今日同阿權跟新港城團去參觀規劃發展局同國金 (睇銀紙嘛 ) 來回都係5蚊雞咋, 擺明益街坊啦~不過我地冇跟團返歸~因為我地順便去Sogo掃貨嘛, 成間百貨到2/8都有大減價~想搵正野就上9樓或者21樓啦~果兩層d野減得最犀利

我地先去21樓~果樹係運動部~d tee都係60蚊件, Puma袋俾百一蚊就有得成交~仲有好多野做減價...阿權買左件Reebok既tee~而我就睇中左Puma既背心~就齊齊買哂佢地返黎...

之後落9樓~果處仲多野睇~有我前兩日幫襯既Recosuke & Recogirl, 仲有Levis, Miss Sixty, Cons鞋, Tiffany...都有齊齊開counter賣野~起Recosuke & Recogirl睇到我隻色既衫真係嚇死我, 好在果件唔係外套, 唔係就真係dum心口...我諗如果果件外套減價既話可能減到大約200蚊

Tiffany既tee係抵~40蚊咋~但我唔想再買tee, 想去第二個counter睇衫果陣就俾我見到Tiffany牛仔褲~兩折減到110蚊呀!!! 又平又靚, 買!!

跟住阿權唔執輸又起另一個counter (唔記得果間野係乜)　買左件白色tee, 幾好睇架~

本來我起levis見到四百幾蚊既牛仔褸, 都有d心郁, 但呢兩年唔興著牛仔褸~所以慳返

就係咁大家都有收穫~下年一定會再黎

去完附近投注站買六合彩就起翠華食晚飯~果間野係非一般既茶餐廳~d野食好有水準呀  阿權叫既豬軟骨炒麵, d麵係脆架~好耐冇食到呢隻麵喇...我叫既晚餐~有忌廉湯 (落足料架~有西芹有火腿, 忌廉又唔滯), 牛油多士 (係厚多士黎架~仲有奶油味~好味過d咩咩仙踪林n倍呀) 鰻魚雞扒配意粉~有野飲仲有雪糕做甜品呀~食左呢餐覺得好感動...T_T

之後落世貿namco一趟, 玩左舖dmx, 以為佢係日本機~想玩d日本歌, 點知唔係 (但佢早一年前係日本機黎架啵) 徙gas~咁就豪左4蚊俾佢...

剩返一個代幣就用黎玩太空侵略者 (懷下舊嘛) 同埋呢隻game係for你企起樹玩架~d聲仲...哈哈

之後落河內打機~今日我張dm咭上左第9層呀~距離flow又近一步喇

但阿權又俾tower燉左冬菇...落到第二層~下次唔好變左一十呀...

我第一首玩月亮先生~點知得個A...雨景~咪搞喇~我自已玩係過唔到架~我唔夠力捱到咁耐cymbol...

我今晚打得唔多~夠皮就齊齊返歸喇

今日真係好開心呀

今日下晝知道3 shop既Nokia 3230返貨 (係我打去先得知呢個消息 =.="), 咁我急不及待咁落去買~點知果間野條友d態度好到絕頂~大佬呀!!! 袋左二千蚊落你地公司袋架~人地買新機有問題想問又係咁意答下我算, 講到唔清唔楚不特只~好多時佢答既野就係咁: 「你打去Nokia度問啦, 唔關我地事架」

問多佢兩句野都好似嫌你煩咁, 要左部新機後, 我要求將我張SIM咭入落部3230度, 而我媽子想要我部8310舊機, 咁順便叫果條友幫我入~佢同我入完咭後就即刻講,「得架喇」咁樣wor, 係好服務既就應該問:「仲有冇其他問題?」咁樣嘛, 仲有呀~果陣後面都冇人排...幫襯完佢連多謝都唔講聲, 就咁講拜拜就算~今時今日d服務態度做到好似佢咁就真係仆街喇...

唔係因為我係3公司既長期客戶, 部機有700蚊回贈同月費比出面平, 我真係費鬼事幫襯佢...

返到屋企食完飯睇埋「開心賓館」就拿拿淋上網下載Nokia既電腦端套件 (即係一種幫你將電腦檔案入落手機既程式, 同USB用法冇咩分別, 唯一唔同既係佢可以用紅外線/藍牙黎接收檔案)

唔知係我既技術問題定係電腦偵測手機有問題, 點解我試過用紅外線同藍牙黎將手機同電腦連線會失敗架...

