1/9   (五)

今朝10點要去到葵芳社署見工~我知道係撘40X出去再轉地鐵就到, 通常我都會預鬆時間, 所以8:30就出門口啦~我一上車就大安旨意起樹玩NDSL玩到去總站落車, 我都知幾時就快到葵興地鐵站, 跟住...我都奇怪點解架車行駛左成五分鐘都仲未到地鐵站既?! 弊喇!! 我唔醒起原來呢架車幾個月前已經轉左葵涌村做總站, 唯有死死氣起果樹落~望下隻錶, 已經9:30啦...今舖仲唔死?!

一落車好彩就好快搵到架73X撘去葵芳, 但第二重障礙出現喇!! 我見工果樹起新都會廣場果邊, 張野寫住係興芳路嘛~同埋73X巴士路線係標明興芳路有站架, 於是我認為差唔多到果陣問下個司機, 但呢個司機話唔知呀, 話葵芳都應該起下個站落wor (態度好撚差呀 =.=") 頂!! 一落去仲要行成兩分鐘先去返葵興地鐵站!! 果陣已經9:50了

之後好好彩好快去到葵芳新都會廣場35樓社署, 啱啱好10點呀,  真係好好玩呀...

一入到去, 個場景令我有d驚訝...比起我上次起灣仔所見既好唔同, 今日呢個場好似去左輪街症咁...咩老人槌麻甩佬槌乜都俾我聞到哂...有d唔容易先知道去幾多號窗幫我轉介interview, 跟住有個有d名牌傍身既女人同我對下資料, 俾埋d正副本過佢

之後面試, 呢份工既duty又係起我預料之外, 又係唔同灣仔果份做下電腦之類果隻~今日見呢份係同叫我做打雜冇咩分別, 最離譜係叫我拎成個手提行李箱既file過隔黎3樓office, 記住係冇lift架啵, 即係叫我一個人抬個箱上3樓囉, 我得知後就唔會對呢個面試太認真啦, 我根本唔想起呢樹做~淨係見到門口一大班人已經唔開胃啦...

in完後落fz打一陣機,  之後兜完葵涌廣場再去百佳買我同阿權兩個人食既公仔麵就撘47X去佢屋企啦, 可以睇「青出於藍」大結局回味下喇

大約兩點就撘87A出奧海喇~借左炸彈人卡帶俾阿權玩左幾日, 都已經追上我了

落左車就去gamearea打左一陣機, 之後再去麥記食少少野同玩NDSL

到傍晚出旺角行下, 行到皆旺~阿權考慮買龍珠既發聲, 同時經過一間玩具店見到Balloon Fight既sound figure特價賣5蚊 (又會咁抵既 ) , 於是阿權買左落黎俾我

之後去左一間幾靚既餐廳 (唔記得叫咩名喇 =.=") 食左個二人餐, 有闊落卡位坐又有電視睇

跟住去一陣聯合就返歸喇~整體黎講, 今日都開心既

2/9   (六)

下晝兩點起旺角雅蘭約左起英國讀書返黎既Joyce, 成5年冇見佢喇

咁耐冇見, 見返梗係開心啦~大家都多野講左呀, hehe

本來想去倫敦大酒樓飲茶, 但係冇位呀, 唯有去朗豪坊食下午茶, 之後行下朗豪坊~其實行果樹都唔錯丫, 果樹有d舖頭都有d特別野睇既

聽阿Joyce講, 佢都有好多野想買返去英國, 當然有一半係幫人買架啦...

估唔到佢仲好鍾意睇玩具公仔 (不過我都係啦 ^_^) 就帶佢去信和10樓睇玩具啦, 之後行信和同埋皆旺, 對佢黎講都好難得架~因為英國都冇信和同皆旺呢類商場, 講到日版既NDS同PSP就更加不在話下

好快就到晚飯時間喇~問下佢想食咩之後, 就同佢去小魚滋味食飯, 哈~佢好鍾意食甜品架~所以飯後起果樹叫左個Q果雪糕食, 我之前都食過, 好好味呀

食完野冇耐就各自返歸了, 希望你臨走前可以見多你一次啦

4/9   (一)

今朝11點去九龍灣社署 (宏天廣場) 見工, 今日個地點有d麻煩, 因為撘完89D起九龍灣地鐵站落車後要起德福巴士總站轉224M先到呀...

