13/8   (日)

琴晚vivian臨時急call, 想我今日陪佢去黃埔吉之島做「神秘顧客」

於是今日下晝就同佢一齊去果樹扮睇野啦~佢個duty係問下d戴住綠帶既sales有關貨品既野/問路, 從中check下佢地既服務態度係點  整體黎講佢地係笑容唔夠同唔夠親切, 基本禮貌係有既

vivian 16號生日, 起Italian Tomato買左個紐約芝士蛋糕俾佢 XD

今晚會同小咪同嘉寶出太古城補睇冰雕, 小咪話大約4,5點會打黎, 點知到5點幾同vivian分開果陣都仲未打黎

咁我打俾佢啦, 嘉寶起果個時候都打黎問我地點, 大家約定出黎~我就由黃埔行去尖咀撘地鐵, 大家既時間夾得好啱~我到太古果陣佢地都啱啱到左

之後第一時間梗係去睇冰雕啦~嘉寶個妹妹又起冰雕果樹做兼職, 所以我地又可以免費入場了~再三多謝嘉寶

入面話哂係-5度, 話一啲都唔凍係呃人既, 不過我一向都唔係怕凍果類, 所以只係雙手勁凍囉 (我雙手係最易凍既)

啲冰雕真係好靚呀, 仲有滑梯玩...玩完就要出返去咯~一出去對腳有少少唔識郁, 同埋聽到個細路喊得勁大聲, 因為玩到唔捨得走囉...

之後去food republic入面食火鍋啦~大家都係第一次試「一人一鍋」

食飽飽就行UNY喇~我同小咪分別同miffy同monchichi影左好多相相呀 ^3^

另外嘉寶同我都買左個藍色miffy袋仔~之後貪食既我梗係落B1個大大超市買少少野返去啦...

行到11點幾就返歸lu~

14/8   (一)

下晝pp打黎, 原本今晚約左話睇「魔蟲口入」嘛

約左6:45起奧海gamearea等, 咁我起3點半教完學生起附近大家樂食個tea同玩下NDSL都係時候出發

我黎到佢已經到左啦~之後睇佢玩左一陣KOF...就去百老匯買飛喇~睇8:10似乎太趕, 於是睇9:50果場

跟住就落金牌坊食野喇...食完野再同佢NDS大戰, 好左好多新炸彈人既小遊戲呀, keke

佢有好多小遊戲都未玩過, 有啲遊戲連續同佢玩左兩三次就爬左我頭 =.="

真係好好玩呀

之後去睇戲啦, 劇中同我預期既差唔多, 有啲似「生化危機」, 但我都係覺得冇咩刺激度

跟住pp同我行去旺角火車站就返歸喇

P.S. 今晚真係多謝哂 XD

15/8   (二)

今日約左阿權去尖咀~晏晝試下去源記食, 叫左個好耐都冇食既常餐

之後去河內打機, 呢排阿權係咁玩gf, 仲靠bas同adv啲歌仔係咁加分添

佢好快600分架喇, 我係時候舉白旗了

之後咋型去海港城大家樂叫左杯happy hour奶茶黎飲, 實際目的係搵地方俾我地玩NDSL

阿權有啲小遊戲都未玩過, 但一take過已經勁過我 不過佢有啲小遊戲一定唔夠我黎

之後同佢去金龍船拎西餅~就陪佢去做龍珠閃咭交收喇

撘火車去到大圍黐件西餅黎食, 食完就返去學琴啦~點知一起大圍上車, 我地分開左呀, 唯有扮口型話起沙田圍站等啦 ^3^

啱收到miss電話話冇人接佢個女去游水, 所以學琴要改期喇...

