 都花了個半小時, 接著就要快手打 sample licence, 好彩今日不算太多版要寄, 好快就完成。

點知臨放工, d 阿姐又想推佢地 d 工作俾我做, but 我話仲有 d mango 的文件未整, 她叫我整好就話佢知, 最後 6:40分, 大部份都完成差不多, 只久某部份的 packing list 未 upload 上網和 filing, 於是我就偷偷離開公司了, 因為 ot 左幾晚, 我真是需要早點回家休息, 因為最近係咁 ot, 履 forwarder d email 都打錯。

晚上 9:07 和弟弟為去旅行一事吵起上來, 很不開心, 現在是哭著打這篇日記, 我發誓以後屋企人話借錢俾我去旅行, 我都不會去, 我想我今次的日本之旅實玩得不開心, 真是有 d 唔想去。

我想我新年可能去唔到星加坡了, 費時到時細佬又話我又錢去旅行又唔還錢俾阿媽。

今日媽媽告訴我 "旅行社己經打來給她, 旅行團己經成團了", 實在太好了, 媽媽早上出去交埋尾數, 但還未同阿姐講去旅行一事, 打算明天回公司同她們講。

距離出發的日子將近, 媽媽知我呢排加班得很夜, 她叫我上飛機前一晚早點下班回家執行李, 但我原本諗住上機前個晚做夜d, 攪掂 d 手尾先出發, 費事到時阿姐又話我, 還是看情況再作打算。

之前蕭欣叫我每個人帶一個 luggage 過去, 但屋企只有兩個 luggage, 都不知去哪裡借多一個 luggage 回來？去旅行前, 真是要做足好多準備功夫, 又要揾人借 sd 和 ms 咭, 還要想想帶哪一件衣服去？媽媽叫我帶少 d 衫去, 因為又要買嘢回來, 但也不能帶少於 5件衫的, 睇黎真是要落力問人借 luggage 囉 ~

今日早上 9點己經回到公司工作了, 由於太早的關係, 所以公司裡只有我, sandy 和小英。sandy 突然對我講 "為什麼你又打回原型呀？昨天的打扮咪幾好囉?仲咩唔繼續做靚女呢？" . . . 吓, 我今天和昨天的不同之處是 <今天帶上眼鏡上班>, <穿波鞋來上班>, <穿另一件 t-shirt 來上班>就是這三點, 佢覺得我個 look 唔掂 . . . 就是因為昨天帶 con 長時間望住電腦, 攪到個頭很痛, 所以才帶回眼鏡來上班, 加上知今晚要 ot, 還是帶眼鏡好一點。

接著 sandy 問我 "你有無 22歲呀？", 我叫她估吓？她估我 "22 - 23 左右" . . . haha 真是開心, 個樣望落去細一兩年, haha, 染髮真的有讓人變年輕和變漂亮的魔法哦 . . .

昨晚己經想好, 既然染完頭, 又買左對新 boot, 今日就以新形象去上班吧 !!!所以今日的配搭是格仔恤衫 + 四個骨褲 + boot and then 再配多一件背心, 就這樣子去上班囉 ~

回到公司的走廊, 首先遇到小英, 佢話 "你打扮得咁靚, 個頭髮仲做埋色添呀！", 接著公司的同事對我今日個新 look 都有好多評語,

小英的評語是 <她整天都見我靚女!!!>

peggy 的評語是 <覺得我這個頭髮的顏色很不錯, 整完個頭後, 整個人精神晒, 同埋覺得我好型和靚左!!!>

維珍的評語是 <你今日好型呀！>

sandy 的評語是 <嘩 . . . 你今日個新 look 好靚呀！> 小英就插嘴話 sandy "咁你即是話平時阿 wing 個 look 唔得啦 . . . >, 接著 sandy 話平日個 look 都好, 只是今日更加好而己。之後 sandy 話我換了個髮型塊臉都瘦了, 實在太開心, 哈哈 . . .

