今日早上回到公司, 剛剛行到我個位, 個人未坐低, 個袋未仲放下, 大老闆就打直線叫我打電話俾細老闆, 當時我都心知不妙, 我估到是星期六晚同佢係上海打長途落黎俾我個件事有關, 真是俾我估中左, 佢責怪我, 但没駡我, 但佢的語氣同駡我没兩樣, 佢怪我點解唔星期五個晚將 d 文件俾佢簽, 份文件我是星期五晚 6點幾先收到, 收到後又要整一輪幾十張的文件入 bank, 個晚佢又叫我快 d 將死芒菓的文件弄好俾佢對, 因為死芒菓 d 貨趕著走24號的飛機。咁我緊是做左死芒菓的嘢先, 之後先攪份文件俾佢簽, 我趕好份死芒菓份文件, 都做到晚上 9點幾, 我諗住星期六, 老闆都會返工, 到時先弄文件給佢簽。點知佢星期六就没有返工, 文件要等佢出完 trip 先回來簽。佢電話中怪我未做晒d 嘢就收工, 我向佢講了一個大話, 我話份文件是我收工後, 先放在我的枱頭, 點知佢話佢星期五個晚夠好夜收工囉, 點解唔整埋出黎俾佢簽名, 都唔知佢是唔是聾嫁, 人地剛剛同佢講我放工後, 份文件先放在我枱頭。我没好氣地解釋 (為由用最簡單的字眼), "我個晚離開公司後, david 先將份文件放在我的枱頭", 佢今次終於聽明白了, 佢再重覆放工後, 佢又疑惑, 我覺得佢是唔信我囉 . . . 跟住佢又講, 我都叫你做好晒 d 嘢先好收工, 還怪我唔同佢 ot, ot得唔夠多, 佢痴線痴線痴線嫁 . . . 覺得人地唔同佢 ot 同晚上 11點 -12點就唔是一個好員工, 痴線痴線痴線嫁, 我都唔知點解以前可以同佢 ot 到晚晚 11-12點都覺得無問題, 我現在回想以前 ot 的日子, 覺得以前好蠢, 不過算啦 . . . 都過左去。

不過今日一返去未坐低, 就要我打長途電話上去俾佢責怪, 原本由一個開心放假 mood 回公司上班, 即刻變得很 down, 很不開心, 一早回來怪我没做晒 d 嘢就收工, 真是無咩心情, 覺得個日無事就不要煩我。

今晚繼續 ot, 但唔記得都 ot 到幾多點了   

今日好努力在家中編排澳門行的 schedule, 又上網 search 吓韓劇宮的拍攝場地, 因為睇完韓劇宫, 我真是好想去佢地去過的地方, 因為韓劇宮拍攝的的方, 地方真的很美, 我開頭看還以為他們去了外國地方拍, 但原來不是外國, 而是澳門, 所以今次去澳門, 我一定要去看看 . . . >"< 哈哈, 己經中晒韓毒 . . . 晚上10點幾終於做好份澳門 schedule 表, 太好了, 總共打了三頁紙

  

因為覺得前額陰很長, 於是決定去澳門前修一修。今日放工去九龍灣問小敏借張剪髮咭, 因為有這張咭, 洗剪吹只是 48元, 超抵, 於是約埋阿大一齊去剪髮。我 book 了今日下午 3點上去剪髮, 阿大差不多 2:45分先來到尖沙咀, 於是我們先去剪頭髮先, 今次我們選擇去嘉芙中心剪髮, 因為這間是全層, 應該會大過寶勒巷個間。而且之前幫我染 high light和剪頭髮的哪個髮型師也調左去嘉芙中心, 我覺得佢之前幫我剪的劉海幾好, 於是今次試下去嘉芙中心試試, 我不太喜歡寶勒巷哪間, 因為地方細, 又很迫, 仲要成日要調位。

