今日 iris 都没有來上班, 聽 peggy 話 "iris 證實左是甲狀腺膏, 現在驗緊是不是大頸泡, 在看看需不需要做手術", iris 大我一年, 没有想過這麼年輕就會有這個病, 衷心希望佢不是大頸泡, 食藥可以醫治啦 . . .

晚上約了阿大, 阿三, 阿五, 阿六和蕭欣去看 "不能說的秘密", 這套電影真的很好看, 有一個位, 真是有想流淚的衝動, 當然最後是没有啦 . . . 有一刻還以為是鬼片來的, 但最後的結果真是意想不到, 真是一部蠻不錯的電影。

看完電影, 己經 9:30, 於是就去了元綠食 sushi, 之後小敏講返她同事在日本見鬼的事和一些爆笑的日本經歷, 之後就是分手信的時間, 真是多謝小敏的手信, 我們各人都拿了一袋食物手信回家。到計回今晚看電影和食飯錢的時候, 真是俾阿三嚇死, 她說我還未給她幫我買護膚品的錢, 晚上還為這件事睡不著。因為我真是記得有給錢給她, 她說小敏唔覺我有還錢給她, 真是驚 ~ 所以我整晚在諗返係在哪個 moment 給她, 講了什麼說話, 希望再打俾佢, 令佢回想起, 這樣就好了。 

 收到 1億 yen 的尤魚絲的日本手信

今日 Tony Ma (布行) 請全公司食 lunch, 當是慶祝我們新公司入伙的賀禮。

12:45分 我同 sandy和 carmen 先到陶源酒家, 之後一班同事陸續到達, 我地20幾個人迫埋一張枱, tony 話不如分開兩張坐, 因為好迫, 接著一班同事阻止他, 因為老闆鐘意一班同事親密 d, 唔鐘意分開黎坐, 最後 tony 只好無奈地坐下。

今餐 tony 叫了好多嘢食, 樣樣都好正, 真是好豐富耶, 好過上次老闆請我們入伙個餐, 真是形成好大的對比, d 同事個個都話今餐好豐富, 俾說話老闆聽。當買單個時, 維珍小小聲對我說 "你快 d 睇下老闆個奸樣, 佢笑得幾奸", 佢講得無錯, 老闆真是笑得很奸, 而且仲要偷笑, oh ~ shit, 今餐真是食得好豐富, 聽 designer 話今餐是 tony 自己拿錢出黎請, 没有得 claim 返佢公司錢, 今餐我諗食左 2500-3000元左右, 真是好多謝 tony 請我們食了一餐咁豐富的 lunch。到走個時, 我們還剩下好多食物, 於是 mandy 話拿返去餵狗和貓食。

今日 iris 好唔開心, 因為佢搬到黎新 office 坐正凶殺位, 是一個病位, 佢搬到黎成日都覺得唔舒服, 佢今日覺得自己好似患有大頸泡, 佢好擔心, 所以下午就請假去看醫生了, 希望佢無事啦 . . .

今日同 sandy, carmen, angel, kiki一齊去食 lunch, 她們在講 chris 整天都請假, 是一名消防員

黎的, 由於受昨天的事件影響, 所以 sandy 問我知唔知佢地講緊咩？我話你們不是話 chris 整天在

請假嗎？接著她問我 "你明唔明消防員點解?", 我話不知道耶, 她說 "我估到你不知道的, 其實是話

chris 好似消防員一樣返一放二", 我話我明了, haha . . . 呢間公司 d 同事講嘢真是 funny 

原本諗住今日早上回到公司, 坐位還未 set up 好晒, 無位坐, 所以早上係觀塘食完早餐, 9:50分先返到公司。點知所有位都 set 好晒, 我終於有位坐啦 . . . 好開心, 於是自己砌返好自己部腦, 弄到 12點幾, 終於執好我個位了, 現在的坐位明顯比以前細左, 但感覺還 ok, but 過就要同關二哥面對面, 你眼望我眼的。

lunch 成班同事一齊去左 "地地道"茶餐廳食飯, 分開了三張枱坐。我同 sandy, kiki, angel和 peggy 一張枱, kiki 講佢係舊公司包外賣, 所以個時好瘦, 但黎到呢間公司, 唔包外賣, 攪到佢肥左好多, 食得多反而唔肥, 無得食所以肥左好多, 原本我以為佢地講緊減肥嘢, 但原來不是, 她們講的是三級嘢黎, 我完全 get 唔到, 跟住 sandy 問我明唔明佢地講緊咩？我話你們不是在講減肥的事情嗎？跟住 sandy 就話我單純, 叫 kiki 唔好教話我, 跟住我再問個究竟？她們說你還是不知道比較好, 而她們幾個就大笑, 我真的不知道在發生什麼事呀？哈哈 . . . 原來一山還有一山高, 公司 d 同事真是修道高, 竟然講三級嘢, 講到一 d都唔似三級嘢, 真是讓我摸不著頭腦, 但這件事真是讓我笑爆。