connie 的評語 <覺得這個頭染得不錯, 而且好平, 她還叫我給哪間 salon 的咭片給她, 她想下次到哪裡染>, 她也覺得我染完髮 + 修埋個頭後, 塊臉瘦左, 她開頭還以為我在屋企樓下間 salon 染的, 超攪笑, 因為我和她是住在同一個屋村到, 所以她才有這樣的想法。

joanne 的評語是 <你染左個頭很不錯, 而且 300幾元, 真是抵都爛, 而且仲包咁多嘢, 叫我介紹她到哪裡染髮>

grace 的評語是 <我覺得你染呢個色, 好襯你呀！>

係唔係好多評語呢？其他同事就無講 d 咩, 只是望住我, 唉 . . . 換一個新 look 都會有咁大的反應的。唔通我平時著 d 衫真是好唔得。

lunch, chris 請晒全公司同事去 <龍皇酒家>飲茶, total 分開左兩枱坐, 今餐食了很多點心, 實很貴的, 真是超多謝佢。

飲到 2:33分, 就回公司了。今晚 ot到 7 點就走啦 . . .  其實還有很多文件要處理, 但個頭有點痛, 打算明天才展開 ot 生涯吧 !!!

距離出發的日子很近啦 ~ 但是 . . . 唉 . . . 公司出貨情況很混亂 . . .

昨天打了電話約了 yoko 上去她的 salon 染頭, 大約 11:10分上到去佢間 salon, 有個女人招呼我, 我話約左 yoko 整頭, 但她都没有告訴我 yoko 今天請假, 於是她叫了另一個師傅 (好似叫阿添的男生) 幫我弄頭, 於是我就問阿添 "唔見 yoko 的？", 於是他就幫我問哪個女人, 哪個女人才話 yoko 朝早打來請假, oh ~ 有 d 失望添, 接著阿添問我 "咁你仲整唔整頭呢？" (當時己經傾好晒價錢, 同埋染咩色, 咪玩啦 . . . 黎到唔通唔染咩?照染 ~), 我話 "染", 接著等了一陣, 才有人幫我染頭, but 覺得呢間 salon d 服務都 ok 的。

當他幫我染完個頭, 沖完水, 坐回鏡前, 望到鏡中的頭髮, 點解咁少顏色的？有 d  失望添, 諗住等成個頭整好, 才睇下個情況點先。之後佢再幫我弄埋焗油, 弄到最後步驟, 就是 cut hair 啦 . . . 當時個頭沖完水回來, 他問我 "你之前係唔係有電過頭髮嫁？", 我話 "没有, 從來都没有電過頭髮, d 頭髮一濕水, 就會變曲, 揾風筒吹返就會直返" (當時我諗到台劇流 1的劇情, 道明寺一濕水就會變直, 乾了就會變曲, 同我的情況是相反, 好攪笑的, hehe, 連 cut hair 都會諗到呢 d 嘢), 他話 "係呀！咁神奇, 等我幫你吹返直佢先再幫你 cut 啦", 我點頭表示 go ahead。到最後, 佢幫我吹完個頭, 見到成個頭好多顏色和剪得不錯, 我很開心, yeah . . . 實在太好了, 是我心目中想染的哪種顏色, 我夬定下次也回去返這間 salon 染頭的。

整完頭都差不多 2p.m., 於是在太子 join 埋阿大一齊過葵芳會合阿三, 阿六和阿六家姐。由於阿三, 阿六和阿六姐都食了 lunch, 於是我和阿大在紅樹林餐廳食完 lunch 先 join 返佢地。

今日超開心,我終於買到奇待己久的 boot, 我終於可以著 boot 過冬啦 . . . 哈哈, 由於價錢合理 + boot 款也不錯, 阿大也和我一樣, 買了同款不同色的 boot, yeah . . . 我地可以做 twins, 之後我又同阿三一齊買了一條同款但不同色的連身裙, yeah . . . 我和阿三也可以做 twins, 我有一個好主意, 就是下次和阿大, 阿三出街的時候, 我和阿大一齊著同款的 boot, 同阿三一齊著同款的連身裙, 接著我企在她們的中間, 嘩 . . . 感覺好似有連繫的, 鞋同鞋連帶到裙同裙, but 唔知佢地會唔同我咁樣癲呢？hehe

之後我也買了一件格仔衫, 小敏也有收獲哦 ~ 就是 boot + 褸 + 襪, 今日人人也有收獲很不錯。逛到 6點, 就搭 mtr 回家了。