QQ遊戲泡泡龍~好玩!!

play.qq.com

呢排一有時間就上去玩

屌!! 俾人呃左50蚊

好在返黎上網check下證實間死仆街野係呃人...如果唔係真係洗濕左個頭就仆直咁滯!!

雖然我係等錢洗...但我太衝動了

果50蚊一定買到個教訓!!! 以後一定唔會上當!!!

14/4   (五)

今日起身冇耐就出荃錦中心fancl house買保濕, 平衡荷爾蒙既補充丸同維他命B雜, 夾夾埋埋成$38x =.="

買完野啱啱兩點鬆d開始換miffy50週年「咕旬」

之後撘地鐵匯合阿權, 齊齊撘去坑口站東港城睇miffy展覽, 終於明白展覽所謂2000呎既由來: 實質既展覽面積都係大約800呎, 剩返果大約1200面積就係匯合miffy fds人物公仔 (即係d豬仔呀, 熊仔果d) 俾我地排隊影相既地方囉

個場唔算太多野睇, 但好多miffy野都值得留念, 唔衰唔記得帶埋阿權送既miffy50週年公仔黎影相添, 見到有d miffy擁躉帶左幾隻miffy公仔黎影相

有d miffy擁躉以為我個miffy50週年「咕旬」起呢樹買到, 問我呢舊野起邊買添, 話唔見呢樹有...

影完相同完miffy fds人物公仔就同阿權起吉之島買左盒生腸食, 食完就撘地鐵行太古城喇

冇見太古城中心幾個月, 連個food court都變哂身...入面d日式鐵板燒同火鍋真係好吸引, 有師傅坐起食客附近, 好有日本feel  

之後我地去鰂魚涌公園坐下, 發下夢...希望呢個夢想會達成

15/4   (六)

今日同電腦科d同學仔出去坪洲拍片 (有個同學住起坪洲嘛), 下星期五要交貨

今日咁既天氣, 我就只係著左件短袖tee加件外套, 市區都頂得住既, 但一出到坪洲海邊拍片就凍到黐肺, 又冇太陽呢, 唉...

睇返我地既幕後花絮同埋d片段又真係笑死幾個...

要講犧牲最大既都係zoie, 影佢踩單車扮pk真係唔簡單, 仲搞到佢弄假成真...成個膝頭都瘀喇

不過值得一讚既就係天公, 佢等我地拍完片先落雨呀, 真係謝天謝地 T_T

16/4   (日)

今日一訓就訓到12點, 爽呀!! 之後撘免費車出沙田再行去第一城匯合阿權, 因為今日我起第一城中心參加左個19區復活節美食大胃王獎賞呀, 未玩過就玩下啦, 預左我唔會入到決賽, 所以唔決定急住食, 就咁抱住免費盡情享受美食既心就算了

今日既初賽有4個回合: 第一個回合就係鬥快食雞球檬粉, 第二個回合就係鬥快食熱狗, 第三個回合就係鬥快食腸粉, 第四個回合就係鬥食小籠包既件數

我食檬粉果陣俾d死人木筷刺到個嘴邊

唔做包尾算係咁啦, 有個女人好勁入到決賽, 食野又快~以第二名出左線, 不愧係女中豪傑

食飽之後勁攰, 同阿權行左一陣新城市就返歸訓了

17/4   (一)

電腦科d同學仔黎我屋企用premiere剪片, 我媽子好好人, 煮左蝦子麵同水餃去慰勞佢地

去人屋企一入人地間房就會大概知道果個人既興趣同性格架喇...

18/4   (二)

4日復活假過去喇, 個人覺得放左好似冇放過咁

由於早幾日去坪洲冷親既關係, 今日返學個人好似沾寒沾凍咁~除外套又凍, 著外套又熱, 呢挺天氣真係俾佢玩死!!

之後仲偏頭痛, 5:30放左學仲要去開會, 我見唔算好唔舒服所以都去喇...其實我間唔中都會頭痛, 呢晚早d訓返夠皮就會無事

19/4   (三)

今日dayoff養足精神, 下晝去尖沙咀見阿權, 佢又傷風喇...