冇計~幫唔到手機著靚衫...唯有遲下買咭reader

24/7  (日)

今日約左阿權3點半起超音鼠等, 佢話部dm壞壞地, 加埋gf既1p掣壞, 所以我單拖玩左舖gf就走喇~阿權話想打dm9, 就走附近間機舖打左舖~$2

之後去一間好似叫383既機舖, dmv$4, 諗住做白老鼠試下~點知食1蚊銀...叫個場務過黎睇, 原來呢間野係入代幣玩  好衰唔衰我第一首揀左首street runner, 玩玩下先知個cymbol係壞架~唯有蝕4蚊俾人

行出街口間壽司店買左10蚊兩個手卷出去食~一人一個~再起隔黎小食檔買左隻燒雞翼食, 跟住去德福商場搵個位食哂佢地喇

食完野行左一陣街, 就去VZ喇~今日有km聚~純粹聯誼下同食飯~今年個聚最大特色係有km卡同襟章送

VZ有新既IIDX機~Happy Sky~但果陣玩親既全都係勁人~我無謂獻醜啦~但我真係好想玩架~果部機太吸引喇~有唔少係dm歌, km歌都有 

試過部用腳玩既拍拍機~好過癮~但我自問我對腳比對手遲鈍, 所以我同阿權玩4關經已落敗

差唔多7點等到阿las黎就齊齊去食飯~去左間極細既茶餐廳, 野食少款之餘, 大家叫野食野飲叫得極散~但果個人都幾好野~唔使筆紙就記得哂我地要咩野?! 唔怪得要分批叫野喇...

坦白講, 我最欣賞間餐廳個牌: 「請勿吐痰」個「吐」字有一點架  

之後再落VZ, 網主同靈姐都走先...我玩批薯仔馬拉松, 竟然玩哂28首歌呀~不過果部機既lv比新港低, 如果起新港玩既話, 以我呢晚玩既狀況, 最多玩到第16首...不過都好, 話哂願望達成~但玩完之後雙手痛左兩日

冇耐就齊齊散水

25/7  (一)

今日同阿權起灣仔綠野仙踪食晏, 果個仙女標誌令我諗起Fairy Tales

午餐30蚊一客~有台式野飲 (不過多數野飲都要加錢) 唔錯呀

之後條友話想打舖鼓先去書展~就同佢去附近d機舖玩打鼓機~首先去gamezone~點知部機冇上網~就齊齊玩左舖gf9, 再玩估錯處同彈珠~我對上次玩彈珠係起我小學果陣起台灣玩既, 1蚊舖懷念下都好呀 (果陣連線嬴左既獎品係話梅波板糖 ) 之後我地起去會展天橋附近間機舖搵到dmv, 但係唔多好打~阿權一開局, 發現street runner已經解禁了

跟住去書展~好多人呀~不過都唔使排好耐~我地唔諗住兜大馬路, 搏懵由酒店附近兜個圈就去到會展lu

阿權冇收穫, 而我就買左本英文既心靈雞湯 (大陸書15蚊, 平到爛) 同埋weekend既雜誌, 因為我見到有幾版關於香港迪士尼既記者採訪 (之後發覺真係買得過, 有介紹話漫畫節有lego展, 有地方釣蝦5粒鐘都係39蚊~仲可以二人一竿~咁啱我又想去釣蝦呀 )

我地行左幾粒鐘書展都好攰~之後經灣仔間燒鵝餐廳有10蚊碗魚蛋粉~就夾份食下充下電~d河粉係粗粉黎架~我鍾意呀

跟住阿權話想打多舖鼓~就齊齊去鑽石山荷記, 睇佢打左一舖就順路撘巴士返歸

26/7  (二)

同媽子同埋d姨姨去稼軒飲下午茶, 之後有個姨姨同我一樣話想換手機, 後來同媽子決定起3 shop買部黑色既3230, 原來$2880, 不過長期客戶有分12個月回贈700蚊, 同埋月費最低可用$80果個plan, 都唔錯啦~可惜果陣仲未有貨, 就留名等電話通知~有新手機用喇!!

