9/8  (二)

今日同阿權去沙田間表哥食晏~之後去UA睇「多啦A夢」

睇完就去無線打一陣機~之後阿權話有聖安娜蛋撻買三送三既優惠劵, 就諗住去買~但一時唔醒起沙田邊忽有聖安娜, 沙田廣場間聖安娜要18號先開~咁我以為瀝源果邊有分店, 就同阿權過去睇下~都係白行~行返去新城市先醒起高登眼鏡後面有間聖安娜~都夠戅居嚕~不過去到都冇蛋撻賣~唯有食白果

之後起商場坐一陣就撘車返歸

11/8  (四)

今日同阿權起百老匯電影中心睇「冬陰功」, 劇情唔太特別, 但我地鍾意睇泰拳~打黎打去係幾過癮

睇完戲起麵包舖買左個蒜蓉多士食, 之後就行去金星打機, 果樹入左部dm5, 感覺上好正, 但一入錢玩左就唔係咁講法~個腳掣壞到九彩之餘, 個snare同cymbol都sense得唔好

不過打完舖dmv令我開心到飛起~因為我第9層team E而家排第二喇!! (前兩日仲係第三, 同第二既距離唔近) 而且仲貼近第一名~於是我盡力餵機, 拎得幾多team分得幾多分, 好快已經追上到第一名喇!! 我同阿權都好想玩Flow, 所以佢都助我team一把~玩nonstop order黎呃分

食完飯打完機就齊齊撘馬鐵返歸

12/8  (五)

今日同媽子同埋個姨姨去佢地朋友屋企黐餐~個朋友係許小姐, 佢整左好多野俾我地食呀, 又有自己親手包餃子 (用南瓜, 蔥芹同雞肉包架) 仲包得好靚添, 好似鍋貼咁~煎完出黎睇落好有賣相~食落又原汁原味

佢仲自己炸左d迷你雞柳飽過我地食, 又整左茄子排骨煲, 焯蝦同菜心, 又起酒樓買左隻蟹黎~已經食到我地捧住個肚...之後佢仲教我地整冰皮月餅, 整既過程好唔簡單~真佩服佢既耐力

煮綠豆蓉, 篩麵粉, 煮澄麵再落鮮奶同糖, d餅皮仲要雪兩粒鐘...佢整好d材料後就俾我地親手包月餅嚕~跟住仲有餅模過我地印~我整第一舊餅都唔成功, 因為我包完月餅唔記得將舊餅舔d糯米粉呀, 搞到舊餅黐住個模, 好彩有得補救咋~我真係失策

不過整餅都幾好玩既~本來許小姐話招呼埋我地食夜晚, 但打攪左佢成個下晝, 我地都唔好意思咯~就請佢去酒樓食飯

P.S. 今日得悉我果team升上去第11層, 太好喇

今日約左eebi同cherry去大會堂睇第四屆新星芭蕾舞總賽~我地由下晝1:30睇到6點, 比賽既人多數係小朋友, 最大既都係15,6歲~有幾part比賽, 佢地鬥既對象就係用同一主題音樂既參賽者, 有賣火柴的女孩, 其中一頂既男子組比賽得兩條o靚仔~但佢地既主題好得意, 搵豬頭公仔黎跳舞 

比賽本來起5:15完, 但係等埋評判商議同埋公佈賽果就搞到6點, 呢幾十分鐘期間既嘉賓表演就更精彩喇~個靚女不停起度轉圈~令唔少觀眾為佢鼓舞呀

呢場總賽係值得一睇架~佢地由初賽既7xx位參賽者篩剩幾十個, 實在難得

之後我地落銅鑼灣等埋阿權同tommy~諗下去邊度食, 點解次次都要我話事...

仲有某人之前話想食拉麵既, 當我帶左佢地去世貿間拉麵店果陣~佢又話, 「你話事囉, 冇所謂...」家下咩意思先~簡直自相矛盾

如果以後再係次次要我話事既話, 咪怪我唔客氣喇 (你地既主權究竟去哂邊...)

呢件事我都算喇~我同阿權最憎就係d人起度做埋d無聊媒人戲~通街人都拍拖架啦, 有咩咁出奇...你唔使教我地都識做啦~即係佢會講d咁既野:「你地行啦, 唔使理我地架...」再唔係就講話咩咩唔阻我地呀...之類既無聊說話~講真, 如果你地間中講一兩句, 我地係唔介意既~但如果你講得多, 我地聽得多唔會覺得尷尬, 而係覺得你好x煩呀...講少句唔會死架下?! 呢件事其實只係針對緊一個人, 我都唔想為左一棵樹而放棄整個森林...

至於某人份人搞到咁鬼無聊就唔知係咪群埋另一條無聊友群太多喇~希望你以後唔好講咁多廢話~搞到我地拍拖都拍得唔自然...衰d都要講句喇~我識咁多人之中全世界最無聊既朋友得你一個咋

我有諗過直接話你, 只怕你聽唔入耳, 我唯有借個日記黎申下啦...唔啱聽就當我冇講過啦

就係因為咁~我成晚都冇咩點出聲~加上之後個肚唔舒服~所以之後我睇阿權起河內打左陣機就走喇

早排起weedend雜誌睇到有間起油麻地既釣蝦王做緊39蚊優惠, 優惠時間係12點至5點~我都有10年冇釣蝦喇~對上果次係起台灣睇住個親戚釣多~我多數係負責食~記得果陣d燒蝦好正呀~落d粗鹽已經好香喇