估唔到近工廠既宏天廣場個feel有d似金紫荊廣場, 仲俾我撞到成班自由行起果樹參觀添 =.="

對住lift lobby仲有幾排沙發, 好似酒店咁, 正到爆~咁梗係坐到差唔多夠鐘先上去...

入到去例牌俾人核對資料同埋做打字輸入測試, 之後去面試...結果都係聽天由命

之後撘返車出德福, 心血來潮想起ok買杯珍寶筒黎睇下抽唔抽到軍曹精品, 卒之只係抽到張1蚊既雪糕coupon

食完雪糕就撘89B出沙田搵阿權, 由於佢阿爸煮左麵俾佢食完先出黎, 而我又食雪糕飽, 所以我地既正餐係下午茶

起大家樂叫完野食, 阿權出去拎...咁啱我隔黎有人坐左, 當佢返埋位果陣, 連我對面個位都俾人坐左, 搞到我地兩個打斜坐...=.=" 我唔想以後有呢d事發生呀...

之後大家都係玩NDSL, 到5點幾就去沙田診所睇心電圖報告呀, ok丫 ^_^

5/9   (二)

今日下晝見左阿權一陣, 陪佢去麥記食下午茶玩一陣NDSL, 到4點幾佢要出葵芳交收喇

送左佢去撘車後, 自己去大家樂食下午茶, 之後玩NDSL喇~到6點幾就出旺角喇, 今晚約左小咪, 嘉寶同阿娟食日本野

但係, 我希望日後大家約食飯可以安排得好d...唔好到臨時先有呢個話呢間野唔好食, 一陣又有另一個人話另一間野又唔好食咁

不過呢, 大家keep住約埋一齊食下飯吹下水真係好開心既

不過最終去既水道橋食既日本野都係麻麻, 我地已經將之稱作「水道渠」

估唔到嘉寶咁鍾意玩NDSL, 佢好鍾意玩wario touched呀~仲想借我部機寄居添

大約11點齊齊送嘉寶撘87D返hall後, 我地就撘車返歸啦

7/9   (四)

同媽子同auntie去海港飲完下午茶後, 我就去富寶間琴行傾下, 因為我諗住返工果邊應該冇行, 所以去果樹問下有冇教琴同補習俾我接...其實咁樣都好, 等我有多d時間彈琴去考演奏級同埋預備考IELTS

潘小姐話補習果邊9月full哂, 要到10月先有...咁我等啦~但教琴就有兩個學生俾我, 佢話如果我得既就可以聽日黎同佢地上堂

我唔敢應承佢住, 因為我覺得我既時間仍有變化既機會, 唯有遲d再聯絡

8/9   (五)

今日會同阿權出去~當我差唔多出門口果陣, 有個似熟非熟既電話打黎...一聽原來係灣仔社署話果邊話唔夠人手, 話俾offer我~問我可唔可以接呢份工同埋最快可以幾時返工 (即係我21/8見果份)

我應對果陣仲好好笑, 同佢講話我星期五下晝接左兩個學生教琴...之後我已聽到佢既少少笑聲

咁佢俾時間我考慮下, 話最遲星期一reply佢~我媽果陣都聽到, 佢都叫我返工

阿權4點起旺角地鐵站交收, 我叫佢交收完打俾我睇下我起邊, 佢打黎果陣我已經食完麥記開心樂園餐仲換左隻tamama

咁我叫佢過黎皆旺麥記搵我, 因為我要同佢傾下有人請我返工既事

佢都贊成~咁我打返去社署啦, 坦白講我都幾想做呢份工架~佢問我下個禮拜中返工有冇問題, 我話冇

咁佢話同人事部傾下, 黎confirm我exactly係幾時返工, 冇耐佢打黎話係星期三返工, 不過要8:45返到公司, 成份工最大缺點就係呢度~我之後既所有平日都要6點幾要起身喇...不過返一至五都好啦, 下晝5點幾就收工啦