上到去, 真的很大, 而且還有三間獨立房間, 好似 d office 經理室咁, 另一邊則有很多剪頭髮的地方, 而洗頭的地方也有獨立一間房, 超掂, 而且佢 d 椅子很舒服, 又唔駛調來調去, 感覺好多。今次剪頭髮也是揾之前幫我剪個頭髮的髮型師, 他嬲我和覺欣整埋焗油, 於是我和覺欣也有焗油。我同哪個髮型師講 "d陰唔好剪咁短", 唔知是我講得細聲 or 佢聽錯, 佢聽唔到 "唔好" 這兩個字, 只聽到 "剪短", oh my god . . . 剪完後, 我的劉海比想像中還要短, 我下次剪頭髮, 我都唔會再同個髮型師講 "唔好剪咁短", 費時到時佢地聽唔到 "唔好" 這兩個字, 只聽到 "短", 我就死得了, 不過後來我話 d 劉海怪怪的, 問佢可唔可以加多d陰, 跟住佢再幫我執過, 最後都見得人囉 (但劉海還是很短) . . .  

而阿大呢 . . . 佢話佢覺得佢個髮型師好似剪草咁, 剪得咁快, 阿大剪得多個我, 但用的時間還要比我少, 我只剪了劉海這個部份, 但我覺得剪了很久, 還要俾阿大剪得久, 所以我覺得幫我剪髮的哪個髮型師很用心幫我剪

焗完油, 洗頭的時候, 我的髮型師問我 "你地一陣去旺角呀？", 咁到俾佢聽到我同阿大的對話 (但他人不在我們附近做緊嘢, 我都唔知點解會聽到), 他真的很八耶, 咁到俾佢八到, 真攪笑 . . . 之後仲話記得之前無幫我剪得咁碎咁短 (心諗你有無咁勁呀！你記得之前幫我剪成點, 我之前揾佢幫我剪也是在一月份的事情, 隔了這麼久,我就不太信你會記得我曾是你的客人囉), 我話我之前俾佢剪也是這個長度, 之後長了很多, 就是就剪短, 剪短後就變成咁, 之後佢叫我留長 d, 會好 d, d 頭髮就唔會 "q"。

到走個時, 阿大的髮型師好攪笑, 佢幫我地拿完褸後, 佢就問邊件褸是阿大, 仲話幫阿大著埋呢件褸 (講此話時, 她的髮型師同時己經打開阿大件褸, 讓阿大穿隻手落去, 超攪笑), 估唔到呢個髮型師咁攪笑, d 服務態度咁好, 勁勁勁!!!

之後就同阿大落旺角食嘢和行街, 行到差不多 8點, 就各自回家了 . . . 哈哈, 今日是和阿大兩個人的約會哦 . . .

今晚 10:20份收到老闆從上海打來的電話, 我竟然想像不到點解可以咁樣, 佢今晚坐夜機到上海, 到逹上海就即刻打俾我, 問埋我 d 無聊嘢, 佢問我收到廠寄來的提單未？我無奈回答 "收到了", 之後佢好快就 cut 我線, 真是讓我傻眼耶

p.s. 我和阿大剪完後, 一致也認為嘉芙是好過寶勒巷, 下次也會到嘉芙弄頭了, 呵呵 

今日lunch 時逛萬寧, 俾我看見了這一包青 bb 的 m&m's, 我對這包 m&m's 感到很好奇, 想知道佢是什麼味道, 於是便買來試一下。這一包青 bb 的 m&m's 招紙袋寫著限量版, 真是值得買來一試, 味道很好, 是薄荷味來的, 可能我個人喜歡食薄荷味道的東西, 所以我覺得這包 m&m's也不錯。

今日同阿五和阿六提前慶祝生日, 我地今晚放工後, 到九龍城黃珍珍食泰國菜。放工, 我先到彩虹還返 d 碟俾個 fd, 之後就等埋小敏一齊去樂富再轉巴士到九龍城。今日大家也聊得很開心, 話提一度笑爆。這間 d 泰國菜很好味, 除了這間泰國菜, 我還見到又很多其他泰國餐廳, 我們下次也可以試試其他泰國餐廳。 