27/7  (三)

媽子同兩個姨姨今朝9點半去瀝源社區中心上電腦班, 佢地10點半上完堂就起新城市搵我, 諗住去連城廣場間表哥餐廳食粉麵~點知佢12點先開門, 咁媽子好堅決要同我買泳衣, 有個姨姨話馬莎泳衣d質地好同耐用, 又減價~於是起果樹揀左件心水泳衣就要左佢喇

晏晝去表哥食粉麵, 我下晝約左阿權, 媽子同d姨姨都要走喇~到點半就得返我一個, 打俾阿權佢話起隔黎屋整緊電腦, 話照舊2:45起無線等~咁我就起附近行下, 大部分時間起遮仔間專門店試衫同睇衫, 好多衫都減價呀~幾靚架

不過諗諗下我唔想買tee, 想買件短袖有帽既外套~入面有得著吊帶嘛~後來起Recosuke & Recogirl度睇中左件粉紅同淺灰既間條外套~但我唔夠錢買~於是再打俾阿權叫佢一陣出黎果陣借住我兩舊水黎買

去到無線打左一陣鼓, 見到marina~好耐冇見佢喇, 之後阿權要買exam, 我就順便起好運間小食店買雞翼食

之後都係起新城市行下同起西田買返件外套就返歸喇

1st attempt: 本來起前幾日打好20-23號既日記, 點知打打下日記想起kewlbox.com玩online game果陣, 起網上update左個macro唔知咩咩player, 佢install果陣會自動關於所有既explorer~咁我又未save日記wor, 咪搞到d日記流失哂囉

2nd attempt: 30號晚打既, 打完日記啦, 點知error收場, 日記save唔到喇~灰到爆

20/7  (三)

今日約左candy起家樂商場等, 諗住去neway city唱k, 點知佢晏左起身搞到遲左半粒鐘黎到

咁我起等佢果段時間去西洋菜南街附近度睇手機, 間間野價錢差唔多~但我諗都係去返3 shop買喇~因為我係長期用戶~有d型號會有回贈優惠

candy黎到後, 我地就衝去neway city喇~但係lunch k已經滿哂, 要唱就要唱happy hour...去埋百老匯果間neway都係咁~唯有唔唱喇~去左元綠壽司食晏

之後同candy行下街, 經過3 shop有d型號有學生優惠: sony ericsson k600i, nokia 6680

但呢兩隻我都唔o岩, 因為k600i係3G電話, 好多人都話到目前為止3G電話唔好用, 就算二千幾蚊成交我都唔會考慮

6680~太大舊喇, 拎上手都唔方便~同埋減左都要$36xx, 負擔唔起

經過衛訊有免費手機雜誌拎, 入面介紹最近幾個月手機既所有功能, candy叫我刨熟哂佢先再作決定, 我都係咁話~返去慢慢參詳下

三點鬆d果陣行街街行到攰就去kfc坐下~冇耐candy要走喇, 因為佢要去馬會見工

咁我就去德樂搵阿權, 隻vest盃要作最後衝刺喇~要呃既都呃哂~一定要玩我最怕同最憎玩既歌: 神羊同heaven's cocktail黎呃分~點知德樂部鼓sense得唔好, 所以玩完一舖就走喇

之後齊齊去波鞋街行下,  再起石磨坊食芒果沙冰, 下面仲有涼粉做底~不過砵野一上枱真係好似成舊冰山咁: 「請小魚和小權將冰山劈開」

嘆完甜品再去聯合打vest盃, 打左幾次呢兩首惡啃野我真係冇心機再打落去~點知臨走果陣撞到pp同芷霞wor, 咁我入錢叫pp幫我打盃~由五千幾名跳去二千幾名呀~可見實力既差距

22/7  (五)

今朝九點就同阿權去到漆咸道南間東瀛遊食自助早餐, 有阿權最心愛既魚肉燒賣呀　

九點半就上車~去一日遊嘛~可惜落雨呀, 好麻煩呀~就算個導遊話「貴人出門招風雨」都係咁話

去左山頂再去茶具文物館~阿權去過文物館好多次喇, 咁啱地下有兩部電腦, 咁佢就起果樹上網, 我就四圍參觀下喇

到左一點, 就去route 66旋轉餐廳食自助午餐喇~野食又好環境又優美~真係一個好既調情景點

但只得一粒鐘進餐時間~食到有d雞手鴨腳~個導遊之前仲話去埋廁所兩點鐘出黎~食都唔夠時間仲點可能?! 所以到左兩點d人先去廁所囉

之後去淺水灣同赤柱, 至在影下相~但今日去每處地方既逗留時間都係約半粒鐘, 所以諗住同阿權去埋赤柱個市集都冇時間囉

團友起尖咀DFS各自解散, 可以起果樹睇下野既~一場黎到有名牌野點會唔睇, 眼紅下都好

不過精品果邊就係咁意睇下就算喇~唔想同d自由行迫埋一堆...

