23/7   (日)

琴晚成4點幾先訓, 今日點幾訓醒果陣d auntie已經黎左屋企同媽子打牌了

哈~咪咪訓到4點幾先起身添, 之後同佢傾左陣電話

夜晚例牌去海皇漁港搵位食飯

24/7   (一)

下晝3點第一次去琴行教琴, 好緊張...

黎到琴行果陣個學生已經黎左, 原來係個8歲仔黎~有baby fat, 好得意~好想搣佢塊面豬登呀, 哈哈

佢都幾乖幾聽話架~上左一堂半粒鐘就教左佢彈C同D音, 同埋認下d音符

原來佢係自己有興趣想學琴, 唔怪得咁乖啦 XD

25/7   (二)

晏晝約左阿權去九龍灣果邊打機, 我唔記得銀星點去, 索性約佢起德福出面等算啦

之後行返去銀星附近食野~聽佢話呢間野有蝴蝶腩食wor...當然我地d餓鬼第一餐要食飯醫肚

睇下張menu, 有一樣野食叫「豬開心」

之後起銀星打機, 晏少少就去買燒雞翼同手卷食~呢頭都幾多野食架

再行下淘大, 有隻miffy抱住隻miffyBB呀, 好QQ

之後去德福行下同埋入VZ, d機都幾貴 =.="

同阿權玩左舖筋肉擂台既足球機, 好難玩...

26/7   (三)

今日下晝約左laurie同candy佢地返學校影畢業相~月尾學生證到期, 於是我去圖書館print下我想print既野, 有print quota剩唔好徙嘛~print左我最期待既炸彈人攻略, 玩到咁上下唔睇攻略係好難爆到機的 

話就約好3點, 我撘2落黎都未有人到...打俾candy先知佢臨時去見工 =.=" 其他兩個係candy d朋友, 我同佢地唔太熟, 主角唔起樹, 唔搵佢地lu 

之後laurie黎左, 就同佢起學校附近周圍影相啦

過兩日再約佢, 佢話想帶埋佢隻愛犬LuiLui對住塊BU牌一齊影相wor, 見證佢既畢業時刻 XD

candy起公司見工大排長龍, 終於起5點幾見完工~不過我同laurie都要走lu, 行去撘巴士途中撞到佢, 借埋本IELTS書俾我就走lu

返去沙田就去許留山食龜苓膏~之後去恆聲拎部NDSL俾個師傅睇~因為我琴日入左內核程式好似update唔到, 佢試過都update唔到, 咁我留張EZ Flash IV同埋入面張miniSD俾佢交去原廠check下, 順便check下save檔既問題...

之後去西田買鐵板炒麵就返屋企煮黎食啦

琴晚睇完Touch! Bomberman Land既官方影片後, 就好有衝動咁想買呢隻game, 畫面吸引而且對打會好好玩, 仲有好多mini game俾你去爆添~去yahoo拍賣場間價, 得一個人放 (始終係新game都估到唔多人放架喇) , 賣$220...即係估計出面會貴多幾十蚊...

今日練完琴, 三點鐘就出去沙田恆星買呢隻game, 成$290呀...@_@"

之後坐80M去又一城行街, 諗住遲啲有得教琴, 想買啲斯文少少又可以著得出街見人既衫

去Log-on入面間OZOC, 買左件黑色花邊衫, 4折後為$92

之後去睇Roxy衫, Butter n Butter等等既boutique, 冇心水...就起呢個時候, 富寶間琴行打黎話星期一有個學生俾我教, 係初心女黎既, 7-8歲...咁快有野做真係好彩 原本星期一約左阿權出街, 而家要改星期二去喇

去完又一城就撘地鐵, 6點幾出到銅鑼灣~今日約左咪咪同嘉寶去書展, 咪咪下晝放左工要去做part time拼衫同做facial, 嘉寶傍晚要去教會聽talk, 所以成個下晝都係單拖行街 XD

去到銅鑼灣已經肚餓, 就起時代附近買串魚蛋同生腸食, 之後就行時代廣場, 果邊有石像展呀~主要係展示藝術

時代有OZOC~結果我又再起果樹買左件衫, 係一路我想要既款式~白色薄身+長長地身既低V花邊領既衫, 入面可以襯吊帶, 但呢件冇折~想搵返條輕身既bell黎襯呀

行完時代, 嘉寶差唔多聽完talk, 我知要就黎出發, 於是用埋僅餘既時間行埋Sogo~之前我同阿權都覺得7月尾呢個時候, Sogo全間百貨都有做減價既, 點知之前我打去Sogo問~果條女粉腸咁話: 「呢個月冇wor, 不嬲都係5月尾同11月尾架啦...」我係完全清楚哂就唔使問你啦...=.=" 卒之今日俾我搵到破綻!!

