8/6   (四) - 14/6   (三)

考試期~一共考四科, 好在每科之間係隔日考

早幾日打去有線電視, 諗住齋申請世甲盃台, 但係太遲喇~果邊d人話唔夠人手幫手安裝, 要簽年半合約果d長期申請先會幫你安裝   唯有遲d想睇邊場就落樓下商場睇啦

好想去海洋公園入面個出前一丁展呀, 但係11/6就完, 我都未考完試, 兼且果排天氣唔好, 唉...點解唔開多一個禮拜呀

14號考完試, 食完晚飯~夜晚8點半就落到樓下商場霸位睇波, 我都係起欄杆後面果d企位睇世界盃, 前面既100個坐位係要起指定幾日日期內起新港城消費滿100蚊就可以換一張入場證, 個證當然淨係可以睇你揀果一場賽事啦, 每場100個位, 有快趁手喇

我到場之後, 好多人陸續霸位企起果樹睇場~氣氛都唔錯...愛隊西班牙大勝烏克蘭呀

睇波期間阿權打黎, 話灣仔機城有V3既location test wor, 聽日一定要去啦

冇耐之後芝家姐打黎, 問我去唔去佢地間新屋食飯wor, 証下佢整既幾味撚手小菜嘛, 等我聽日叫埋阿權去先

26/5   (五)

下晝約左eebi去旺角~因為早幾日借左佢條concert裙, 諗住駁長我本身條連身裙~點知琴日都係冇著過, 因為我一著就長到拖地 =.=" 我遲左去到, 佢要趕時間走, 所以交低左條裙俾佢就散喇

原本起果頭join阿vivian, 佢晏晝打俾我話佢都會出旺角嘛, 點知電話冇人聽...果陣先4點幾~到6點幾先約左班comm同學同埋benjamin同阿man去上樓cafe, 好在呢兩粒鐘有阿權陪我

呢兩粒鐘都係起聯合打機同行街, 6點45分約左同學佢地, 我地6點35分先走, 跟住我仲準時行到去油麻地, 係咪好勁呢?!

等齊人就去左大久保對面座既cafe, 入面仲有手指機玩添, 當然係自備1蚊啦 =.="

我地齊齊玩估職業, 我轉腦實在太差喇...之後每人都講下呢兩年既學校生活~自問冇信心既我, 俾Ben sir同阿man讚我好連貫咁足足講左10分鐘

cafe起11:30就閂門, 咁我地要走啦~之後同laurie行左一陣就返歸lu

28/5   (日)

今日同咪咪, laurie同candy去寶勒巷neway唱k, 今朝10點幾就同咪咪一齊撘馬鐵, 去到尖沙咀搵埋candy就上k房喇, 跟住叫埋laurie起身

跟咪咪唱k係好抵玩, 因為佢以前起果樹做野, 所以可以唱耐啲, 但我地誓都估唔到會耐成咁 :

今朝11點幾上到k房啦, 跟住有個lunch, laurie1點幾黎到, hold左個lunch俾佢

之後我同laurie仲叫左個下午茶, 叫咪咪個男友親自落廚房拎, 兩大碟下午茶=小食拼盤!!

起happy hour, 咪咪任拎nuts 

原本佢話唱到6點就會被cut, 到6點鬆啲果陣, 咪咪男友見到一cut, 就即刻打去服務台叫佢開返俾我地唱...

就係咁,  我地連k buffet都有得食, 到8點幾先正式走

估下大家夾左幾多錢? 30蚊都唔使呀!!! 講你都唔信  

都未試過去唱k唱得咁爽, 仲一日三餐添

25/5   (四)

今晚係Joy of Singing既concert, 我地唱歌班野係所謂既CIE Choir, 所以我地成班女仔要著黑色長裙, 好似去波咁

前幾日起銅鑼灣Sogo既leaflet度見到NDS今日賣$698, 但只限賣25部, 為左搏下有部平機玩, 今朝就以呢個裝束去Sogo, 今朝十點一兩個字去到唧, 玩具部已經排左好多人, 個個輪籌等買機, 而我去到已經冇籌拎...   真係白行一趟, 唯有起果樹睇下野~起Vertical Club知道買兩件衫褲半價, 於是買左條三個骨褲同條長裙

之後去綠野仙踪醫肚, 食飽飽有時間就過駱克道打鼓, Green Lime都幾易玩呀

兩點半返到學校chapel練歌同rehearsal, 中間break一陣, 呢段時間一練就練到6點lu

約左阿權起舊校飯堂等, 之後7點半約左爹爹, 芝+patrick同pp起地鐵站等, 但我果個鐘數要返到學校, 所以要阿權帶佢地去chapel喇, 所以匯合完阿權就帶佢行一次chapel等佢識路, 今晚個重任就交俾佢啦

之後去南山村食飯, 都幾趕, 仲有少少overtime, 好彩有人遲過我返到去  

一返到chapel, Miss Chan見我著件白色see through起面, 問我一陣點...我話除左佢, 佢好似唔建議, 我原先企起第一行表演, 所以佢調左我去後面俾人遮住左, 不過我行返出黎都係好突出, 條裙又短過人