早上醒來, 覺得雙手己經没有昨晚這麼痛, but 左手仍然很痛。我今日突登遲回公司, 我差不多 10點才現身公司。老闆回到公司, 同大家講早晨, 但大家都没有理會佢, 佢即是無隠地走開, 因為大家昨天積下來的怨氣很深, 所以大家一齊有這個共識。

angel 和我一樣雙手都痛到無法入睡, 而維珍和 iris則面邊肩很痛, angel 擺給我們撒隆巴斯膠布給我們, 貼在痛的位置上。點知老闆見我在上手臂上貼有膠布, 佢就話 "你剛剛捐完血回來?" 其實個時我聽唔清楚佢講咩, 我只聽到 "剛剛 x 血回來?" 我就開始估佢的意思, 最後都估中, but 我只有一笑置之, 因為老闆同你講笑, 即是唔好笑, 都要笑出來, 這個是我在這間公司學會來的。

老闆一走開, 個個同事問剛剛老闆對我講什麼？維珍好攪笑話 "我聽到老闆同你講 "你隻手有瘀血?"", 我話不是啦, 我講返一次講講老闆對我講的說話。她好攪笑的講了一句 "阿 wing 你捐血, 我抽脂 (她指著兩肩上的撒隆巴斯)"

老闆真是好鬼賤, 臨放工前, 佢叫我地成班女同事, 清空 05室 3個櫃上面的東西, 然後搬回 01室, 没有人理會, but sandy 就一枝箭去左 05室搬嘢, sandy 還命令維珍一齊去, 之後成班同事就一齊過去。connie 話唔好理佢, 將櫃入面的東西, 全部數晒落地下, 唔駛將 d 櫃搬返過去。之後 connie 去洗手, 我同維珍, peggy 入去 01室拿晒咁多個同事的袋走人。我們拿漏了小英個袋, 當佢入到去, 老闆問小英 d 人呢？小英話佢地走晒啦 . . . 老闆用反問的語氣 "走晒? 放晒工, 咁我 d 櫃呢？", 小英話在 05室 ~ 哈哈 . . . 勁開心, 激死佢。

1:30就離開公司去 apm join cher, 之後去左 food court 食飯。食完飯, 係food court 傾左一輪, 她就回家了。於是我一個人行 apm, 因為好想買點東西。我首先上 apm 擰蛋舖頭看看, 點知看見有炸蛋人的 ndsl 筆, but 俾人擰晒, 最後就去看衣服。

我在 i.s.o. 看中了一條黑色短褲, 點知 sales 拿左另一條俾我試, 試了兩條, 兩條都很喜歡, 決定了很久, 最後買晒兩條褲, 之後個 sales 話加多 80元就可以買多件 t-shirt, 但睇唔啱, 但就睇中左件褸, 覺得試完也不錯, sales 幫我計過, 3件貨品加埋 500幾元, 跟住個 sales 又話加多 80元就可以 join vip, 原本睇極都睇不中, 最後試了一條背心的連心裙, 我想可以買去旅行著, 於是咁樣大出血 join 了 i.s.o. vip。未試過咁瘋狂一次在同一間舖頭買 4 件衣服回家, 買完就立即回家, 因為買了這麼多衣服, 不想再逛, 再買東西了, 否則下個月的人工都不夠找數!!!

早上老闆話請我地中午去飲茶, 當是慶祝新 office 入伙, 但最攪笑的是新 office 空空如也, 什麼也没有, 下午才會搬過去新 office, anyway, 老闆請當然去啦 . . .

1點就成班同事過去陶源拿位, 我們只點了幾籠點心, 幾碟小菜, 基本就唔夠我地 16位同事食, 大部同事都食唔飽。食到 2:30就回公司請自己個位 d 嘢, 我地 pack 好晒箱後, 老闆竟然叫 merchandiser (sandy) 搬張枱過新 office (其實新 office 是同一層樓, 由 05室搬去 01室), 老闆叫到又點可以唔搬呢？我地 d 年輕女同事就續張續張枱和櫃搬返過去, 而 d 阿姐就唔搬嘢, 係度傾計, 咁都算啦 . . .