今日約了阿大, 阿三和阿六去大美篤踏單車。早上9點幾和媽媽落樓下食完早餐, 買完餸, 看了一集台劇, 就出去大埔墟火車站 join 佢地。我們約了12點在大埔等, 但阿三和阿六没有食嘢, 所以她們就去了大家樂食了點東西, 才出發去大美篤。

今次也是去旺記租單車, 租完單車, 我們就跟向回大埔火車站的方向, 而不是踩向提壩, 踏了一會兒, 我就發生了意外, 我前面有一輛家庭單車, 佢又開得慢, 而迎面而來又有一架單車, 條路根本没有位插多一架單車, 於是我為了避開這些單車, 就駛上行人路, 點知衝上石 "薄" 的一刻, 成架車失事, 連人帶車倒在地上, 這次是我有生以來踏單車而發生的意外, 即使我學踏單車時, 我也没有跌過在地上, 今次真的跌得很嚴重, 手掌留血, 兩腳膝頭哥都瘀了一大片, 行路很痛, 休息了一會兒, 我們踩向租單車的方向, 再休息一會兒, 覺得情況也 ok, 於是向提壩出發。

今次在提壩也遇見 "我真的受傷了" 哪個男人, 他還是和以前一樣, 一點也没有變, 我想每個來過提壩踩單車的朋友們, 也一定認識他。我們來回踩了提壩一次, 最後趕著 6點交車, 我們在提壩的另一方衝返來交車, 超攪笑。

到晚上, 她們陪我去西田買枕頭, 因為一直睡開的哪個不舒服, 害我頸痛了很久, 決定買一個新的。買完就去元綠食飯, 由於我今日只食了一個早餐, 而且今日消耗了咁多體力, 所以勁肚餓, 好似餓鬼投胎一樣, 不斷食嘢。最後就和小敏一齊搭巴士回家。 

今日放工去了尖沙咀逛, 在一個唔記商場叫咩名的地方買了一個對我來講很貴的袋, 因為這個袋真的很實用, 可以側 "咩" 和 斜 "咩", 而且仲很大個, 去旅行又啱用, 游水又啱用, 背在身上真的很漂亮, 於是最後決定買這個袋, 一生人最毫也是這一次。買了一個貴 bag bag 就決定放棄買 boot 啦, 用boot來換袋, 呢個就是經濟學的機會成本啦 . . . hoho, 算啦 . . . 反正在公司抑壓了這麼久, 就當是自己奬勵自己的聖誕節禮物囉 . . .merry christmas, yeah . . .

一直想買一對 boot, 阿六話尖沙咀有一間買鞋的有 40號 boot, 於是今晚就約了阿六和阿三去尖沙咀睇鞋。放工去到尖沙咀, 我們首先找地方醫肚, 點知去左一間黑店, 超唔掂, 呢間餐廳勁唔得, 最衰唔得間餐廳叫咩名, 佢食泰國越南嘢, 又貴又唔抵食, 以前都唔去呢間餐廳食嘢。

食完飯, 就逛街街了, 點知去到鞋店, 試過 40號的 boot, 也是覺得著得不舒服, 於是就去其他地方揾 boot, 之後阿六家姐放工, 於是 join 埋我地一齊行街街, 哈哈 . . . 今次是第一次同小敏家姐一齊行街。

逛了行久, 還是找不到合適的 boot, 只是買了一對耳環, 10點半, 大家就各自回家了。

今日約了阿大, 阿三和阿六去唱k, 其實今次約她們出來, 我主要是想買 boot, 但都睇唔啱, 睇啱的又著唔落, 都是算啦 . . . 我隻腳好難買鞋的, 順其自然吧!!!

唱完 k, 就和她們去銀行中心中旅社買澳門 package, 點知個日最早的船票得早上 7點半和下午2點15分, 於是我們只好選了早上7點半的船票。哈哈, 訂好酒店, 一切都 firm 實, 實在太好了, 好奇待我們的旅程哦 . . .

