俾pp貼~今次係我最想既五樣野:

1. 身心健康 (拎錢去見醫生, 可免則免)
2. 同阿權有美好既將來, 生活無憂無慮
3. 同身邊既人有聯繫, 至少要俾我感覺到佢地既存在
4. 唔單止要坐飛機周圍去, 仲想親身飛上天空 (坐降落傘/笨豬跳都唔算數)
5. 做一個有用既人 (連自給自足都做唔到我會覺得自己好冇炭用)

俾阿las貼~係夢中情人:

呢排冇咩特別事發生, 不過有d事都值得講下既...

1) 自從起新聞睇到老人家起尖咀排隊輪米既狼狽場景後, 我對輪平安米既印象截然變得好差, 之前都有諗過到老果陣唔使錢輪到米係好事, 但係睇過單新聞後, 我覺得佢地排隊既情形好恐怖呀, 而且連局外人都死埋

我諗到老果陣無論窮到咩情況都唔會咁樣排隊拎米既, 正如媽子話齋, 人未輪到米已經唔平安喇...

2) 同阿權打過兩次乒乓波, 大家既技術都有所提升, 仲要巧遇隔離場個教練打左十幾廿個好好打既波過我地場 (好打過我果兩個n倍呀, 我果個彈力唔夠呀~P.S. 唔好心邪, 我講緊既係d乒乓波 ) 跟住到個教練打完波後, 奇怪咁問個學生: 「點解d波少左咁多既?」於是我掃返d波過俾佢地之餘, 自己仲拾返三個, 佢地絕對係神不知鬼不覺架, 因為個教練實在帶太多波黎喇

3) 同阿權起稼軒(起海柏)飲下午茶, 我算係果樹既常客, 今次第一次帶阿權去, d野係好食, 我次次去親都會叫柚皮黎食, 消滯嘛~正呀!!  

4) 買左條Tiffany短裙, 間唔中會著下, 本來想買對高筒cons鞋黎遮對肥腳, 不過著出黎又冇我想像中咁難睇, 於是打消左買鞋既念頭, 多個錢傍身黎買冬天衫都好

5) 都係早排衰, 唔知點解可以因為小小野而嬲一大餐, 搞到爆瘡喇, 係咪衰呢~真係睇唔順眼

6) las姐黎學琴, 媽子整左排骨菜飯招呼做晚飯

7) 出左第三學期既時間表~最遲放學既時間都係4:30~同埋夾到時間同candy同vivian食飯~太好喇~遲下睇下其他人點啦

23/8  (二)

舅父琴晚返黎, 今日就同我同媽子起海港飲下午茶~之後就去馬鞍山圖書館還書~衰過左兩日期唔記得續借要迫住還, 奉獻左3蚊俾圖書館...之後去對面運動館book下星期一打乒乓波~

但之後, 唔知點解個心up住up住, 咩野野都睇到好灰, 連話都唔想講多句~甚至有大發雷霆既衝動...不過大家放心啦, 我唔會亂黎既~

但我好肯定咁講句~我個人情緒唔算穩定~係d今日對住你嘻嘻笑聽日可能會乸口乸面既人...只不過既行為比以前較為理智

個人情緒比其他野難控制, 望大家彼此體諒及施予關懷~咁樣大家既心靈都會滿足

25/8  (四)

今日約左阿權起大圍火車站等~又去尖金打機呀~今日有衝動想著件puma背心~但就咁著完先發覺件野太暴露, 因為個口真係開得低左d...同埋係人都知我上面既斤兩架啦

所以就算阿權起我隔黎行~我都有d驚驚地...下次一定唔敢就咁著呢件野出黎

唔講肺話喇~落到紅磡同阿權去ok買豆腐雪糕食

之後落到金星~夾埋打左3舖新卡dm, 24隻歌-而家449喇~個人覺得單以lv50以下既歌仔去到600有小小困難~唯有小心揀擇  我打panasonic youth都係得個A, 睇黎adv歌都不容輕視...