同左佢去藥房配藥...人病左都要樂觀d架...記住我講既話啦

今日個王子盃有新歌: 最速逃避行  

首歌幾好聽, 又幾得意, 仲幾易玩添, 計埋分喇

聽日記住出去曬下太陽, 人都醒神d啦

7/4   (五)

照舊12點放左學同阿權出去, 今日起南山村食晏

知道起將軍澳有miffy50週年展覽, 決定起下星期五齊齊去果樹睇 (果日下晝仲可以接觸埋miffy d fds)

之後都係去尖咀打下機行下街...

我咁大個人未試過著尖頭鞋出街, 一著成日就夾到隻腳趾尾出血水!! 腳又攰...都唔明其他女仔點頂得住呢種鞋...

8/4   (六)

今朝10:30要返學校聽leadership既講座~個嘉賓都幾令女

之後同candy, laurie去聯福樓飲茶, 仲俾其他同學揭穿左我地3條友既食量

阿man miss黎左, 飲下茶之餘, 仲講返少少有關籌備心晴行動活動既事~本來係製手掌畫, 後來都係覺得花太多時間同功夫, 所以我地之後唔使出去為製手掌畫既布而格價~

之後candy陪我去荃豐買card reader (用左8個月就壞左, 都係佢主人衰 =.=")

買完野就帶佢去熊貓機舖, 果邊冇太鼓玩, 所以佢有d失望, 哈哈

10/4   (一)

candy生日~起樹再向佢講聲生日快樂~仲俾我知道左佢個花名添  

5:30上完堂, 我又要出荃灣買野喇...今次輪到我張mmc壞左 (原來張mmc係手機送既, 得32MB, 入野入得好痛苦, 周不時要delete野) 所以出去買張勁野d既咭喇~約左cherry去荃豐買, 買左張512MB既mmc~$199, 仲係永久保養, 抵玩啦

之後我地去熊貓機舖打機, 齊齊玩炸彈人, 自從我電腦唔係用window98後, 就對呢隻game好懷念 (neo果隻game disk只係support window 98 =.=")

仲俾機舖阿叉問我點解識左我幾年都係咁靚...

夜晚9:30去扒王之王食宵夜餐  多謝cherry陪我完成呢個心願

經過荃錦中心見到有notice話由14/4開始起果個商場買滿300蚊野就送miffy50週年紀念版「咕旬」, 好彩果邊有間fancl house, 如果唔係我諗唔到買咩野過300蚊~一於星期五去展覽之前黎呢樹換佢返屋企啦

11/4   (二)

下晝先第一餐落肚, 餓死我

阿權肯捱熱陪我行過南山村食野係感激, 不過我肚餓係大哂既

之後去尖咀河內同金星打機~入到尖金冇耐就撞到爹爹

之後打dm有少少對我黎講算係驚人既戰績: 第二次s左三蟲~74%, 以為玩sotto adv會玩到死死下~心血來潮起extra stage玩佢~點知成差唔多600 combo仲s埋~78%, 一舖就加左4分

聽日終於有個名正言順既dayoff喇

13/4    (四)

成朝都冇咩精神同心機, 鬼咩!! 11:30一落堂去廁所就發現m到...

之後捱住m痛去做business communication既interview (計分既)

冇咩心機去prepare, 天才波算喇~

唯有睇人地interview果陣睇下多數人有咩野做得唔多好既由我補償返應該掂啦

據我所觀察, 大多同學都係唔夠自信, 表現緊張同埋冇咩笑容~於是我去interview果陣就做足哂呢d野 (對我黎講唔係難事, 我係怕唔識應對) 好在miss冇問咩難問題, 由於我係in教琴, 所以答教琴既野應該唔係問題...俾個教琴經驗過俾miss聽, 我郁兩下表示教學生既彈琴gesture已經代替左我既non-verbal communication~咁就起interview度拎左個B+喇

最好笑係我到今時今日先到個college點串 =.=" 起我個resume入面: collage <-miss就有咁既評語: !! My God...