有得做都好啦~其實諗返起果日面試既表現, 而家呢份工又真係請左我, 我已經黯住半邊嘴笑緊

之後同阿權撘地鐵出尖咀, 去河內打機, 冇耐小咪打黎, 我同佢講份工請左我, 講埋我之前既面試表現, 佢都話我好好彩 XD

夜晚同阿權去左世華餐廳食飯, 果樹又有電視睇啦~可以睇埋「高朋滿座」同「鳳凰四重奏」

我地又叫左個二人餐, 係海南雞果d黎, 仲有冬瓜湯飲呀 ^_^

我地都放左三個月假, 皆大歡喜~因為咁啱阿權開始返學時我又有工返喇, 時間夾得啱啱好, 呵呵~

9/9    (六)

New Mario Bros全6種既NDS筆入手!! 阿權都有3支呀

10/9   (日)

下晝4點約左vivian起紅磡碼頭等, 陪佢去吉之島做「神秘顧客」呀~原來大家都有隻麥記tamama

佢都約左tony黎, 等埋佢上黎又齊齊扮顧客喇, vivian仲要左隻giroro三色公仔印呀

起黃埔吉之島做完佢既任務後, 去完美心MX填完資料交返去就撘車去將軍澳分店做啦

撘車途中同vivian玩NDSL既爽解右腦達人, 我就試下用支mushroom筆黎玩啦, 唔錯呀, 粗過支原廠筆少少, 仲好揸d添

到左坑口已經7點鬆d了, 於是vivian同tony分頭行事, 好快就做完~再起樓下填完資料諗住上返顧客服務部交, 點知個上頭去左食飯wor, 要等多半粒鐘呀...

咁我地起超市買左d野食呀, 維記糯米糍11蚊3盒呀, 我同vivian又share左隻炸雞脾黎食, 仲有齋老味呀

所以好快就過左半粒鐘, 交完野之後就去寶琳pizza hut食野~大家都好飽呀

之後tony同vivian去觀塘打機, 唔去喇, 呢排打機冇咩野玩~留返d $$遲下打DMV3

24/8   (四)

今日晏晝同阿權出旺角~去左間唔知叫第尾定係草尾牛扒既餐廳食晏

入面個阿伯好犀利~你叫野食佢即刻叫你講, 但個人同你隔成差唔多兩呎距離~轉頭就埋黎問返你...牛扒係咪跟飯...真係好鬼搞笑  但係成層餐廳都係佢一腳踢, 真係唔話得~同埋d野好快就黎, d野都唔錯呀 仲有我地一叫埋單佢就即刻話: 「71蚊丫...」又冇計錯數wor, 厲害~果然係老熟手!!

之後去聯合打一陣機, 阿權玩gf過左600喇

打完機就去麥記玩NDSL喇~我部機玩左冇耐就冇電lu~於是阿權又警惕我下次出黎要叉好電喇 XD

到6點同阿權去太子地鐵站交收, 佢都係草龍珠咭果d...之後去聯合行下~見到所謂東京站果d老翻軟硬tee, 好核突呀!! 佢地兩個既蝴蝶結變左藍色既...仲有d綠色老翻軟硬呀, 行埋一邊啦~簡直破壞市容呀!! 

要好似我同阿權果兩件至係路嘛

25/8   (五)

夜晚約左laurie同candy去旺角食飯, 出街落雨濕濕真係好煩...於是費事轉車就撘巴士喇, 估唔到落左車起先達撞到laurie wor, 真係有緣

但大家都遲左, 於是就行快兩步去新之城搵埋candy, 就去附近行口睇下有咩好食喇...最終決定去左炳記牛牛, 我都係第一次去果樹鋸扒...仲叫左d小食, 唔錯唔錯

之後行到西洋菜南街有街頭表演, 睇左一陣就行下新之城同旺中~途中嘉寶打黎問我9月6號得唔得閒同埋小咪同阿娟一齊去食日本野

行到10點幾...見laurie同candy冇地方去就返歸lu

27/8   (日)

今日約左cherry, eebi同tommy去創興食韓燒, 都成幾個月冇見佢地喇

eebi可以起大埔教院繼續升學, 不過聽日就要返學lu~但返學果樹離佢屋企都幾遠, 所以平時住hall, 真係好~羨慕

一入到漢陽苑冇耐就有成班類似自由行團隊既一班人入黎, 所以一早已經好嘈...