之後去左河內打左一陣機~起朦朦鬆鬆既狀態下打左首vest盃新歌: street runner~估唔到一開波到cymbol位先甩~仲托賴加左0.11分~78% sp~但講真, 後面都幾難...唔識打真係冇命~我都係亂打咋

跟住就齊齊撘馬鐵返歸食飯

23/7  (六)

今日冇出街, 夜晚8點睇皇馬對北京, 魯爾比兩年前殘左, 又見唔到碧咸一面

14/7  (四)

今日下晝媽子朋友個仔黎學琴, 佢起幼稚園果陣就學過既~但係之後冇咩興趣學, 而佢阿媽就想佢學返, 咁我盡我能力幫下佢~所以今日佢阿媽以去同我一齊玩既名義帶佢出黎, 當我同個細路傾上兩句後, 我同佢阿媽就同佢講跟姐姐一帶彈琴好唔好, 佢都幾大反應, 係咁話唔好~好似驚左部琴咁  後來經佢阿媽俾左佢甜頭後 (佢同佢條化骨龍講:「如果你跟姐姐去學半個鐘頭琴, 就有能同姐姐一齊上網玩電腦」佢個仔係好鍾意玩電腦既  同埋佢阿媽氹住佢先, 話會同佢一齊學琴) 佢地就齊齊睇住我教琴, 個細路算好記性, 指住個音符問佢係咩音符, 高低音譜號果d都記得~我開始懷疑緊佢開始唔使彈book 1都得喇~但係佢唔太識搵音, 同埋冇咩耐性...後來教左佢半粒鐘後, 就齊齊玩電腦 (係佢玩多架喇) 佢係咁玩佢玩開既「小朋友齊打交」, 之後個姨姨 (即係佢阿媽) 又帶左佢個仔個同學黎, 果個同學個阿媽話想佢學琴, 因為佢好好動, 好鍾意打波玩電腦, 同埋佢個人好冇耐性~所以佢阿媽想培養佢對較靜態既活動感興趣~即係想佢藉住學琴變得心平氣和一點...佢以前都學過一兩堂既, 但唔知點解後來又唔想學wor, 咁俾佢地玩一陣電腦就學琴啦, 點知條o靚仔打機仲緊張過之前個細路~我諗教佢彈琴果陣唔多唔少都會有d牛脾氣頂喇~之後經我同佢地家長既管束下~個細路就返埋位坐黎俾我教琴, 我驚新黎既細路冇興趣學琴, 就諗住彈d歌仔過佢聽, 於是我問佢想聽咩歌, 佢就話想聽快樂頌  之後我叫佢阿媽俾佢聽多d音樂, 就借隻朱天麟CD過佢地, 希望咁樣可以培養佢個仔對音樂有多d興趣啦~

不過小朋友既心理我絕對理解既~我細個果陣學琴都冇咩耐性架~仲多次諗住放棄添...

15/7  (五))

今日DM/GF又有新division, 我升左去第8層lu~有膠遮玩啦  不過我打呢隻歌仔既狀態好飄忽, 有時前面段斷手係咁食good, 可以衰到得個A尾  

晏晝同阿權過一過河內玩下dm同gf~去到見到部小新拍拍機同DMX1代入左黎, 幾年冇玩過DMX1, 就入3蚊雞玩下, 點知得兩首歌~搵笨

跟住去左一陣金星~之後返去河內果陣...好消息!! dm同gf都減到4蚊舖  以後可以多d去河內玩喇~d機機性能又好

之後都係齊齊食晚飯~去中港城睇下「開心賓館」

睇完電視出到去大家見口乾, 起檔口買左芒果西米露飲, 5蚊雞係抵呀~又好飲

17/7  (日)

今日約左Kitty (佢係我以前起太古城住果陣識得既朋友) 兩點起旺角間body shop等, 齊齊去neway city唱k,  講真我都有成半年冇唱k喇~識得我耐既人就會知, 我係起臨唱k前一晚係最落力聽中文歌既, 平時都少聽~去到唱k之餘, 下晝3:30開始有自助下午茶食 (我指既自助係得雪糕班戟, 牛油 粟米同jelly食~好過冇啦 ) 我想食個雪糕班戟就犧牲左10分鐘唱k時間~要出大堂排隊等人整~仲要得一個人手...睇黎呢個情節正反映人想要一樣野係要付出代價既

話就話得兩粒鐘唱k時間, 但最後都延遲左個半鐘先cut我地wor, 有野食包兩杯飲品, 平均一個人66蚊~都ok啦

之後齊齊起波鞋街, 瓊華同IT Square等地行下, 我覺得IT Square三樓d遮仔衫都幾好睇呀  不過我夏天都夠衫著, 唔知買唔買好~同埋我想草多個錢留返黎買冬天衫...我d冬天衫就真係少喇