於是我博懵同阿權一齊出閘順便起乙明果樹吉魚蛋食, 食完就返歸lu

P.S. 好野!! 阿權借左隻「軟硬製造」俾我睇喇

16/8   (三)

唔...今日約左12點起火炭見琴行文員~點知11點鬆d一上小巴俾埋車錢...果個小姐打黎話in我既馮太臨時有事話延至2:30先接見wor 俾左成7蚊撘小巴無理由落車, 於是硬住頭皮去左火炭先算, 好彩小咪起果頭返工, 而咁啱佢今日可以陪我食晏, 好在有佢咋 ^3^ 琴晚聽佢話果間工業中心大到嘔泡, 咁我諗住預鬆d時間去探路, 點知一落車行唔夠5分鐘已經俾我搵到所在地

果陣都未到11:45, 死啦~仲要等多9個字...又冇帶NDSL出黎, 做咩好呢 之後起出面行左條街口, 俾我搵到個商場叫沙田商業中心, 仲有間Namco公司開既機舖添, 太好喇~唔駛悶死喇...

間機舖有好多幾十年代既食鬼公仔, 任天堂遊戲同太鼓公仔既珍藏, 好靚呀, 最衰係非賣品啦!!

入面都有啲MG玩, 但除左太鼓8, 其他都已經唔係新機: 有DM10同Mambo Agogo

之後到小咪去御膳廚房食飯, 我都知今日套見工衫睇落有d唔自然架喇 =.="

食完飯再出去照下塊鏡, 雖然我幾鍾意上身果set衫, 但一襯埋下身條裙...頂!! 個死人樣好撚肥呀...我睇見都唔順眼

之後準備見工~過幾日再同佢傾啦~我2:20就去到公司, 個馮太in我~佢in我既內容同我預期既大失預算!!

佢個樣, 一睇就知係一個有修養同內涵既人, 睇落都幾高貴架~但係一黎佢就叫我用普通話講下我既家庭, 呢個都ok既~但一叫我用英文講下我學琴生涯就聽到佢地一頭霧水 =.=" 最令我啞口無言既係最後佢問我對小泉純一郎參見靖國神社有咩睇法wor

我唯有以今日冇睇報紙既借口黎逃避回答呢個新聞, 咁佢問我對其他新聞有咩意見, 我就答左鋼琴神童沈靖韜果單野

雖然佢話之後有消息會打黎叫我second in, 但睇今日既表現應該無機會喇...

6/8   (日)

Tetris DS lv 20!!

今日下晝首先同阿權起銀星打一陣機, 同埋例牌食燒雞翼同飯糰~之後佢約左鄰居起德福, 還返d PS帶俾佢, 順便借左幾隻我玩

之後入VZ~今日係一年一度既KM夏祭 我地去到都有唔少人到左, 差唔多全部都見過哂, 冇咩新人黎

多得pp借黎既「神棍」...十世冇玩Let Me believe俾我開齋過到~可以考慮用呢隻歌計sp

夜晚去食飯之前~pp收到龍龍既電話話過緊黎, 咁我地等埋佢~等待期間就開NDS炸彈人大戰喇!! 有patrick, pp, ice同我~多d人對戰真係好好玩架

之後去食台式野, 25蚊包埋台式飲品, 抵啦

醫完肚再去VZ~玩到10點幾就同阿權走lu...

7/8  (一)

今日12:45pm去新世界間琴行見老細~情形比我預期既好唔同: 琴行counter坐三個人, 其中一個係老細, 佢話今日約見我係諗住見下我個樣, 同埋問我一d問題~佢話之前有好多人申請呢份工, 經篩選抽左幾個人黎見, 佢話如果請我就起4點打黎, 唔打黎既話就係冇行了

見完工就去尖金打一陣機, Let Me Believe呃分成功!! 加左1分

之後返馬鞍山教琴, 點知今日混吉!! 本來個學生係3點黎學琴, 到3點3都未見人, 於是叫潘小姐打俾佢家長催催, 原來家長同個細路齊齊出左香港, 唔記得黎學琴啦...唯有下次補堂~跟住走人, 好鬼肚餓, 去左大家樂食燒鴨瀨

等到4點黎都冇電話黎, 份工唔請我了...之後起大家樂玩一陣NDSL, 再去耀安間安老院申請活動幹事既職位, 要輪班~夜晚係on call~不過一個人有9k, 係臨時工黎, 由9月做到出年2月~填左資料就返歸了