食完野就齊齊玩NDS喇...玩到差唔多3點半, 剩返我地幾個~要走啦

eebi要走先, 所以剩返我地三個行先達lu~去到先達果然見到d孖寶兄弟精品, 有M字帽既袋入NDS啦, 又有Luigi controller同孖寶閃燈匙扣, 仲有絕版既郵票簿, 好靚呀T_T  同時cherry見到買ps2既pop'n game送埋個袋, 可惜佢本身有果隻game就買唔到lu~我地兩個都見到自己鍾意既野, 唯有申吟幾句 XD

上去頂樓間game舖, 見到門口話有G6 lite出售, 心血來潮想買返盒~好想好想d game save到呀, 點知果個人d態度強差人意~

我: 「唔該G6淨係得簡體版咋? 有冇英文版呀?」

佢:  「冇呀。」

我問佢點解英文版冇返貨, 但佢就咁答: 「我地呢度冇架, 你唔想要簡體冇人叫你買架, 係咪?」

雖然佢係笑笑口咁, 但佢d態度...真係想xyz佢...今時今日咁既服務態度認真唔要得呀!!!

之後行皆旺, 有孖寶魔鬼同菇菇毛公仔呀, 遲d仲有孖寶既添呀, 好想要

跟住行信和, 上到三樓有間game舖又有G6 lite出售~果個後生仔好好禮貌, 叫我地隨便睇下, 我循例問下果個人~super key支唔支援到G6 lite, 點知佢話唔得wor, 又叫我買張passme 3~仲介紹d cheap d既玩ROM既配件 =.="

如果係咁, 就算果間野有英文版我都唔會買, 呢間野呃人的

落到地下間partner shop (PS) 見到G6 lite英文版, 都係559, 同繁簡版差唔多價錢, 經我問佢地幾句話後就決定買喇~但係去匯豐禁埋錢仲差30蚊,  於是問左tommy借30蚊, 於是今日我地三個都有買野喇

仲好多謝cherry同tommy陪我行左咁耐, 我買一樣野做決定有時真係唔簡單

28/8   (一)

今日同阿權起沙田表哥食完粉麵後就齊齊撘48X出荃灣喇, 第一站係去左熊貓機舖打機

見到阿叉~佢話我成年都冇去佢間機舖wor, 邊有咁耐呢? 哈哈~

玩左一陣就起隔黎pp cafe (休憩處) 玩NDS, 但係同唔到阿權link機玩呀...又係communication error作怪 =.="

唯有各自玩~阿權玩我張炸彈人卡帶, 而我就開始開齋用G6lite玩遊戲save

之後去左間茶餐廳食下午茶, 再坐多一陣就去荃豐同阿權拎返佢張手機記憶咭...之後諗住起附近間玩具店睇下有冇仕天堂紅白機既發聲figure~梗係冇哂貨啦~都預左架喇

經過舊漫畫店+賣二手CD既舖仔就入去睇下喇~我就買左盒$10既Jamiroquai CD  

差唔多行返出荃豐果陣, 見到樓上有間琴行, 於是心血來潮上去問下請唔請教琴, 果兩個女人都問左我幾多野, 之後叫我填個人資料, 仲叫我彈下琴俾佢聽添...都係果句, 有學生就會打黎問我接唔接

之後齊齊撘49X去到城隧轉車返歸喇

29/8   (二)

近幾星期見過我既朋友就會知, 我個下身比平時脹左, 簡單d黎講就好似水腫...

