26/3   (日)

估唔到星期日都要返學校開會, 6個人開會有4個人(包括我) 個肚仲未落格, 變相開會前例牌食晏醫肚...  

特別鳴謝carol住hall提供一個舒適環境俾我地開會...

呢個report聽日要交, 所以今日點都要做哂先閃得, 我地起下晝都差唔多完成份報告, 但卒之起10點幾先走得, 因為miss最後一個要求 (apply concept and interpretation) 實在難到要媽叉...俾我自己做實肥硬!! 真係...

27/3   (一)

computer要quiz~基本上得今朝溫左半粒鐘就去考天才波...好彩係全部mc (之前知架喇 )

份卷唔算難~應該有五五波架喇...

今日2:30唔使上persuasion (因為星期六去聽talk當左上一堂) 所以去龍威打一陣機等阿權 (佢之前走去同fd去熊貓機舖打機 =.=") 打左舖鼓同DDR佢就黎喇, 成大半年冇玩DDR既我玩到final stage先死真係好彩...

我成日仲未有野落肚, 於是阿權陪左我去附近食野...冇耐我就要走喇~5:30要返學校開event management既會 (其實呢個event management係自願性質, 係聯同心晴行動搞場地, 捐款等等既野...因為我啲組員都參加, 所以我就跟大隊喇~但candy最終quiz左呢個活動, 因為佢怕兼顧唔黎功課方面, 不過我尊重佢決定既)

開會一次會, 聽落好似好多野搞, 但有幾個人負責場地, 仲有我地幾個人負責捐款 (即係擺捐款箱起邊, 諗慈善義賣果挺野) 應該應付得到既...忙啲都冇咩大問題, 因為讀書又最後一年, 參加啲活動學多啲野都好

28/3   (二)

1:30上完computer~個quiz咁快就有分: 19/30...我覺得麻麻地

之後要開會, 同唔到vivian食飯...

因為「估你唔到」個event星期四要present, 係時候做一做個rundown喇~之前我同laurie搞get叫patrick做派獎品既人做金雞獨立真係爆笑  (請另外兩位patrick唔好對號入座, 唔關你地事架)

改左星期四學琴, 因為miss要幫將要考樂理既學生惡補下...

29/3   (三)

今日媽子生日~同佢講聲生日快樂

屋企高朋滿座, 有幾位auntie黎我屋企打牌...不過之後我要開會, 點知返到學校冇耐個miss打俾event management一個組員, 話個會唔好開住, 因為miss遲下有資料向我地clarify返...

之後起學校上一陣網, 4:30 laurie打黎我就同佢講唔使開會, 我地變相去左hall canteen食下午茶, 又冇雞翼食真係可惡!!

夜晚都係同媽子同啲auntie出酒樓食飯

30/3   (四)

「估你唔到」要出貨喇, 我係做讀每條答案C既其中一位「三姑六婆」, 即係講答案之餘仲會向其他兩位A, B姑婆 (candy同kris) 係咁講話自己個答案啱果d, 說服人地揀你做答案 (當然正確答案果個唔使徙咁多口水啦)

初頭幾分鐘氣氛唔係太好, 後來同學既參與性都好大, 仲有一組揀答案揀到內鬨添 =.="

引起佢地最大反應都係獎品環節, 一聽到mc宣讀獎品果陣真係見到哂佢地既真感情, 早知我拎部手機落台影低哂佢地既表情, 嘿嘿~

有一組揀左BU遮袋10個做獎品, 佢地就即場將啲遮袋吹哂氣, 跟住縛實佢 (即係整到好似維園花市果啲漲卜卜既物體一拍發出呯呯聲果啲) 班野真係搞笑

個present都算成功, 但唔明其他同學既評分只係俾6/10...之前present果三組都係遊戲性質, 講得難聽啲係得我地果組人既event係有新鮮感...不過我覺得呢種低評分唔係完全壞事, 點解呢?  因為...如果miss睇同學評分係6分遮, 佢可能我地既event唔只咁低分, 於是個final result可能會提高...

之後同candy, laurie同佢個fd一齊食飯, 一粒鐘後要上悶堂...business communication =.="

再上完joy of singing約左vivian一齊放學, 冇耐阿權打黎話佢發燒...  好好保重身體

俾阿權休養下, 所以聽日約左vivian打機同埋同佢一齊睇鞋, 佢叫埋tony出黎...

今晚去miss屋企學琴, 一入房就見到個LV袋...

31/3   (五)

放左學去新之城匯合vivian佢地, 之前要去銀行禁錢, 多人到嘔...