令我地一班女同事最激氣的地方就是以下事件:

1. 老闆話我地成班女同事搬枱和櫃過去新 office 到, 搬的途中, 弄花公司的地板, 我要在這裡特別註明新 office 的地板只不過是一塊石屎地板, 没有任何修飾, 打磨之類的東西。佢又俾唔起錢請搬運工人黎搬傢俬, 要我地一班女同事搬, 你就唔好怪我地弄花個地下, 我地唔是專業的搬運工人, 我地肯同你搬己經好仁至義盡, 仲要咁多聲氣。

2. 點 designer (維珍) 落街買電腦線 6-7次, 之後又話人地買錯嘢, 用好惡的語氣罵維珍, 罵維珍快 d 死落去同佢買返 d 啱的電腦線回來。弄到維珍哭了出來。

3. 成班女同事搬得好辛苦, 流晒汘, 個個都話要下午茶, 但老闆扮聽唔到, 於是 merchandiser (angel) 嬲得濟,  用自己錢買好多罐汽水回來請全公司同事飲 (老闆除外)。隔了一會兒, receiption (peggy) 話好肚餓, 問我地食不食egg-tart？於是會計 (mandy) 問經理 (andy) 拿左 300元買食物, 與及還返之前 angel 買的汽水錢。

4. 老闆話我地成班女同事唔做嘢, 個個坐晒係到。我們搬了咁耐, 都要休息下, 連給人休息的時間都没有, 只有一直一直不停搬。這間 office 又不是我們, 我們為什麼要同你買力去搬東西。

5. 我們搬了大半天, 一句好聽的說話都没有, 只有不停話我們不是, 佢個面口越黎越黑。如果佢講返 d 好聽的說話, 例如 "今日要成班女同事幫我搬傢俬, 我知辛苦晒大家, 但希望大家幫幫手, 將 d 傢俬搬去新 office", 起碼我們聽完後, 對搬傢俬都不會咁多怨氣。佢成日講的口頭禪是 "奉旨嫁"

6. 老闆叫了一個男仔上黎 set up 公司電腦的嘢, 個男仔見到我地搬得咁辛苦, 好心幫我地搬 d 傢俬去新 office, 點知俾老闆見到, 老闆罵我地成班女同事, 又話人地上黎係攪公司電腦的嘢, 唔是幫你地搬傢俬, 真是激死人 . . . 人地好心幫我地, 點知就要俾佢罵。之後個男仔都又話繼續幫我地搬, but 我地拒絶了, 因為我地同個男仔講如果你再幫我地搬的話, 我地會挨罵的, 最後個男仔没有幫我們, 我們繼續搬傢俬。

7. designer (iris) 搬運途中, 弄損手指, 而且還流血, 老闆連一句慰問都没有。我地同佢咁賣命做咩。

8. 不搬晒 d 傢俬去新 office 就不可以下班, 此刻我們有 10萬個哭。之後老闆講左句 "每個同事個位都未劃好, 可能要等兩個小時先整好, 大家無理由等咁耐, 大家都想收工的, 咁大家整好晒所有的嘢先好走啦", 佢講這句說話個時, 己經是在晚上的 7:30分, 等 2小時, 不要開玩笑啦, 搬左成日咁累, 仲要唔肯早 d 放人回家休息。之後成班女同事過左 05室休息, 有的坐在紙皮箱, 有的坐在板車上, 此刻的情景真的好像一班女班 "菇 le" 在地盤中休息, 真是好想拍下此刻的情景, 但奈何手機没有電, 所以相也影不成了。

今日搬了這麼多的大型傢俬, 手臂都有可能變老鼠仔出黎, 另一個情況就是練到一身肌肉出來, 我才不要耶 ~ 搬到 8點幾, 我己經超累, 還是早點回去吧!!!

臨訓前搽了點安美露, 點知上到床, 隻手痛到訓唔到覺, 在床上左搖右擺的, 希望擺一個 post 令隻手没有咁痛, 輾轉了很久, 最後睡著了。

老闆原定今日下午搬回去己裝修好的 office, 所以老闆早上好似小玉爸爸咁, 不停係咁同人影相

(而且仲是要高角度影落黎), 我開頭不知道的, 因為我專心打我的文件, 突然 designer 維珍話仲咩

影我地？我當場傻眼, 佢同 designer 影完之後, 就過黎同我兩個阿姐 + 我影相, 佢叫我地做嘢

唔駛理佢, 之後過幾張就話要望鏡頭影相, 影完之後, 我在想 "不知道老闆影完呢 d 相會唔會 post

係個 board 度呢？"