之後逛了一會兒家樂, 就去大快活食tea, 食完後, 我就閃人了, 因為媽媽急召我回家, 想買的嘢買唔到, 只好等下次再約你們出來買吧!!!

我好想好想好想快d買到個大 bag bag, 咁樣就可以去游水了, 哈哈, 我諗住去冬泳, yeah . . . 游水游水, 健康健康, 阿大和阿三都有興趣和我一齊去冬游, 等我買到大 bag 就拉大隊去游水, 呵呵, 奇待奇待 . . .

因為公司現在的單做買單, 唔做托收的關係, 所以銀行會幫我地 check 單。銀行 check 到我們的單出現問題, 個兩份單都是我做的, 其實套單是無問題, 只是銀行無中生有, 覺得有問題。於是老闆叫我今日返工前先到旺角滙豐銀行處理套單, 其實今次上去只是要我在正本提單上了返隻龜 (簽名), 難得出街做嘢, 所以今日可以遲d 出門口, 超開心的。

早上在 m 記食完早餐, 在太子下車, 先經花園街, hehe, 逛了一會兒花園街, 再經旺角中心, 再到滙豐銀行。處理好後, 回到公司才10點 17分, 可始努力工作。

因為最近真的很多嘢做, 所以今日逃不過要 ot 的日子。lunch 同 fanny落左apm food court 食飯, 因為公司數, 所以 fanny 話可以食貴 d, 哈哈, 我們就點了一個梨花園的 "石頭雞肉飯" 和 "人蔘雞湯麵", 食完 lunch 就繼續努力 ot, o 到 4點半就閃人, 因為老闆再房煲煙, d 煙味實在好難頂, 頂唔順了, 只好關機走人, 星期一再繼續努力吧!!!

今日 ot 到晚上 8點, 趕著把文件給老闆簽名, 因為佢又要出 trip 的關係, 所以今晚努力加班趕起文件。

媽媽中午12點幾先上到來樟木頭, 之後我們三個人就出去食 lunch, 行逛的途中, 我見到有一間 <鼎泰豐>, 見到佢個 menu 食物d 賣相都幾好, 媽媽就話去試下。這間餐廳d裝修都幾靚, 但佢一d都唔平, 我地點了一籠小籠包, 香醉花枝, 紅燒牛肉麵, 小碗的陽春麵, 竹筒飯 (很細碗), 唔記得咩排骨, 這一餐就 141元, 都算貴。之後同媽媽逛了一陣超市, 就回家看電影, 買了一套 <鬼來電> 的日本電影, 套電影都幾恐怖。下午5點半, 我就去大家樂食點東西再回香港, 我買了7點搭大巴的車飛回羅湖, 之後就自己一個人搭大巴回羅湖。過關的時候, 我拿著回鄉証排了自動過關的龍尾, 排排下先發現, 之後又再排返有職員檢查的龍尾, 我真是認真烏龍。好彩回到家到是 9點半, 還趕得切睇 <一公升的眼淚>, 睇完 <一公升的眼淚>, 和朋友聊了一會兒的電話後, 就去沖涼訓覺。    

今日早上回到公司, 就入左老闆房俾老闆罵了一頓。因為銀行又話我做錯單, 害老闆遲收百幾萬港元, 老闆遲收錢, 仲唔俾佢罵咩, 今次百幾萬都俾佢罵成咁, 大單的話, 我實死硬。每日在公司的日子己經越來越難過, 只是不斷告訴自己, 三個月後, 有一條好漢, 忍多三個月啦 . . . 當是考驗自己的忍耐力。其實我在想, 今日俾佢罵都好的, 因為今日是半日, 唔是全日, 如果全日, 我的心情仲會更 down, 日子仲會更難過, 罵都是半日而己, 之後就放假啦, 忍忍忍。

因為之前屈屈埋埋, 己經好唔開心, 弟弟咁啱這個星期六至一有假期, 於是我和他回了樟木頭渡假, 唔開心的心情咩都走晒。下午2點半同弟弟上到深圳, 首先去買火車票, 點知4點半先有火車, 於是我和他上了火車站上面的味千拉麵食d嘢, 坐到 4點, 就買單行落去上火車。