期間阿權打黎話見到佢地, 條友唔舒服都要鏈舖機先捨得返歸

落到新之城見左佢一陣, 同埋vivian, tony行到天橋...阿權就返屋企休息

我地三個就去小魚滋味食晏~之後去聯合同花園街睇鞋, 因為vivian聽日要去酒店tour, 佢冇著suit果啲靚靚皮鞋 (我都冇啦)

最後去返聯合買, $35抵抵啦, 同埋比花園街既靚, 可惜得佢size而我著既size賣到斷哂...

跟住去聯合打機, 今日精神麻麻地, 兩舖dm都打得好...  不過終於集齊22勝喇

vivian同tony成日玩the house of dead 4, 之後tony叫我試下玩...我同vivian雙打, 我起stage 1冇死哂已經好好彩, 隻game又幾好玩wor

到4點幾佢地要走, 咁我心血來潮來買返對黑尖頭鞋 (遲下25/5 joy of singing有個concert, 要著黑長裙, 所以買返對鞋襯下, 第時有咩隆重場合甚至出街都用得著) 之後起旺中買左對果個sales話所謂今日新返既鞋 (我加個「所謂」係因為我見佢對第二個客試第二對鞋又係話果對鞋係今日新返, 都唔知係咪既 =.=") 我見對鞋都唔錯就買啦...$35...x2囉

20/3   (一)

以後會更珍愛對方 -3-

21/3   (二)

  朝早7點幾俾電話嘈醒左!! 一睇原來係我個夜鬼fd 咪咪打黎...當然唔聽佢電話住, 我仲要繼續進入睡夢中...

但之後唔係訓左好耐, 因為舅父琴日返黎, 今朝去左飲早茶, 之後11:30上堂

咪咪3點幾再打黎, 話今日好悶wor, 叫我同佢一起唱k食k buffet...佢之後仲叫左嘉寶黎 (佢地兩個都係我中學同學)

嘉寶好勁呀, 係咁點歌唱, 而我同咪咪就係咁食 (其實我先係食既主角 =.=")

同嘉寶一齊唱fing fing下, 勁爆笑...

走果陣落去撘火車撞到個CIE同學仔, 俾咪咪同佢講一句:「Hi, 同學...」搞到個同學笑得好突然...

22/3   (三)

又要早起身~今日要去柴灣拜山, 舅父同我地拜完山就會返去深圳

佢每次返黎同以前一樣, 口水多過茶...不過佢關心我既程度比起我親生老豆多十倍~

拜完山起柴灣飲茶醫肚, 所謂既燒鵝酒家啲野勁鹹

之後見左阿權一陣, 要返學校開會了

24/3   (五)

12點放左學同阿權出去打機, 有太鼓8玩, 有孖寶兄弟同好多主題曲玩, 勁正囉!!

同佢去樂富牛車水食晏, 由於落單前唔記得出示學生證, 到埋單時開聲話俾學生證佢睇, 點知個侍應因為我所謂既光鮮頸靚而唔信我係學生...=.="

5點半要返學校開會, Leadership個event下星期四要present, 個event係「估你唔到」, 玩法類似「15.16」, 不過我地諗左好多騎呢獎品, 人人有獎永不落空

問題之前已set定, 返黎係傾早兩日諗既假答案, 但當然睇落要同真答案冇咩差別啦...我仲以為我作既答案好假, 點知當我講完我既答案後已嬴得信心, 可以話係填補左我呢十幾年既空缺 (同我熟既朋友仔會知, 我由小學六年級開始對同人相處方面失信心, 而且呢十幾年間冇咩朋友可以令我回復信心, 由從呢個學期遇上一個人, 受左佢性格影響而搵返自己原本既性格, 果個係女仔黎, 仲要係幾靚女添, 佢個人幾豪爽, 開朗又好偈, 我行埋佢度基本上唔會有dead air, 開會果陣有時仲會同佢搞get添, 令到開會個氣氛比起我之前三個學期好)

唔扯開話題喇, post我條問題同答案俾大家估下先

問題: 下列哪一項能正確地解釋「藍田」的由來?