於是我行Sogo啦, 上到3樓~俾我見到啲好得意既衫, 係幾十年代果啲星星碼頭呀, 我愛黑玫瑰呀, 金龜婿等等既懷舊logo tee...於是我買左件公主logo tee~減左價為$198, 仲有個菊花牌鐵壺送 買呢類衫既係臨時檔口開一個月, 佢地間店其實起山頂凌宵閣

www.fincett.com

就係咁, 今日買NDS盒帶同3件衫...我個銀包有75%既錢唔見左...

行完Sogo就出發喇, 經過銅鑼灣廣場附近~就起軟硬天師既MC cafe影左佢個logo相

之後去灣仔地鐵站join阿咪咪, 聽佢之前電話既語氣係知佢有少少雞手鴨腳咁黎, 因為佢今日帶住個行李箱, 要裝衫係for今日下晝做兼職拼衫, 做埋facial之類既野已經黎唔切返屋企放低個箱, 唯有硬住頭皮直接黎

見到咪咪就去警署搵嘉寶~之後大家都肚餓, 就起附近搵下有咩野醫肚...見到有間御膳坊~格局幾好wor, 再望下門口既小菜餐牌: 35蚊有湯有油菜有飯有野飲 (凍飲唔使加錢), 間野唔大, 亦都好似full咁滯, 於是我問個waiter話有3個位, 我地就入去果樹食飯喇~果然真係冇去錯地方, 啲送快手都夠熱, 又好味, 份量都ok多~個西檸雞真係好好好正呀!!!!  肉又多, 一啖一啖咁咬落去, 果種感覺真係...嘩~唔好再講喇...

跟住大家捧住就黎生得既肚 (對唔住, 係我遮) 行去書展喇~今日真係好多謝嘉寶, 因為佢, 我地唔使大排長龍, 可以行會展條捷徑去書展 (如果大排長龍真係到12點幾都唔知入唔入到去, 我地23:10就去到喇)

前菜係賣精品為主既展覽廳, 估唔到呢個展覽廳起0時0分就要收工 (又話開到兩點?!)

之後去兩個書展場, 真真正正睇書喇~我地三個仲起尚書房睇左差唔多成粒鐘書呀, 有好笑既野係咁指指點點...

我買左小妮子既G小調進行曲 (唔係音樂書呀 =.=") 書入面有好多網上常用既表情符號, 好得意~可以直接得知作者當時既心情  仲有精美記事本送添, 好多公仔好靚呀...

嘉寶要起朗文幫佢啲細佬妹買暑期功課要求既習作, 都總算有個交代喇

我地踩場到兩點又要同今年既書展講再見喇~

之後落去截的士, 再一次多謝嘉寶, 我地又可以捷足先登喇

個的士司機好好人, 首先咪咪到屋企門口落車, 跟住我陪嘉寶送到佢屋企門口, 我就同的士司機起的士後面拎返張輪椅落黎, 唔小心跌左兩舊電, 於是的士司機好有耐心咁試下幫佢勾返好果兩舊電, 但因為環境太黑, 睇唔到前面個勾位, 咁佢唯有拎住兩舊電, 我就推住嘉寶返屋企啦

之後的士司機話車埋我返屋企, 話我一個女仔起街度行返屋企好危險wor, 仲唔收我錢添, 真係一個大好人呀~如果我記得佢個名, 一定會表揚佢既

P.S. upload左好多相呀, 大家有時間可以去我個yahoo相簿度睇

20/7   (四)

今朝去學琴, miss問我見工果邊點, 我話打算今日下晝去附近啲琴行問下

佢叫我著得成熟啲, 感覺上唔好俾人覺得你打扮到成個學生咁　

於是下晝飲完茶就換返條裙去琴行搵工啦, 今日有3間琴行叫我留低資料, 我第一間就係去馬鞍山中心既一間琴行, 果個人啲態度麻麻, 冇咩笑容, 搞到我好緊張...