而且呢一兩個月一路都係咁撚既狀態, 我見到都好唔開胃呀, 食量又比以前少但容易比以前肥呀, 好唔開心

為免情形日益惡化, 唯有睇下中醫打下脈啦~今朝媽子耍先太極返黎就同佢落去食早餐, 食完就同我睇中醫啦~中醫話我個胃唔好, 影響到個腎, 有腎虧同濕熱, 於是暫時執住兩劑藥黎食...點解我搞成咁呢? 醫生話係我生活模式唔好, 食野唔定時, 又成日食凍野...好多年積積埋埋既...同埋我一向都唔算早訓, 我怕夜訓生暗瘡呀, 於是差唔多晚晚枕住飲夏枯草, 仲要雪到凍一凍黎飲~呢個可能係導火線喇!! 係呀!! 我同醫生講我早幾個月咁既情況, 佢話我係咁樣搞壞左個身體呀...唉...都唔知幾時先回復正常, 搞唔好以後點見人呀...

唔...飲過中藥, 塊面會有d黃, 所以夜晚去學琴果陣miss叫我調理返好個身體

31/8   (四)

今朝同阿權去沙田廣場間診所做免費骨質疏鬆測試~我地兩個都要趁呢幾年補充多d鈣鈣喇

佢阿妹呢幾日去左旅行, 所以檢查完就可以上佢屋企搞搞震

我地起街市買左兩個飯盒上去食, 一住食一住睇「青出於藍」

到三點就去花園城間診所做物理治療同心電圖檢查~我地呢兩樣野都冇出現咩問題既

行返去市中心~一齊起麥記玩下NDSL~阿權傍晚要去旺角交收呀, 由於我琴日食哂藥, 今日要早d返去覆診~所以唔陪佢出旺角lu

21/8    (一)

今朝10:50去灣仔見政府工 (社署: 合約辦公室支援助理) 填完application form就要進行打字測試, 合格先有得面試既~之前起勞工處睇佢既要求只不過係中文15 wpm同英文30 wpm, 要求好低架咋...

職員俾左兩篇野我打, 中英各計時兩分鐘, 當然都有得入去面試啦

入到去除左有少少應對, 仲要計數~因為份工要你處理數據嘛, 係一條有關人口百分率既數題~我計既方法冇錯, 但臨到最後一題計算總百分率果陣禁錯機呀...但為免人地覺得我計得太耐, 我就笑笑口咁同人講我話計好但唔知計得啱唔啱wor, 咁佢地叫我check多一次, 真係計錯數呀, 搞左好耐添...=.="

經過今次經驗我覺得下次見呢類工唔係問題

一落到去就係綠野仙踪~所以索性叫阿權去附近地鐵站等我...上去食飯有電視睇就順便睇「青出於藍」, 有時睇返重播真係返尋味   食飽飽就去駱克城打一陣機...之後就去會展喇

其實阿權對美食博覽麻麻地, 佢見我兩三年冇去先陪我~一入去二樓個場, 真係嚇死我地, 人又多之餘又冇野睇, 全部都係大陸, 意大利, 馬來西亞等等既攤位...原來我地入錯展覽廳, 香港果啲參展商起一樓呢...

咁我地落返去, 最好食既試食就係黃家沙既華美雞喇

今次買左百幾蚊野, 有$60既壽桃牌可粉+麵既大袋裝, 一排益力多+益力多模型, 一包大龍蝦片 (過幾日同阿權分黎食 ), 仲有迷你袋大班冰皮月餅兩個 (好耐都冇食大班既綠豆蓉喇 ^_^")

途中社署打黎, 話我個interview初步成功wor, 所以叫我去埋填返犯罪紀錄既form, 我見去完博覽都係4點幾, 所以就去埋喇

多謝阿權做我既筋肉人~大家都拎野拎到好攰, 於是我地起麥記搵位俾佢, 俾埋部NDSL佢, 咁我就過返去社署填form喇

填完form見到阿權玩炸彈人小遊戲 - 行山玩到35xx...傻的 ^_^"

大家都係第一次食麥記三點三, 食完同阿權過返九龍塘做交收, 之後就齊齊返歸喇

22/8    (二)

今日同阿權出沙田, 沙田廣場間診所有量血壓, 肺功能, 心電圖+物理治療, 仲有骨質疏鬆既免費測試, 於是我地約時間遲d做

之後去麥記食三點三同NDSL對戰, 得我同阿權兩條友玩炸彈場係唔夠過癮既, 所以加多兩個難度高既電腦, 一樣咁好玩!!