A)    原名為「咸田」, 但人們認為這是不吉利的名詞, 故後來改名為「藍田」

 B)     古人在田裡覓到藍色的寶玉, 有「藍田生玉」之美喻, 故改名為「藍田」

C)    古時有很多男人在該處耕田, 本稱「男田」, 因名字看來古怪, 故改稱「藍田」

開開下會其實我要早走 (7點幾仲叫早咩 =.=") 因為今晚約左KM家族食飯, 慶祝patrick生日~聽講pizza hut冇位, 所以去左cafe食野, 坐下吹下水...期間阿芝同patrick有palm (情侶機 -3-) 有game俾我地玩, 副蘋果棋真係難玩到爆...玩到一半惡夢就黎喇 (俾對方侵蝕 ) 不知不覺就到11點幾...要返歸

25/3   (六)

朝早去左河內鏈左幾舖機, 加左4分之餘仲擲左5舖勝, 之後搵日玩多兩舖勝到22勝...呢個月就可以收工

點半鬆啲就要起程返學校聽talk, 一出到去想唔擔遮都唔得, 勁大雨...

個talk係關於心晴行動, 請左醫生, 社工同情緒病康復者黎做嘉賓...laurie, patrick同我就霸左個靚位坐起樹聽...要聽三粒鐘 =.="

聽完talk同laurie去餿can食下午茶, 唔使講我地兩個又係咁吹水

夜晚返去同媽子同埋啲auntie出去食飯

呢個學期係特別多會要開~如無意外, 我得返幾個月大專生涯...

識到一啲投契既朋友固然開心, 但由於頻頻開會既關係, 同阿權約會既時間開始難就, 甚至令我地覺得大家唔夠時間相處...

我又意識到我呢排有啲唔尋常, 係咁食熱氣野 (平時食得太多熱氣野就識避諱下, 怕生酒米暗瘡呀, 呢排竟然置諸不理, 抱住個食完先算既心態, 連肥左都係天跌落黎當被冚)

一係就係咁發呆對住部腦, 夜晚見攰都唔願死去訓...再咁落去真係好唔掂...點解會咁呢? 覺得自己似乎逃避緊一啲事...

呢排既心情好複雜, 唔可以話唔開心亦都唔可以話係開心...

我覺得好失敗, 同阿權竟然起琴晚ICQ果陣先同佢講清哂我呢排做咩事咁忙...點解我見佢果陣冇講出黎...

我同阿權都覺得大家比以前接觸得少, 於是我問佢覺得我地近來既關係點...係時候正視呢個問題...

之前仲抱怨我個fd既男朋友掛住打機而少理佢, 點解我而家好似擔當左果個男朋友既角色, 搞到約阿權出黎好似睇我打機咁...  好內疚...

好唔開心...或者, 又係對大家感情考驗既時候...我從來都未試過對住一個男朋友內疚...一諗起就想喊...

今日下晝打左兩次電話俾佢, 冇人聽, 我相信佢會覆返我電話...但我等有幾個鐘冇回音, 再打第三次去, 佢一聽我就cut佢線...

佢再打黎果陣我鬧佢...鬧佢唔覆我電話, 佢話佢果幾粒鐘訓左覺, 跟住睇到我之前個來電又就黎開飯, 諗住佢食完飯阿媽走左先覆返我, 聽落都合理丫, 點解我仲要係咁鬧佢...?

情緒唔穩定...我咁做係咪錯...唔識講...琴晚喊左成晚...真係冇炭用

同佢講講下電話我都feel到佢好似想喊...唉

唔好拖到星期四先見佢喇, 聽日見啦...

今朝睇返最後兩集「天幕下的戀人」,有啲情節好感人, 一住睇一住喊...

6/3   (一)

起b+ab買左件黑色長袖V領cotton衫, 有少少厘士配襯 最緊要遮到啲豬膏...

8/3   (三)

阿權3:30放學, 就同佢去東波打機~好黑仔, 去到部DM既bass壞左

個盃勁Q難玩, 見到果5首歌已經唔想玩...打算放棄, 無謂投資起冇把握既野身上

繼續餵gf, 等上800

再同阿權起松記食糖水

之後同佢一齊撘86A~起車上面係咁玩...

落到乙明邨就吉魚蛋食喇~之後阿權起免費巴站送我撘車

9/3   (四)

放左學撘85A搵阿權, 再起乙明邨食魚蛋, 起附近坐坐下就有啲蚊仔kiss阿權隻腳...

10/3  (五)

12點放左學, 我就起hall canteen幫啲組員霸定位等佢地12:30黎開會, 等緊果陣Nicole打黎同佢傾左一陣

點半開完會, 就同阿權食晏喇, 餓到佢個肚係咁叫...

原本今日諗住去迪士尼打平機, 但阿權今日收到料話出面有好多機舖減左價, 所以去左高昇打機...