8/8   (二)

今日阿權黎馬鞍山飲下午茶, 之後再出沙田~去恆聲再拎張EZ-Flash俾師傅睇, 今日首次見到個肥仔, 佢好健談, 同埋好熱心咁幫你試機, 佢知我個EZ-Flash既save問題搞左成個幾月都未解決, 又話要我行多次黎俾佢地check真係唔好意思, 佢地既服務真係好呀

之後同阿權行左沙田咁~到5點半小咪打黎就出去九龍塘join佢啦, 約左今晚去睇冰雕

佢整左個頭, 又幾QQ wor

去到太古就上food court食鐵板燒, d餐由$4x-9x不等, 唔算抵食同埋份量唔算多, 勝在場景好似去日本食鐵板燒咁, 你面前見到廚師親身燒野俾你食, 同埋d汁真係好正!!

之後諗住排隊睇冰冰啦~但小咪著左短褲所以唔准入場了, 大家都唔醒起呢件事添...諗住臨時買條長褲頂檔但冇心水, 唯有下次再去啦 XD

跟住同小咪行街街同拎我部手機黎喪影相, 今日我勁唔上鏡, 個樣唔知做咩樹殘得好交關!!

到10點幾就同小咪撘682返歸喇

10/8   (四)

今朝本來同阿權去睇「死亡筆記」, 但阿權臨時肚痛遲左出門, 買唔到飛了~唔緊要啦, 最緊要你個人無事, 過幾日再睇啦

兩個行埋一齊如同老弱殘兵, 一個有咳另一個對眼dup左一半兼且鼻敏感 =.="

於是阿權進行佢既例牌提神方法, 入FZ打機囉

之後去大家樂食晏~食完就去荃灣喇...今日去果頭係有目的既

路過熊貓打機, 途中pp打黎問我地今晚去唔去新屋玩wor, 唔去喇~一來之前約左阿媽今晚出去食飯, 二來佢地成8點黎先上樓, 冇咩時間玩啦, 都係等下次週末假期先去啦

之後去荃豐間舖問下阿權手機入面個記憶咭, 早幾日佢張咭load唔到野呀...於是將佢張咭交俾舖頭拎去廠修理喇

再起荃豐行下, 見到紅白機既發聲遊戲公仔版, 出左一排都唔知添, 得返display既Donkey Kong, Balloon Fight同Ice Climber, 見有遊戲音樂聽, 我就要左隻Donkey Kong, 而阿權就買左Ice Climber

再撘48X出返沙田幫Laurie買跳舞毯, 過幾日俾佢啦

之後6點鬆d去UA諗住預售星期六早場既飛, 好多人 X_x"

都係到時先買啦, 再起UA入面上網, d人起樹睇膠登睇到我撘唔到免費車

下一班車要8個字後先到, 唔等啦~於是阿權送我去沙田圍站撘馬鐵

夜晚約左阿媽起新港城新開張既大家樂食飯, 約左佢7:30, 點知...

我等到7:45都未見人, 打去手提都冇開...

後尾見到阿媽買完野食, 頂!! 原來佢冇入黎搵我...跟住佢又冇望過黎, 睇唔到我啦~我想揮手叫大家樂d人, 諗住撘佢叫我阿媽黎, 又冇人理wor, 後尾阿媽突然行近左少少, 但都係見我唔到, 知唔知我點做呢...?

我拍枱, 係呀!!!　好大聲果隻呀, 跟住大叫...側面成幾個人望住我呀!!! 跟住阿媽咪見到我囉, 真係保佢大呀!!! 激死我...都唔知佢咩事懵到上心口, 出面見唔到我唔識入黎搵既!!! 以為我冇咁早到wor, 真係吹BB!!!  我果陣真係激到想反枱!!!

阿媽初時見唔到我所以買左外賣, 而我又食返我最愛既巴西燒春雞

3/8   (四)

雖然我唔希望今日打八號風, 但出到街感受下就會覺得個風根本唔只係3號...