到下午老闆又決定不搬回去, 留待明日下午才搬, 真是讓人摸不著頭腦。

又是時候補追日記啦 . . . 因為最近無線播的劇集都很好看, 所以就少上來寫日記了

今日整天在家, 看韓劇 "魔女幼希", 這套韓劇很好看, 每睇完一集就想追睇第二集, 由今朝睇到晚上, total 睇左 8集, hehe . . . 追劇速度勁人的 (在自豪中 . . . )

今晚睇了無線的日劇 "交響情人夢", 因為我記得 ndsl 有這隻 game 的關係, 所以就很注意這套劇集的播出時間, 覺得這套日劇都不錯, 要密切留意下集的播出的時間了。

臨訓前, 打左一陣太鼓之逹人。

今日不用上班, 真是太好了 ~

這個星期六和日也没有約人外出, 好想待在家裡, 享受這個假期 ~

公司個阿姐話我肥, 而且今日同 cher (台灣舊同事) msn 傾開, 昨天哪件 esprit 的連身裙唔啱著事件, cher 叫我拿左返黎屋企先, 等減完肥再著, 我真是無諗過咁都得, 覺得超攪笑的 ~ 看回前排影的相, 真是肥了很多, 塊臉勁飽。公司 d 阿姐真是無講錯, 個個人入到去呢間公司做, 都會肥好多, oh ~ 我不要哦 . . . 睇黎要努力減肥, 多 d swimming。如果唔係前排買落的背心, 新年實唔啱著, oh ~

新年我還要同人頭獅身影返輯攪笑相嫁嘛 . . . 如果這樣肥下去的話, 後果實不堪設想的   

今日早上在公司樓下撞到 sandy (merchandiser 同事), 佢話今日阿 sam (merchandiser 同事) last day, lunch 會同佢一齊食, 問我會唔會 join 佢地一齊食飯, 於是我答應了。

回到公司, sandy 記己經掛了一號風球, yeah . . .太好了, 我話如果下午 3點幾掛埋 8號就正啦 . . . 跟住俾出街做嘢的阿嬸小英話我太妄想啦 . . . 邊有咁快掛 8號, 3號都未掛, 就掛 8號, 我當然話如果佢今日唔掛 8號, 我地就蝕左, 因為我同佢明天都不用上班, 如果明天才掛 8號, 我地好唔抵, 我一路在祈求下午一定要掛 8號呀！

lunch 前, 我見 iris (designer同事) 著個條連身裙 + 牛仔褲著得好好睇, 我對她說這條連身裙好靚呀！係唔係公司 d 版黎嫁, 佢話是 esprit d 衫黎嫁, 條裙真是好靚嫁 . . . 跟住坐在我旁邊的另外兩個 designer 又話要, 叫佢整多幾條俾我地, iris 話只剩一條, oh ~ 我問 iris 有無碼？佢話得 36碼, oh ~ 實唔啱著, 但條連身裙會影得人瘦 d, 同埋佢真是好靚嫁 (仍在發夢中) - 隔了一會, 她找了同一款但是另一隻色的裙, shipping 個阿姐都想要, 我話你咁瘦, 實著到, 羡慕 ing ~ 接著小英就話 阿 wing, 你無咁的身型, 著唔落條裙嫁啦 . . . 我知我肥, 但也不用提醒我的, 一片擾攘中, 另外兩個 designer 還不忘提醒 iris 拿多兩條連身裙給她們。

lunch啦 . . .同 sandy, 阿 sam, peggy, kiki, angel 一齊落樓下食飯, 差不多兩點, sandy 媽媽打俾佢話天文台宣佈下午 3:30會掛8號, yeah ~ 超開心, 我地就拿拿臨回公司, 我回到公司對 designer 同阿姐講, 下午 3:30 會掛 8 號風球, 成班公司 d 同事個個都超興奮, 没有心情工作, 公司的噪音己經很嘈, 布行打黎俾 designer, 布行問 designer "你地公司是不是在開 party, 咁鬼嘈的", haha ~ 呢間就是我地公司啦 . . . 到 2:30 老闆都未叫我地走, 之後 sandy 好大聲講 天文台己宣佈掛 8號了, 跟住所以同事又起哄, 老闆話未見過我地成班人咁齊心, 於是老闆講了 d 很白痴的說話 "大家認為出面安全的話, 就走啦 . . . 如果大家認為公司安全過外面就唔好走啦, 好好待在公司", 没有人理會他, 而我同 designer, sandy 是第一對人馬離開公司的。