去到先知我呢條友發雞盲~原來係1粒鐘39蚊~都比平時平既~咁我同阿權兩人用一竿, 去到有兩個場但得一個場開俾人釣~咁我地搵個空位坐~冇耐我見到隻自來蝦勾到我地個網 (咦?! 咁快有願者上釣喇?! ) 點知郁一郁佢就雞咁腳咁走喇...  眼見人地一隻又一隻蝦咁釣上黎, 而我地一路仲等緊蝦仔上黎~仲有遲過我地黎既人好醒目~佢用左蝦肉做餌~所以好快有收穫喇~但對我地黎講, 似乎釣蝦呢味野比我地想像中要難得多...咁我地一人輪流釣一陣~順便訓練下自己既耐性

後來多左人黎玩釣蝦~開左第二個場, 於是原來個場有人調左過去 (可能諗住第二個場多d蝦掛 ) 咁我地諗住去隔黎個吉位 (呢個位就係頭先連續釣左幾隻蝦果個人坐過既) 冇耐終於有蝦上黎喇~我騰哂雞咁拿拿聲fing隻蝦上黎~d蝦水仲要彈到去阿權既重要部位  真唔好意思...

就係咁~呢一粒鐘變左用$39釣左一隻蝦上黎~就齊齊燒隻蝦黎食囉

就咁食半隻蝦仔唔夠喉既~所以之後同阿權起麥記share個餐食~佢有$10 coupon呀

之後都係起金星同河內打下機~例牌起豪發茶餐龐叫送食飯~

係時候講下今日既戰績~本來初時打機冇咩得著, 後尾我想玩NONSTOP~紅住過左ex-clallenge個course~如果100秒最後果堆cymbol我用雙手打既話實死梗喇...我見打左一堆唔對路, 就即刻轉返單手打喇~加左差唔多兩分~但得67% sp~到夜晚果陣心血來潮玩You Elevate Me~連左5xx combo呀, 仲有No More Crying連左3xx combo (講真, 甩得好唔抵~我甩既位係第二輪既5下snare+cymbol位~我平時都冇咩點甩呢d位架啵) 跟住呢兩首野帶契我加左兩分~而家突破900分lu

就係咁大家開開心心返歸喇

阿權你都要加油呀~你張adv新咭差廿幾分就有紫字架喇

今朝11點返浸會Franki centre~因為我之前申請左轉傳理做主修科, 所以要填form選科~估唔到返到去撞到阿峰, 佢要申請延遲交學費 ~佢都有幫我睇下選科既事~最後都plan定黎緊既第三同第四學期會讀咩科, 湊夠65個學分

咁我黎緊個學期會讀Communication Theory, Inter Personal Communication, Literary Appreciation, World Music Appreciation, Critical Reasoning同Basic Statistic, 夾埋19個學分, 咁最後學期就會輕鬆d喇

之後起九龍塘地鐵站匯合阿權~齊齊去龍威~都好耐冇去龍威喇~等埋Tommy出黎就去食晏~跟住去黃金廣場同我買咭reader~而阿權要幫佢阿爸買個DVD-ROM, 同埋佢睇中左Mario既遊戲碟~就帶埋佢返屋企喇

跟住我同阿權起西九龍手作之店share左個雙球雪糕食~有蜜瓜味呀~正 !!

大家行左一陣就返歸喇~我之後要學琴

今日約左我同阿權d朋友去漫畫展~我同阿權約左起九龍塘地鐵站匯合就撘地鐵過灣仔地鐵站同佢地匯合~eebi, tommy, ocean, fire同tina都黎左~跟住我去ok買埋漫畫節飛等埋阿杰黎就去茶餐廳食晏~我地食完野等埋阿邦就齊齊出發去漫畫展~真係比我想像中既多人...行到天橋已經有擠迫既感覺~半途中有玉皇朝既雜誌拎

後來行到酒店分叉路果陣~我地試圖好似上次去書展咁樣行捷徑...可能人又多又亂~eebi佢地幾個行起前面, 都有一段路喇~我同阿權佢地諗住行捷徑, 但黎唔切叫埋佢地一齊過~於是唯有起會場內匯合喇...

eebi佢地冇耐就入左場~我同阿權佢地由於有d問題所以搞左差唔多兩粒鐘先入到會場...呢25蚊真係矜貴

會場入面有唔少檔位都要排隊入~就算我想起lego出面影d lego相都幾經辛苦先搵到個好位去影~仲要影唔哂, 搞得太耐費事俾排隊既人嫌我阻頭阻世...太多人迫埋黎做野始終唔方便

我同阿權阿杰就冇收穫, 想買既野又負擔唔起~而fire, eebi佢地就掃左唔少漫畫~正啦, 有排你地睇呀  eebi仲買左佢既o麥頭公仔返去~唔知佢會唔會攬住佢訓覺喇 (我驚edward會呻醋 )

我同佢地成班人都好耐冇見, 所以都有機會起行路果陣同每個人傾下偈~呢d機會好難得架

之後大家都行到攰~又睇哂野~咁又離場喇~見到青蛙cosplay想影低佢地架~點知一諗住影果陣, 青蛙同其他4條友近面向我地行過黎~距離太近喇~影唔成

見到草莓好索呀...但係太多大cam埋去影~我只係影左佢地既側身~我真係好羨慕佢地既樣同身型 (如果我對腳有佢地一半咁靚經已心足 )

大家去完漫畫節後傾完一輪都係齊齊返歸 (除左fire同tina)

我同阿權同tommy撘地鐵去到鑽石山落車~tommy撘巴士返歸, 阿權想上去打陣機~我等埋佢就齊齊撘車返歸

今日都唔錯呀, 但係有d情節令好多人都睇唔過眼...(與我立場無關)