2:30做完interview, 之後唔使上joy of singing, 就去龍威搵阿權, m到打機唔會好, 所以玩兩舖擲左兩個勝就算了

之後同佢行去太子, 同佢share個章魚小丸子同埋雞蛋仔就做左本魚既是日晚餐, 睇埋落去就會知點解我之後唔會食野...

6:30約左candy同jenny起九龍塘地鐵站等, 今晚去將軍澳電視城做15/16既觀眾, candy係森美fans club, 所以佢有quota俾我同jenny去睇

等齊人就成群鴨仔隊出去撘城巴去電視城, 入面有個工作人員好惡~話成個TVB範圍唔俾影相!!

今晚既嘉賓有solar, 楊思琦同徐子珊, solar搞get真係搞得唔錯  佢地兩兄弟有一個嬴到身家十倍

如無意外, 到時上映呢集大家唔會見到我, 因為我d fds唔肯坐前面...

兩集野出街一粒鐘, 但我地由7:30坐到11點先拍完...坐到個囉油好痛...

1/4   (六)

今日要返學校開event management既會, 11點開始, 以為12點鬆啲就完, 點知開到成1點...我都覺得個會仲有一段時間都唔會完, 咁死啦~我同阿權講我12點幾1點去到奧海搵佢...於是我到1點就提出早走, 係時候向阿權同師生果邊負荊請罪

P.S. 我同阿權差唔多成個禮拜前約左定, 但個會本來要開, 佢都知, 但起星期三取消左, 佢都知, 但今日最終要開會係琴日至知

同阿權去新九龍中心間茶餐廳食晏, 中途咪咪打黎 (係我知佢聽日生日, 之前send左SMS俾佢, 叫佢今日一起身就叫佢打黎), 佢今次算醒喇, 兩點幾就識彈起身, 平時3,4 點打俾佢都仲訓到成隻豬咁...

同佢傾完一陣電話之後同阿權過返奧海打機, 起屋企抖下兩日精神係好左wor

今日係dm/gf新既division, shop chanko又係隻a view, 雖然首歌幾好聽, 但dm d pattern實在係悶...

今日好好彩玩左dm同gf各3舖, 勝率100%!!!

出到奧海一期商場, purple姐姐做嘉賓, 佢一開咪唱歌真係要彈開nnnnnn咁多呎...X_x" 佢啲分貝真係高到暈...

之後同阿權行櫻桃街公園, 幾大幾清新~吸多啲新鮮空氣佢都快啲好呀

後來去銀座玩舖dm7就返歸了

2/4   (日)

我未試過起人生日果日請人食野請得咁唔gur!!

一天上集~

明知我今日約左佢仲要今朝做完野同人去bbq, 雖然我好體諒佢訓左兩粒鐘, 但我琴日叫佢今日起左身打俾我, 卒之係我兩點幾三點打俾佢, 佢話啱起身冇耐, 我都算喇~佢仲要話佢約多左個fd起沙田, 仲叫我慢慢梳洗, 仲話搞得越耐越好 (因為佢果陣唔肚餓)...果陣我聽到呢句真係好慶, 如果唔係睇在佢今日生日份上, 我一早放佢飛機了...呢件事好擺明係今日生日果個人將啲約會安排得亂七八糟!! 如果平時我啲fd帶佢啲fd出黎我無任歡迎, 但今日係個主角生日, 你無端白事起冇問過我既情況下叫個我三唔識七既朋友出黎, 我原本話請你食飯, 咁樣只會搞到我俾錢果陣唔知點好, 你仲要帶個男仔fd出黎, 你又唔係唔知男仔一向講風度架啦, 搞到我開聲問你個男仔fd話呢餐同佢一半請你好丫定係點...你個男仔fd一句唔使, 我點好意思接受?! 最終我俾返60蚊佢...點知你仲話請你60蚊益哂我啦, 咩意思...我唔理佢起邊樹咁老遠飛出黎同你買禮物又好, 你都唔好啱起我請你食飯果餐彈個人出黎丫...真係...