夜晚齊齊食粉~

13/3  (一)

上persuasion堂既時候睇到呢d野...

http://www.kentuckyfriedcruelty.com/anderson-vid.asp

放左學要傾Leadership & Group既project, 一傾就傾到差唔多8點

candy屋企冇野食, 我阿媽又知我開會開得晏冇煮飯, 於是同佢去荃灣食飯, 我想食扒王之王宵夜餐, 點知佢9:30先有,  唔等咁耐喇, 索性去紅樹林食...  又落雨又凍冰冰, 食個扒餐就暖笠笠

14/3  (二)

白色情人節~阿權送左個剝光豬Miffy鎖匙扣俾我呀 =3=

gf上左800 lu~

同阿權一齊食Haagen Dazs雪糕  

18/3  (六)

Persuasion個project要求我地搵幾對家長仔女做Focus Group訪問, 其中一對係搵我個fd-咪咪同佢細佬, 搞到咪咪做左家長去答人問題

啲家長細路都係下晝先黎, 我同啲fd/組員上晝就去Hall (有個同學仔住Hall) 傾埋啲interview questions, 晏晝齊齊叫肯德雞外賣

今日成日m痛, 冇心機討論+講野~所以今日成日都冇咩點出聲...

估唔到起差兩個家長既情形下, 個訪問都做左兩粒鐘...搞到咪咪黎唔切送佢細佬返屋企, 卒之由我代送, 同埋請佢食麥記, 呢兩個禮拜食左幾次麥樂雞餐喇, 都係差右下果張「點Jack咭」...而家已經唔想再食喇...

起前排係咁食野既情形下...到而家又唔想食野...

肥到成隻豬咁, 冇眼睇...

24/2   (五)

今日放左學約左Nicole去尖東CEO唱k, 差唔多成年冇見佢喇~

估唔到去CEO唱k仲抵過neway, 有學生證唔收加一, 仲有好多野食選擇, 中式西式日式都有...

大家一邊唱k一邊吹水, 到4點交房我就去尖金搵阿權

冇見幾日估唔到佢身世已經淪落到咁可憐既地步...

食完飯再戰河內, 一部DM同GF都cut server, 睇黎果邊冇得再打5蚊機...

打兩舖好耐都冇掂既太鼓7, 好似進步左wor

估唔到呢日見到Nicole, 呢晚就起佢身上得悉左個重大好消息

26/2   (日)

我同阿權原本今日想去VZ睇DM/GF比賽, 不過約左KM家族去踩單車就打消左呢個念頭lu~

差唔多12點起funzone匯合阿權, 打左舖DMV, Balance又死左lu...

之後去撘火車, 點知係馬場車黎...咁啱撞見同路既爹爹

起火炭等齊人就去租單車, 我依然都係唔敢自己踩, 因為我真係好怕炒車, 呢啲野一黎就可大可小, 嚴重起上黎可以令我冇面出去見人...

於是阿權同我踩孖車, 辛苦佢喇

大家踩到去大埔駐腳, 食完野就回程, 踩到沙田果陣撞到阿權個鄰居, 係咪黎為我地打氣呢?

之後見到個阿伯被單車撞傷流左好多血...

夜晚阿權就返歸, 我同KM家族就去BB任食, 為VG雞慶祝生日

PSP既太鼓game實在太正喇...

1/3   (三)

好凍呀...

今日有新division, 就落尖咀打返幾舖~有新歌A View玩, 首歌幾好聽但啲pattern悶到抽筋

玩兩舖GF夾埋加左30分

之後阿權放學就齊齊去睇「犀照」, 多得佢阿媽供應免費戲票

睇到恐怖片段...得阿權驚冇我驚, 真係俾佢個同學批中左

不過講真, 我睇戲都冇乜邊次驚過...好似好唔正常咁

3/3   (五)

今日放左學約左Cherry去旺角, 都成大半年冇見佢喇

同佢去小魚滋味食晏, 仲有糖糖收添, 多謝你~

之後同佢去新之城打機, 俾佢見識下DM3, 話Love Affair好聽, 果然識貨!!

晏啲就去龍威搵阿權, 齊齊去東波打DM, 差唔多開哂啲呃分歌喇, 而家851分

阿權就快上800分啦, 加油呀!!

仲玩左幾舖KM2, 1p啲掣冇問題的, Manhatten Sports Club同Cycletron都係拎B肥佬 

16歲到而家, 玩親KM2啲歌都係百聽不厭, 呢代啲歌真係正過KM3好多!!

之後去松記食糖水~叫左個西瓜涼粉, 清下面部既毒素...

食完就同阿權撘86A, 佢今晚要同屋企親戚食飯...所以我去到沙田就撘免費車返歸喇~返去整左個炒麵食...