回到家己經 4點幾了, 休息了一會, 就去訓覺, 訓到 8點, 休息一會, 就食飯了。

明天不用上班 + 今日休息半天, 我 total 可以休息兩天半, 真是體驗到這間公司的好處。

覺得個 shipping 阿姐對我好左 ~ 事緣 - lunch 前, 運輸陳小姐拿了 12條裙過來公司, 是我們其中一個客人走貨時, 工廠放少了 12件落箱, 工廠同事交左給運輸, 叫運輸司機將 12條裙放落紙箱, 但司機不知是哪箱, 所以打電話來問我們, 而工廠 shipping 個同事都唔知呢件事, 所以變左無預呢 12條的 licence 證, 所以這 12條裙走不了。而我們亦可拿這些裙回家。

shipping 阿姐一接到 d 裙, 就看看有什麼碼？因為這些都是童裝裙, 但是我們都可以著得落, 當個阿姐一放低 d 裙, 好多人就過黎搶裙, 我也再看看有没有我的 size, 但没有大碼了, 於是個阿姐就叫個會計阿姐睇下揾唔揾到大碼？個 shipping 阿姐同其他同事講, 俾件大碼阿 wing 啦 . . . d 人都無理, 掛住找自己個 size, 跟住 shipping 阿姐話你著中碼都有大啦 . . . 不如拿條中碼試下先, 佢就幫我拿左一條中碼, 之後去到洗手間, peggy 在試緊哪條裙, 佢拿了中碼和大碼, 最後佢覺得大碼有點鬆, 所以就俾左條大碼俾我了, 而 peggy 就要左中碼 . . .

這條裙的長度是可以及膝, 宜家呢 d 裙好難揾, 而且仲是要黑色, 影得個人瘦 d, 唔錯唔錯 . . . hehe ~ 終於睇會到呢間公司的好處, 就是可以拿 d 衫回家。

但是個會計阿姐仍然不太鐘意我 . . . 但有個阿姐己經對我改變態度己經算好好了。

昨晚用完 laneige 的 water sleeping pack plus, 覺得今朝早起身, d 皮膚滑左, good ~

今晚仍在用 water sleeping pack plus

今日下很大雨, 中午因為我同 peggy 都要去銀行入票, 所以我地一齊去左觀塘廣場食車仔麵, 食完嘢後我就去左買零食, 而 peggy 就去幫我阿姐 connie 去 m 記買粟米。

晚上 8點下班, 落好大雨, 阿爸黎車我。

今晚開始用幾位姐妹送俾我的生日禮物 "laneige 的 water sleeping pack plus", 敷完每日充電 mask 後, 再塗 lotin, 開始塗 sleeping pack 落塊臉上, 覺得涼浸浸, 但唔知點解塗完個 sleeping pack 後, 覺得有少少拿, 過左一陣就無拿了, 可能剛剛做完去角質, 所以先覺得有少少拿掛 ~

仍在努力追寫日記中 . . . .

今日約左阿大和阿六早上去 swimming, but 阿大唔舒服, 所以最後由佢細細妹頂上同我地一齊去 swimming。

游完水, 就同阿六去旺角 shopping, 我們出去太子食完嘢, 就開始逛花園街, 接著就去了旺中買爸爸, 我同阿六都有斬獲, 之後就過埋兆萬, 我還買到一條連身裙, 真是太好了 ~

最後過埋信和拿之前訂的相片 (元暢黎香港時的照片), 就回家了。今天真的很累 ~

今日約左個幼稚園 + 小學 + 中學同學 carmen 出黎食飯, 因為carmen 最近畢業, 之前在 msn 和她傾開先知佢揾到嘢做, 而且還找到中學老師的工作, 真替她開心。其實我聽到佢找到老師的工作, 真的有點 "惡" 言, 因為她没有讀過師範, 就可以當老師了, 而且還是中學老師耶 ~ 因為一直覺得當老師, 一定要去讀師範, 哈哈 . . . 睇黎真是 out 左了 ~ 覺得有個朋友當中學老師, 自己也覺得很威 ~ hehe

因為 carmen 没有返工的衣服, 所以陪她去買衣服 for 上班用, 但由於她的 buget 有限, 所以都是買一些便宜, 但看上去很大體和斯文的衣服。

最後我和她都收穫豐富, 她買了2件衫 + 2條裙 + 1條褲 + 1 對鞋, 而我則買了 1條連身裙 + 2件背心 + 1件短外套 + 1 對鞋, 當然我們買到的衣服都很便宜, 所以才買這麼多, 否則的話, 我會大出血的。

晚上就去了大家樂試哪個 "冰果朱古力鐵板餐", 但對哪個朱古力噴泉有點失望, 原本以為真是會俾一個小型朱古力噴泉俾我地, 點知原來是弄好給我們的, but 個冰果朱古力都好好味

 

這個就是朱古力噴泉鐵板餐的 "冰果朱古力"