舊卡方面冇進展~最enjoy係玩第5同第8代~第8代波乘1 miss, 桃色連左7xx combo, 連candy星都差d s埋

第5代首feel the earth真係過癮~carnival又好聽~首riff riff paradise幾有趣, 但好難打~死左囉

睇住阿權打左成年鼓~佢既進步真係比我快~淨係首bobby sue都令我佩服~惜未能夠睇佢打最好表現果次

夜晚起中港城食飯~順便睇「小時候」~之後我地都過得好開心呀

11點去到紅磡火車站附近間小食店買左串生腸食~好耐都冇食生腸喇~最鍾意佢夠爽口~到而家我仲好想食多幾串

18/8  (四)

下晝五點同阿權起馬鞍山運動館度打乒乓波, 都有幾個月冇同佢切磋下d球技喇~我成日都打去斜角線, 搞到佢好難接...仲有好幾次打去死角位~雖然我地打得一粒鐘, 但佢話佢雙腳已經好攰~等我下次俾多d特訓你先

不過我打親乒乓波都係咁~有怪莫怪喇~搞到自己打波好似成日整蠱人咁...要靠你教我改下d姿勢先得喇

打到6點就起運動館度坐一陣~我附近呢間運動館開左冇耐環境好嘛~因為6:50先有免費巴出沙田

去撘車之前就起「卡蛙兒」出面扭左個人體解剖扭蛋~早兩日扭左個心臟, 今次就連個人體都扭埋出黎

之後起沙田鴻運茶餐廳食晚飯~阿權要左個粉絲肥牛煲而我就要左個是日常餐 (有忌廉湯, 燒雞翼, 魚柳飯同餐飲)

跟住走去無線打機~玩下張新卡, 玩多兩舖有12首歌~而家22x分喇~full左desert rose

而舊卡都有兩分進貢~mushroom boy加左1% (到而家都未full過 )

ancient breeze竟然爆冷拎s, 可惜到中間休息位果陣甩左粒紅野~搞到得75%, 仲係唔計分 (之前我打前面斷手位果陣係咁食good)

而no more crying多左perfect, 加到69%~midnight special72%喇, 第一次s

打完機去米奇店睇衫睇鞋~d 米奇衫又真係幾靚, 最鍾意d背心~d公仔好cute呀 -3-

之後就撘巴士返歸喇

19/8  (五)

今日發覺d免費車票冇哂, 於是落街市間藥房度問個老細拎幾張~去到果陣見到佢同個菲傭找緊數, 跟住佢見到我, 我未開聲佢就好醒水咁拎左幾張車票俾我, 咁我問佢: 「你點知架?」 佢就話: 「我梗係知啦, 你除左呢樣野仲有咩野丫, 靚女?」真係女大十八變, 想當年我小五小六果陣佢仲係叫我肥妹前肥妹後  

上到商場行去車站撘車仲先後撞到兩個中學同學

約左candy12點起灣仔地鐵站等~今次到我遲添, 唔好意思

我地去左綠野仙踪食晏~我個燒汁雞翼飯等左勁耐, 餓到肚痛喇...不過好好味呀~仲有成5隻雞翼添

之後去會展睇香港魔術, d大型表演比我預期中少~得一個大stage做咋, 仲要迫爆人, 我地想塞個靚位都唔得

所以我地都係集中去下eddy主辦既攤位睇變魔術示範~當然可以買野返去玩啦, 起會展開場邊有一個機構係唔以賺錢為目的架?! 仲有d魔術表演既, 如果我地另外買飛就有得親身體驗人地既魔術係點玩既~例如: 將我入落個箱度睇住我俾人一開二既魔術果隻

其中有個做小至魔術表演既靚女好pro, 佢成日笑笑口之餘~見到人影佢相佢就會定哂鏡咁俾你影~魅力四射呀~比起要參選既魔術美少女, 佢好明顯係鶴立雞群

之後同candy行去銅鑼灣, 佢話集成有間雪糕店有特別味既雪糕食, 有飯味有咖哩味有南瓜味...可惜大家果陣都飽飽地, 如果唔係就可以買杯黎食~不過我試食左南瓜同朱古力味~唔錯呀~起集成撞到個中學同學, 今日已經撞到第3個中學同學喇~原來佢起集成返工

跟住同candy行左一陣就走喇~有朋友約左佢起奧海城食晚飯, 而我就返歸喇

22/8  (一)

今日為左去觀塘開源道d鞋倉, 就約左阿權起果頭食晏~我地去左pizza hut食晏~好好味呀, 有湯有pizza有通粉有野飲~正呀

之後去鞋倉~雖然個倉有衫有鞋有鬼怪野賣有小食賣, 有成13層, 但大部份既野我地都睇唔上眼~有d cons鞋同埋Bape衫都係似流貨~見到對白色cons鞋就唔開胃, 話就話係$99, 但係對白鞋見到一粒粒野, 好明顯係粗糙, 後面個all star logo仲要比堅野既闊, 一個字講哂:怪!! 地下賣既Bape tee仲出奇, 60蚊就有一件, 信佢既係真野貨色至奇!! 仲有Supreme既logo tee唔使100蚊件, 我地見到真係嚇死...