我唔講我講緊邊個喇~知道件事發生起佢身上既人應該醒水...

一天下集~

傍晚我出荃灣熊貓機舖搵爹爹, 阿芝同patrick, 一入去就見到二撳雞伯伯, 啲聊女招式都係咁既衰款...-_-" 不過我都好耐冇見佢喇

dm/gf 3蚊5首歌真係抵到爆燈  之後加埋pp去pizza hut食夜晚...

跟住再去熊貓機舖, 玩dm過到我起v2代中第二次過到既blood and thrunder, 我對呢首歌有個期望, 唔講係咩期望喇, 唔易實行  呢首歌打得好真係好型...唔知幾時到我喇

到23:15我要走喇~因為例牌野 (過0:00返歸又會遭受到娘親苛扣50大元的刑罰)

之後奔去千色店對面啱追到架49X (起唔過天橋既情況底下), 好快去到城隧轉車站~之後等唔夠1分鐘又黎架40X, 卒之啱啱好踏正0時0分歸家~真係好玩...

4/4   (二)

悶鬼business communication堂!! miss當我地成個小學生咁, 要我地一問一答咁為下個禮拜要做既interview而practice...呢個都冇所謂~最仆街就係佢之後打散哂我地啲同組人, 又話所謂既識多啲fd, 同多啲唔同既人溝道為藉口, 係咁randomly seperate哂全班人做5組, 做啲乞兒group interview!! 個topic仲要乜乜藍籌股果挺野, 我鬼知佢米奇老鼠咩...搞到我全程都唔識出聲...X佢老X!! 我發誓後日果堂唔上!!

5/4   (三)

今日起大圍火車站匯合阿權, 齊齊出紅磡

出黎第一件事當然要醫肚~去左都會廣場food court食野~幾多野食架...我同阿權買仙桃源既野食, 到我買完野食等緊果陣, 入面既中年店員眼瓊瓊咁望住我笑, 正一死仆街!! 未見過靚女著背心呀?! (我講完呢句連個胃都反埋=.=")

阿權今日胃口唔多好...  叫左豬扒飯但一件豬扒都冇食到...

之後我地去左科學館, 我似十足十個鄉下婆, 係咁當入面好似冒險樂園咁玩 (其實仲好玩過冒險樂園), 玩玩新意思, 數學玩意, 邏輯題目乜都玩一餐...今日免費入場實好多人, 勁Q多靚仔靚妹, 我想玩我最鍾意既單車機都冇得玩了...不過今日真係難得搵到我地唔使點消費而又玩得多時間既節目

不過今日玩兩舖gf三舖dm全部擲哂負!!   @#$%^&*......

patrick打黎問我今晚睇唔睇「極地雪犬」, 唔睇喇~一來假期睇戲貴, 二來聽朝leadership要quiz, 書都未溫...

後來起河內機舖撞到靚女las, 好耐冇見佢喇  當然仲有佢既四哥...

阿las讚阿權打dm勁左好多, 阿權聽後一個害羞既搖頭已證明佢既謙虛

差唔多7點離開機舖, 之後帶阿權去睇我十五十六諗住買唔買好既米白色短袖see through, 我試身出黎佢一聲話幾好就哄我買左喇~入面著背心仔笠埋呢件野都算係今年夏天新look

阿權肚仔餓, 去左金星隔黎間7仔叫十粒燒賣食, 兩條友都唔知燒賣加左1蚊, 我仲要大大聲咁講話個店員計錯數, 點知瘀爆, 佢話10粒燒賣加價已經加左成年...

我同阿權起個店員夾緊燒賣果陣係咁反問大家: 「乜有加價咩? 之前唔覺既?」 跟住個店員話:「證明你地成年冇黎呢度食燒賣啦...」

都唔知好笑定好喊喇...