呢兩日起身後都有睇下勞工處個網有咩工可以俾我apply, 今日見到個琴行門市部, 都啱我做既, 於是打去勞工處幫我轉介, 12點幾打去, 就叫我2點去見, 冇野呀下?! 佢話要帶埋張相, 老細係睇wor~咁我話冇相, 要影埋晏d到, 就約左3點啦

之後搵兩三年前既相頂住檔先, 執埋野就去新世界間琴行見工喇, 行去經海旁真係好大風, 吹d風係舒服, 但颱風襲港襲埋港人就真係唔方唔舒服!! 我都俾佢吹到個身郁郁下呀, 你話只唔只3號呀?

去到琴行, 個女人叫我填資料同埋問左我d問題~佢話做既話就起佐敦同荃灣兩邊做, 一星期內有結果

之後行返去河內打一陣機, 再去加連威老道想買條腰帶黎襯, 今日著埋果件白衫黎, 但拼鏡果陣覺得唔帶腰帶仲好睇, 帶左只會影到我個大肚腩...

睇完野都係4點鬆d, 阿權5點去旺角交收完先黎, 於是去海港城大家樂歎杯happy hour既奶茶同埋睇老友寫老友喇, 幾好笑wor, d文筆深度都ok既

5點半再去河內搵阿權, 再黎個DM比賽, 我仲試過揀錯歌添, 佢話遺反賽側wor, 但我玩3首都高分過佢法定既4首, 點計呢可?

夜晚去叫送食飯, 好耐冇試過咁啦

今日打機壯態都唔錯, full左三隻歌: 數碼3 (得84% =.=), The Sun Shines Through Rain, 仲有一隻之前full過啦, 全部都係易歌  又第一次S左月光碟, 今代未著燈既歌玩得好過以前, 仲有~好似No More Crying都成個幾月冇玩, 本身都計sp既, 今晚玩返都係73%, 再升少少真係加分架

10點鬆d就同阿權起紅館門口等...等咩呢?

就係等軟硬今晚開完show排隊買野既時候喇~其實阿權諗住要個軟硬袋wor, 上次唔夠錢嘛, 不嬲買野再+$80就可以換袋, 今次就買左頂帽, 佢原來諗住將呢頂帽擺上yahoo拍賣, 不過我都好鍾意, 佢話平d讓俾我好了...咁珍貴既野唔好賣啦, 留返自己珍藏好過, 話唔定N年後有意想不到既收穫 頂帽同件tee真係好襯架

一件軟硬既外套成千千聲, 又冇咩logo, 都俾人掃哂貨, 香港人消費力真係太強了...

4/8   (五)

今朝發神經咁朝早7點就醒左 =.="

之後晨操玩左陣NDSL, 就同媽子去飲早餐, 之後去pk超市買野, 好多人同d車塞住哂, 疲勞既我唯有係咁依依鵝鵝...

早起身真係攰到頂唔順, 返屋企又訓啦, 到12點幾~琴日新世界琴行果邊打黎, 叫我星期一12:45再去見一見個老細wor, 同埋帶埋張近照黎, 佢話果張相同我而家個樣差好遠wor, 其實果張相已經係4年前架喇...

之後打去恆聲睇下我張EZ Flash IV點樣樣, 佢話可以去拎wor

咁我去影完相就落沙田恆聲拎返~但好似都係save唔到game, 唯有返屋企format張miniSD同埋update個EZ Flash Loader入過哂d game試多次啦

之後去圖書館借左兩本有關教琴心得同埋了解小朋友彈琴既書入手, 跟住撘免費車返歸啦

28/7   (五)

下晝約左laurie起學校門口等, 今日佢帶左愛犬黎~經laurie早兩日悉心同佢剪毛, 中間剷左個十字同側面有個呀, hehe

但係同親Lui Lui影相都周身郁囉, laurie叫左佢好多次望鏡頭都好難叫得聽 XD

我今日體驗過背住20磅既狗出街, 真係好重...