之後去上面富寶啦 (我個miss早幾日話富寶呢間琴行仔請左佢一個學生去教琴wor, 咁我就試下喇), 係個老女人開既, 佢一見到我起門口就笑笑口咁叫我隨便睇, 我就問呢度請唔請教琴啦, 佢就叫我填低資料, 包括星期幾返到工之類既野, 同埋問左我一啲問題, 又問我中學果陣起邊讀書...呢間琴行真係好細, 得條巷仔咁, 但我覺得呢間請我既機會比較大

由富寶行返落去新港城都要成10分鐘, 之前上富寶又要行好多樓梯, 著對尖咀鞋黎行真係行到夾腳趾, 兩邊腳趾尾又起「泡」喇

之後起新港城三期商場間琴行填資料, 我一個月前都起果樹問過請唔請教琴, 但係我果陣冇俾資料佢...果個女人好好野~竟然記得我黎過, 但唔記得我有冇俾資料佢喇, 咁我梗係死都話呢個月有野做唔得閒啦

之後去馬鞍山既另一邊 - 頒安商場有間琴行, 就去問下, 果間野話唔請人wor, 跟住返屋企喇

21/7   (五)

下晝約左阿權去沙田, 佢今日精神幾好wor

起fz打左一陣機就行下新城市, 果陣為左自尊問題好唔開心

之後同佢麥記坐下, 齊齊玩返NDSL, 心情又好返喇

再去海皇粥店食下午茶, 好耐無食艇仔粥喇

之後經過好運入去恆星問下EZ Flash IV果邊點, 因為我成個禮拜都未收到佢地電話, 個師傅話仲未有來貨, 笑笑口話「真係激死」 出返間舖之前仲認錯左自己個男朋友...  阿權見到就笑到碌地 

下一站咪係去琴行留資料, 樂聲個女仔話唔請人住wor, 著住suit真係高貴...

之後起下面間琴行留左資料~跟住沙田呢一帶都冇咩琴行仔喇, 就去行citysuper, 期間見到有部好似跳舞機既物體做promote俾人試玩, 我做左白老鼠, 唔敢跳得太放, 驚俾人話我搞地震囉

行左一陣就撘6:45班車返歸喇~返到新港城就會參觀下個玩具展, 唔算多野睇, 以機動戰士既擺設同零售為主, 仲有好多扭蛋機呀　

期待琴行們的答覆...

呢晚阿權icq同我講話佢傷風, 話係同我去啲煙味機舖 (尖金, 北京道) 所致, 最衰都係我啦, 以後我地唔去啲煙味機舖喇

最多第日有需要就自己去~

16/7   (日)

凌晨時分起40分鐘內炒哂三色蛋 (黃雨、紅雨同黑雨警告), 真係擔心今日冇得去旅行

同時, 今晚難以入睡, 訓之前差Ready Steady Go就可以出埋啦啦隊mode (華麗個level)

所以半夜起身, 用一粒鐘爆埋Ready Steady Go!!

之後玩華麗版, 我覺得係DM既5速sudden!! 勁快囉

玩到5點幾先訓得著, 8點鬆啲要起身lu~今日除左我同媽子, 媽子3個朋友仲有我阿姨去

跟住組埋新港城會所去旅行啲人就撘旅遊巴喇~之後10點幾去到濕地公園, 2點鐘要集合, 估唔到我係唔夠時間睇果個 XD

室外唔多野睇, 但係落完雨空氣清新, 唔錯!! 但觀鳥園冇咩雀睇呀 T^T

跟住去濕地工作室做記者, 去埋睇文化, 再睇雀鳥之類既標本, 好靚呀

隻老虎好似真既一樣!! 吼!!

睇完之後去尖沙咀天文台道間仕德福山景酒店食下午茶buffet, 最好食既係泰式雞翼, 吞拿魚著茸同炸雲吞~發覺自己唔太鍾意食甜野...食完到5點就撘返旅遊車返歸lu~由於琴晚唔夠訓, 所以起車上訓著左...返到屋企再續睡, 夜晚減肥唔使食

全日行程都係100蚊, 抵啦

17/7   (一)

今日同阿權起河內玩DM比賽呀~第一類係玩泉陸奧彥既歌: Rise, Jet World, Happy Man同Sunrise Street

阿權冇得玩Sunrise Street

第二類係Anna Vieste 啲歌: Sweet Feline, Country Day, Electric Sun同Spellbound

結果係1:1打和, 阿權嬴Anna Vieste個course, 我就嬴泉陸果個

尖金有DM7呀~仲有pop'n fever玩呀, 有孖寶兄弟既歌

北京道部GF6係1蚊3首, 抵啦~

但係阿權頂唔住金星同北京道啲煙味, 所以我地好快就走左

18/7   (二)

星期日借左林海峰Talk Show既DVD, 琴日借左俾阿權睇, 今日就要還, 我都仲未睇呀...

於是佢今日下晝過黎還隻碟俾我, 順便去馬鞍山運動場睇下星期五有冇時間打乒乓球, 點知剩返既時間係極端到得朝早7-8同夜晚10-11 =.="

之後去郵局買18區香港特色既首日封同小全張, 我張野黐得好核突呀...

不過張野真係好靚呀

去完郵局, 佢睇埋我去美心食個下午茶, 我就返去睇碟啦