夜晚去左小魚滋味食飯  之後起3樓IT層睇手機~我想換手機呀~用緊果部係8310~想換機係理所當然~不過未諗清楚自己想換咩型號既機囉~但應該離唔開Nokia同Sony Ericsson呢兩隻牌子架喇

之後Kitty想行旺中, 同佢行左一陣之後佢都要走喇~佢聽朝要返工~咁我手痕入聯合打左舖機都撘巴士走喇

18/7  (一)

今朝約左阿軒起屋企附近等, 同我去浸會交學費, 今日係deadline喇 (其他大學都冇咁快要交錢架~就算讀緊浸會degree個Kitty都冇咁快要入數~唉...收錢就快~但係做野效率就慢~點得架) 交完錢就起行去樂富個巴士站匯合埋阿權, 佢今日返IVE拎成績表~之後齊齊去五十嵐食晏, 我應承左阿軒話佢生日請佢食飯~不過佢生日都過左兩個禮拜lu~哈哈  之後去河內打機~想阿軒拉我玩gf過wild ride, 佢話較sra易d, 咁我試過真係易過原本~仲冇見過紅添...一過到就加左幾分~佢差唔多6點就走先, 因為佢約左人~咁阿權睇我玩完小新拍拍機後就過金星喇~佢想玩dm8, 而我就玩多舖gf~fire in the dark 計sp~不過得70%

講真, 今日打dm狀態唔好~通常起咁既情況下我就會玩多d gf~反之亦然  

行行下先醒起我唔記得還返部mp3機過阿軒~因為今朝佢借左俾我同阿權聽~主要係想聽首flow~勁好聽呀

聽日起奧海城2期有漫畫節同cosplay既活動~之前有免費漫畫節飛拎~可惜聽日我老豆落黎香港, 所以我黎唔到~就直接俾阿權同eebi佢地約時間地點喇

之後同阿權起紅磡撘火車返歸~睇下車站個鐘先知自己隻錶慢左半粒鐘...

夜晚阿軒打返黎, 話聽晚等我返到屋企果陣call返佢, 要物歸原主喇

19/7  (二)

今日老豆南下香港黎做智能身分證同拎特區護照~本來約左11點起沙田美心等~點知到11點鬆d果陣佢個親戚先打黎話老豆今朝唔多舒服, 咁佢抖下一陣見好d就落黎~媽子有叫佢話唔舒服可以改期, 不過佢話唔使~咁我同媽子就齊齊起酒樓等佢同個親戚黎...佢地點幾黎到, 但我同個親戚好快就走, 因為我起2:15要返浸會見miss (英文科未符合學校既要求囉~佢要求平均2.3但我得2分, 俾上學期累死, 拎得個C-, 下學期都有個C+既) 而我個親戚就要去灣仔人民入境幫佢個仔搞證件手續~咁我見完miss就過去搵佢, 就齊齊落置地廣場~因為我老豆個袋入面爛左, 佢話置地有專門店, 想起果樹買返一模一樣既袋~點知果樹甚至全港都冇分店...

跟住我個親戚想行旺角~就同佢一齊行, 佢都買左唔少野~主要都係買俾佢個仔同d親戚~起藥房買野啦, 佢想買藥油果陣, 我地明明聽見個店員話一樽野$25架, 咁佢話要兩樽~之前要買野既夾埋120蚊,  點知果個店員話夾埋$190~我冇聽錯呀下?!!! 之後我問返佢, 一樽藥油要幾錢, 佢先糾正返盤數...唔好睇人地個樣唔似本地人就呃人至得架, 我地心水好清架~以為佢上面落黎就流架咩...  總之, 唔理係我定係人地俾人呃錢~呢挺咁既野我一定最睇唔過眼架喇

之後一人起許留山飲左杯野同食左個糖不甩~之前媽子同老豆返左屋企休息~我地想撘巴士返屋企果陣, 佢地話出去上水搵佢地, 因為老豆要起果樹搵朋友, 順便一齊食飯~

食飯果陣老豆問我係咪想換手機, 原來媽子頭先起撘車果陣同我老豆講我想換手機~咁佢俾左三千銀過我自己遲下慢慢揀

食完飯我老豆同個親戚就返深圳喇

BTW, 老豆身體都唔係咁好, 有d擔心佢

之後我返到屋企沖涼果陣先醒起原來我唔記得左打俾阿軒, 跟住佢都有打黎~原本我諗住沖完涼唔想突登落去, 但係我應承左佢今晚要還返部mp3機過佢~就要還~佢都好堅決話應承左人既野就要做

落到去還野俾佢~順便傾左大半粒鐘...