跟住齊齊去hall canteen食下午餐, 同埋等vivian同tony黎

tony就好, 買左張G6L, 睇佢個開機選game畫面, 每隻game都有小icon, 真好

之後佢有事走先, 我就同laurie同vivian起學校周圍影下畢業相, 係時候還袍lu

29/7   (六)

今晚同琴miss同埋佢d學生去大會堂睇教佢琴既阿sir--毛翔宇音樂會

睇張poster見佢個樣好後生, 但真人出黎睇落有d殘, 可見做音樂家既生捱絕不簡單

全堂滿座呀, 犀利!! 佢d動作基本上係仲勁過李雲迪, 同埋彈d激昂歌曲果陣係彈到面紅

佢足足演奏左兩粒鐘, 聽miss講今2算乖架喇, 上年佢演奏左三粒鐘呀

之後同miss撘681返家, 同miss傾左好多偈, 同埋知道阿毛sir既一啲有趣事情 XD

31/7   (一)

上星期直到呢幾日既主要工作都係星期一起琴行教一個學生, 於是我諗住搵其他工做...有需要可能會調時間

有時申請工係via醫貓既, 我發覺自己冇scan張8級鋼琴證書落部腦度, 於是返學校scan左佢喇

發覺自己仲剩返48個print quota, 於是print左48張白紙留返自己用

3點返到馬鞍山教琴, 問返條o靚仔上次既野佢都識答, 果然聽話wor, 不過今日教多佢少少新野佢好似唔多明同埋唔太掌握到, 開始擔心自己教得佢唔好...

教完琴就出灣仔搵阿權, 約佢今晚去動漫展, 原來大家都唔諗住去, 但佢早幾日起高登見到有小丑膠賣, 就想出去買

所以又可以食多餐鐵板香蕉船喇~之後去會展, d膠賣哂呀...仲要唔返貨, 令到大家好失望 

唯有周圍行下, 唔算多野睇, 最有得著既係有人派左戀愛爆棚既免費試玩碟俾我地

之後搵個角位坐, d人一住坐就一住做d無謂市場調查囉

坐完之後仲有幾個字就閉場, 發現有個核心仲未去, 果樹先係最多野睇既, 最後就買左個$20禮品包 (有芝si菇bi既精品) 同埋老友寫老友 (本書係蔡瀾寫架)下集, 阿權買左上集呀

之後去OK買野飲完就返歸喇

1/8   (二)

Touch! Bomerman Land打左一星期爆機喇!! 好開心

今晚學琴, miss知我由細到大彈琴好似成座山咁, 到而家都係, 於是佢叫我試下企起身練琴

彈琴唔郁身係好辛苦既

考到演奏級既路, 比起我由二級到考八級果陣難得多, 我都要爭氣喇

下晝約左阿權出尖沙咀, 首先著畢業袍起尖東海旁同埋星光大道一帶同佢一齊影相, 帶埋miffy出黎影埋全家福

著住件袍影相惹黎唔少目光 =.="

之後起河內打一陣機, 就行下加連威老道~跟住進行大家既第一次...去大家樂試下個鐵板香蕉船, 我當然係食巴西燒春雞啦, 好好味呀...

食完飯7點鬆d就去紅館lu~睇下出面賣軟硬紀念品既攤位嘛, 軟硬既紅黃機械人卡通版出場搞到好多人排隊認購...排左成半粒鐘先到我地呀~於是我地一人買左件黑色軟硬紅黃機械人卡通版tee, 好得意呀, 睇落個style有d似Ape, 不過件野當然靚過Ape既tee好多啦 係買呢兩樣啦, 大家身上已經冇錢買其他野喇

跟住入場啦, 每人獲派一個面具~阿權同我都係有阿Jan既面具, 好想拎埋Eric既面具草埋一套呀

海峰: 「阿葛, 我地成十幾年冇傾過偈啦...」

今晚係黎明做嘉賓

個演唱會11點就完, 比我地預期既短, 不過都係good show黎

之後起館內坐位四圍望下有冇d俾人拋棄左既黃色面具, 靠阿權既好眼力+好彩俾佢搵到兩個黃面具喇, 咁樣大家都有一套面具啦, 好野~!!