途中得知可以去返恆聲拎返張EZ Flash IV, 希望今次真係save到game啦

又得知聽日我將會教三個學生琴

我地玩到5點幾, 阿權起沙田火車站有交收, 之後佢就出旺角再同人交收喇

火車站附近有miffy信用咭promotion, 填完申請表格同俾埋住址證明同簿仔俾佢影印就有miffy 50週年茶具送, 好吸引呢~不過都係拎d資料返去睇下先做申請喇~話哂我咁大個人都未有一張信用咭嘛

之後我就去恆聲拎返張咭~見有時間就去snoopy王國入面坐起樹玩999推炸彈, 今次玩左成粒鐘, 差4粒就突破600...要再玩下先得喇, 我一路都知有個人望住我玩左幾個字~玩完之後佢就好好奇咁問我呢隻係咩game, 佢未見過...佢仲話唔知點解d人對打機可以咁著迷, 佢話同佢d fd打一粒鐘機已經頭暈wor, 傾傾下仲話想同我做朋友, 交換左電話, 傾下偈都得既...

我覺得佢個樣唔至於大到有老公, 同埋佢個樣都ok, 把聲都幾好聽

之後我都撘車返歸喇

P.S. 希望你冇事啦

23/8   (三)

小咪食完lunch打黎, 同佢傾左一陣我就去稼軒同阿媽飲茶食d野, 佢之後約左人起果樹飲茶嘛~我卮2:10就要行去富寶, 因為2:30有學生呀...2:30同3:30既學生都係新既, 3點果個係我教開果個~好乖仔的

原來原本今日2:30同3:30既學生係跟左某一個miss幾堂, 但呢個miss根本就冇責任感, 自己遲到不突只仲要夠鐘就放學生走, 唔會補時間俾佢既~潘小姐當然唔知呢件事啦, 係佢見個學生到2:40都未黎就打去佢屋企 (當然果個學生同家長都唔知今日轉左miss - 即係我), 先知呢個miss唔補時間既事, 一次係咁兩次係咁, 久而久之就唔敢黎喇...

做一個教琴既, 守時已經係基本野, 遲到都算啦, 咪補返時間俾人囉, 駛乜搞到咁...不過就係多得佢我先收多兩個學生,  哈哈哈哈   出到黎教琴, 真係咩人都有...

所以我教完3點個學生就走得~去沙田申請miffy信用咭呀 今日係deadline嘛

張咭約2-3星期寄黎, 申請先就即時拎走套miffy茶具, 之後嘉寶打黎, 原來個5C班gathering係今晚起旺角cafe舉行, 原來中五班大部分人之前已經知道呢個消息~早兩個禮拜都有同學打俾我地話14-23號會搞gathering, 咁既然講到做咩唔打俾我地講返時間地點呢? 根本就冇誠意...所以...雖然嘉寶想去但我同小咪都抱歉唔能夠同佢一齊去了, 同埋~4點幾5點先知呢個消息, 7點就去到旺角, 根本係太趕...同埋我果陣起班中只係一個兩角硬幣, 去唔去都唔至在啦

今朝好早起身, 因為要去機場見我老豆呀~話就話11點到, 點知12點幾先黎, 我同阿媽都食完野咯

老豆一黎都未坐低就話: 「夠鐘登機喇, 走喇」...=.="

跟住又有收獲, keke

之後同老豆走果陣, 一撘電梯差錯腳果下真係嚇親我同阿媽...落到離境大堂就同老豆道別

撘緊A43去沙田途中接到個電話, 有時d野唔係畫公仔畫出腸先明架, 識得我耐既, 熟既同埋我真係當佢地係好朋友果d就會知我平時點對朋友...同埋人既生活圈子係隨住年歲增長而擴闊, 唔怕老實講我仲有幾個差唔多三四個月都冇見既朋友, 由6月中考完試話約出黎到而家都未約見架!! 同埋我平時要學琴架, 日日都要練琴架嘛, 唔同你唔駛學琴呀, 冇你咁多時間呀!! 有時我約人出街夠有人推左我幾次先出得成啦, 又唔見我嬲...我推你幾次就嬲, 唔係呀嘛, 咁即係證明你小器, 同埋再一次證明我地絕對唔係深交既朋友!! (唔通我幾時再約邊個都冇得選擇?!) 仲有, 交朋友呢樣野係雙向既, 見我有異樣都應該明白發生咩事啦~我唔講係邊個喇, 理虧者請自行對號入座...