到了樟木頭, 弟弟首先去買 game 碟和一些電影回家, 因為無咩台劇和韓劇想買, 所以只買了 <寶貝計劃>這套電影回家看。晚上9點幾, 先再和弟弟去大家樂食飯, 食完飯, 我去salon 洗頭, 洗完頭回到家己經 11點幾, 沖完涼, 就和弟弟一齊看 <寶貝計劃, 看到 2點幾, 就回房睡覺了。

最近真的很忙, 加上心情不是太好, 很久没有上來寫日記了, 太耐無寫日記, 想補追日記, 又唔記得想寫咩, 只好將最近發生的事總括來寫吧。最近因為公司的事, 令我好唔開心, 被阿頭激到爆, 氣到爆, 我唔明點解佢可以做一份好簡單的工作會做成咁, 打裝箱單, 佢全部將我 set 好的公式 delete 晒, 害我花了很多時間, 重新做過, 花了很多時間在不必要的地方。其次10幾款 order no要打晒在同一張 invoice裡面, 佢竟然同我打一款 order no 上去, 只好我同佢再執過張 invoice。除些之外, 老闆也為我帶來很多不開心的事, 佢成日吹我做好d嘢俾佢, 當銀行 check 都有問題, 就賴我做錯, 累佢遲收錢, 又不想想要人趕起俾佢, 一定唔夠時間 check d 文件, d文件又唔是小過人, 每一套文件都有幾 10張 paper, 又要人即日趕起俾佢, 點夠時間呀？你估我好得閒呀！我除左這些工作外, 每日都要對好多份提單, co, 又要打好多裝箱單, d 嘢多到做唔晒。當一放工的時候, 即是踏正 6:30, 阿頭己經閞好機, 整妝待發, 準備閃人, 得返我自己一個繼續工作。

這份工真的讓我獲益良多, 而且還考驗我很多事, 考驗我的忍耐力, eq, 冷靜程度, 做嘢的速度, 食死貓俾人屈, 都要照食, 只可以沉默考寡言, 任怒任怨, 仲要挨得罵得, 即使氣到爆, 激到爆, 都要忍, 氣多幾次, 激多幾次, 下次的容氣量就會變大, 但是有一項我紿終學唔好, 就是忍淚水, 我俾老闆罵一罵, 我眼睛很快就紅, 淚水就不斷湧出, 我是一個眼淺的人, 唔挨得罵, 否則淚水就會好易湧出, 這一項真的有待繼續考驗。 

今日要回醫院覆診, 所以請了一天病假 . . .

早上先陪媽媽去樂富吉之島逛, 因為媽媽要去吉之島買一些禮物送給她的朋友, 所以陪她去選禮物。逛到上午 11點幾, 就回家食午飯。

食完飯, 就去醫院覆診了。下午 2:30見醫生, 醫生睇完我隻腳的情況後, 我就問醫生 "印" 帶斷了自己會唔會生返出黎, 醫生話一d一d, 醫生接著問我 "你印帶斷左 or 是你 d 朋友呢？, 我話是爸爸啦 . . . 醫生叫我爸爸要儘快來醫院 check check。今次是最後一次覆診, 所以醫生 close 左我的 file, 我再不用黎醫院了。

因為我隻膝頭間唔中會痛, 所以醫生俾了一些藥膏我搽。見完醫生, 就去等拿藥, 足足等了一小時才會到藥膏, 當我見到藥膏覺得好抵呀！ 10元藥費有兩枝喜療妥藥膏, 真的超抵。

原本諗住睇完醫生, 出旺角逛, 但睇完醫生 + 等埋拿藥都 4點幾, 出到去旺角又行得唔耐, 又要趕返屋企食飯 (屋企的食飯時間是 7點), 最後還是打消去旺角的念頭, 只是在又一城逛了一會兒便回家了。