當然, 個倉有少部分既係真野黎既...同埋有時去某d角落都聞到陣怪味, 一聞到就想走, 以後打死都唔會再去果樹...冇錢既我寧願唔買, 一買就要買d真材實料既野~我地不嬲都係咁既

之後行左陣apm, 睇下個tofu展覽影下相~行一陣就去金莎打機, 阿權打左一舖話部鼓唔係咁好打~於是我地就走去德福vz, 我想去既目的係想玩happy sky, 點知去到都係得個睇字, 玩親既人都咁x勁~試問我點敢獻醜呢?

跟住一人起附近街口間日本店買左個手卷食~再同阿權起淘大商場買exam同起集郵店睇下d珍藏, 跟住都撘車返歸lu

13/8  (六)

平時好日都唔生暗瘡既~點解今日個鼻同下巴多左幾粒酒米, 個鼻生得好顯眼~damn it!! 今日同今晚仲要見人架~難睇死喇

下晝落無線搵阿權~大家都可以享受隻flow喇

再玩day dream, 我地都過唔到隻adv, 阿權試下用auto cymbol黎玩ext, 都衰左~再合體打ext, 又死...真係好難玩呀

之後4點起新城市7樓CD Warehouse有Beyond既簽名會~就同阿權上去睇下, 希望有機會見到佢地既真面目

上面好x多人呀, book左佢地半粒鐘都睇唔清楚佢地, 阿權果陣又肚餓, 就落去聖安娜去買d買三送三既蛋撻黎醫下肚先~到左差唔多五點半上返去, beyond佢地之後都走喇, 成班fans一鍋蜂咁跟住beyond行, 係咁嗌同影佢地相~可惜我冇機會借到個好位影佢地近鏡, 於是之後入去Warehouse影佢地張poster就算喇

夜晚就單拖落新之城搵KM家族~今日慶祝阿芝星期四生日~去左倫敦大酒樓打邊爐, 睇勻成圍人得我一個落得最多辣椒仔落豉油度, 搞到我真係好似好食得辣咁

d野食都ok既, 但每次都等得幾耐~而且一早就冇芝士腸食

打完邊爐我就同爹爹撘馬鐵返歸~大家都攰喇

14/8  (日)

真係發到唔發, 個鼻側邊又多左兩粒酒米, 一時忍唔住做完facial就自己起度按酒米, 個鼻d黑頭多到阿媽都唔知姓乜~按到d位紅哂, 仲肉酸過琴日, 點出街見人呀...

下晝阿las打黎話學琴, 我話我塊面整到好肉酸, 佢唔介意就黎喇~學完之後我同媽子留左佢起樹食飯

為左令d傷口快d好, 我就撻埋d 深層清潔facial落d紅位度, 希望快d淡色

15/8  (一)

今日同阿權去無線打一陣機, 佢睇完我塊面都有少少嚇親...因為我d傷口真係太集中喇

其實我有諗過唔出黎, 因為我過唔到我自己果關~不過咁難得係迪士尼最後一晚放煙花, 唔想掃你興~再難睇d都要出黎喇...

之後過聯合玩左舖gf, 我再開張專打<lv50既adv咭~應承左阿權起我過900分後就開一張

跟住去金牌坊食野~經我精挑細選下 (要剔除d吉列雞扒, 豬扒果d煎炸野既選擇) 起小薯大廚叫左個芝士雞扒寬條麵食, 我好鍾意食寬麵架

估唔到阿權食得仲清淡過我, 佢要左個鮮茄牛肉飯

落左格就過奧海打一陣機~玩我好耐冇玩既km

之後就撘地鐵去欣澳轉米奇車去迪士尼~起車入面都影左好多相呀, 之後就入去噴水池附近霸個靚位去睇煙花lu~其實佢同普通節日放煙花冇分別, 只係起迪士尼觀賞煙花係別有一番風味~起果樹睇煙花比起咩咩文化中心呀, 維多利亞既環境好得多 

跟住起迪士尼影下相, 影既範圍好有限, 迪士尼未開幕嘛

之後起果樹搵阿權既鄰居, 過一陣就撘車走喇~迪士尼架車咁好坐, 就撘多一程囉 (我諗全世界得我地兩條友咁戅居 ) 撘到去奧海就同阿權一齊撘87A喇~跟住我去到新翠再轉車