唔除件白衫, 雖然係熱啲, 但我隻肥美手臂唔使亮相, 算係一件好事

今晚個演出都好成功, 之後唱完encore仲有人要求重唱添, 於是我地重唱完一首歌就散水喇

之後同阿權過返沙田食宵夜

呢幾日都好忙~由星期二開始, 我地都晚晚留起學校預備星期日個display, 琴晚終於搞好喇

但係呢幾日都訓無定時, 加上大家報公數係咁食啲薯片蝦片, 唔出暗粒至奇 ~_~"

今朝9點鬆啲返到學校同carol同阿K搬啲display過新世界 (當然有book貨van幫手啦)

10點幾就起自己個攤位度做set up, 我地啲Event Committee起11點要排舞, 同埋做「放飛機」既rehearsal...

原來Eebi同Tommy12點幾就黎到, 但係佢地撞左去新世紀 =.="

之後佢地都黎左, 好耐都無見佢地

今次個活動除左同心晴行動聯手舉辦之外, 仲請左啲嘉賓, 令我地最雀躍既都係有吳浩康同葉佩雯黎, 原來阿Grace真人好型

我地成組女仔都齊齊起印墨個攤位度噴蝴蝶, 好靚呀

阿權3點幾黎到, 佢黎左冇耐我地就要上台跳心晴舞...之後就陪佢周圍行下

佢黎到我地個display竟然唔伸隻手入去抽扭蛋!!

佢6點走左之後, 我同laurie係咁起人地啲display度影相, 仲黐左啲label起塊面上, 變相做左眾人焦點

我地差唔多起8點做ending, 我地Event Committee其中12位成員 (包括我) 送花俾阿Ben同阿Man (阿sir同miss), 全體同時一齊唱「Today」, 場面真係好感人~阿Man同一啲女仔都喊左出黎 T_T

之後拆埋個display就走喇~

感受: 透過今日既活動, 發覺自己終於起人生中做左少少有意義既野~同時, 呢個活動感覺同communication既同學拉近左距離　

以後都唔知有冇機會接觸呢類既活動喇...

想知更多有關資料, 去BU e-news啦:

http://www.hkbu.edu.hk/~cpro/enews2006/20060523a.htm

P.S. 基本上我係唔會post大量自己既相上網既~不過我覺得今次既相真係幾正, 所以俾大家過目

http://hk.pg.photos.yahoo.com/ph/littlefish337/my_photos

總結一下我既近況 (有啲野係我即興諗到既):

1) 忐忑不安, 思緒不寧, 所為何事?

2) 人越大, 越難去滿足自己: 容易唔開心但好難覺得開心, 阿權早排都話病到渾沌遮, 咁楊曉瑜小姐, 你呢? 係咪為啲無關痛癢既事   而煩惱呢?

3) 覺得自己真係好要面 (唔係面皮厚呀 =.=") 甚至因為咁面傷害到身邊既朋友, 何必呢? 「面係人地俾既, 假係自己丟既」既然我係要面既人, 係咪好想人地俾面我呢? 如果人地係真心俾面我既, 我樂意接受

4) 自我中心, 串串共, 脾氣差...又有冇人頂得我順呢?

5) 事與願遺: 與其成事, 有冇爭取時間去完成目標呢? 順其自然啦, 我冇可能強迫一個人去順自己意既, 咁樣實在自私到無倫!!

6) 怪就怪自己冇內涵, 難以expand一啲話題

7) 我已成為一個飽餡: 夾起做野同讀書之間, 英文拉分果邊到而家仲未有行動

8) 如果話自己係雙失, 一定係家中既蛀米大蟲!! 唔會有三失既, 信我啦

9) 有個男仔話好掛住阿權, 笑死我...

10) 夏日著衫style有少少改動

11) 期待大家考完試既來臨: 計劃齊齊買NDS同埋出去游水

12) 我個人...成日搞爛get, 冇Q用, 諗point又幫唔到手...灰爆

13) 出街唔想打咁多機喇, 要學會享受生活, 好多野想試都未試過~一定要試, 為生活增添色彩, 係咪?

14) 都算係一件大事: 21/5 (日) 3:00pm 新世界中心--好心晴由細浸大 (活動) 我係其中一個攤位既成員, 仲會上台獻醜添 =.=" 鍾意既就過黎捕我啦

15) 我近來追睇既電視節目: 高朋滿座, 老馮日記, 電車男

16) 打去俾消委會追查投訴case: 決定斬草除根, 杜絕後患!!

17) 見過DM/GF V3既logo, 好Q怪!!

18) 阿權過到Nonstop乙水Course, 弓起哂  我都未過過呀...

19) 竟然高鬥到想揀朋友: 楊小姐, 你係咩新鮮蘿蔔皮呀?!

20) 早排得悉一個同學既死訊, 雖然同佢唔熟, 但願祝福佢安息, 擺脫沉重既負擔, 我會永遠懷念你的!!

21) 有人竟然起我就黎起浸大CIE畢業既時候仲以為我仲起教院讀書, 真係心都淡埋...

~~肺話鉛筆~~