同阿媽到左沙田就請佢去滿記食糖水, 都好耐冇同阿媽出沙田喇~之後去西田買送就返歸喇

落左車上返馬鞍山廣場再一次撞到小咪, 連續撞左兩日啦

18/8   (五)

今日10:50要去耀安間安定院見活動幹事, 一起身屋企冇野食, 又費事煮, 於是著條連身裙好自卑咁落去大家樂食早餐

面試果陣有位院長同姑娘, 佢地問下我所知既老人院服務, 講下家庭, 仲問我有冇信心勝任...之後佢地比我詳細啲咁講呢份工實質做乜...都算係要你一腳踢既工作: 每星期返5日半, 但要輪班, 夜晚留宿候召~夜晚全場係得你一個, 院內萬一有咩事就係你話哂事, 威呢?! 仲有要定期檢查院內既設施, 有越就要打去有關部門跟進, 但月入有9k幾 (有得我做先算啦 =.=")

之後返屋企練左一陣琴, 就先去沙田恆星買左隻火牛, 原先隻火牛買左兩個月就燒左 =.="

再去大圍同阿權一齊出旺角, 好肚餓呀, 去左天天見面食10蚊魚蛋粉

之後起聯合打左一陣機, 玩fire in the dark計返sp, 有74%呀~加左1分

等阿權起地鐵站交收完就打俾芝家姐喇, 今日佢生日呀, 所以齊齊上新屋度同佢慶祝生日 XD

大家約左起朗豪坊等, 估唔到首先係起上落既長扶手電梯度...一對對咁碰到 (阿權+我: 上, 芝+ patrick: 落) 情景好似「天幕下的戀人」

匯合後大家行左一陣, 之後壽星女想飲野, 於是去Italian Tomato叫左個蛋糕餐同飲野, 等埋patrick個朋友jupiter就一齊上屋喇

黎到我同阿權同patrick就齊齊開NDS大戰喇, pp就7點幾拎埋個生日蛋糕上黎, 加埋佢4人戰就更好玩

今晚諗住叫pizza hut外賣, 等外賣果陣就連同芝家姐同jupiter啱啱6人玩波子棋

差唔多食完野爹爹上黎, 接替芝家姐既波子棋局, 玩完又再玩NDS, 場面熱鬧非常

後尾經芝家姐接手先知房入面個電話響, 係阿媽打黎話星期日朝早去機場見老豆...收左線先收到Kitty既未接來電, 我原本都約左佢聽日黎我度飲下午茶同游水, 咁打返俾佢約時間喇 之後再打返俾阿媽叫佢收拾下間屋...

可惜爹爹9點幾10點好快就走, 之後我地11點幾就走喇

自星期三到今日以黎, 今日既心情好好多喇 ^_^

19/8    (六)

今日點幾去海皇漁港等位飲茶, 等到點半Kitty仲未打黎wor, 點知打俾佢果陣先啱起身 =.="

唔緊要啦~難得今日唔駛返工係訓晏d, 可能我第日返工放假都係訓到好晏...

我同阿媽等到位就食左d野, 到Kitty到左就去總站接佢啦, 大家既情侶機終於第一次碰面喇 (Nokia 3250 x 2 )

佢都好耐冇見我阿媽喇, 仲俾我阿媽一點題就點中左佢既私人穴道添

飲完茶同Kitty行下新港城, 行到Levis果陣小咪打黎, 話見到我地起前面wor, 就入黎見我地一面喇, 好難得見到佢第一次著短裙, 又幾好睇wor衰鬼!!

之後Kitty上我屋企,  仲對「軟硬製造」好有興趣添, 於是我燒哂5隻俾佢返屋企慢慢睇 XD

估唔到佢都想玩下我部NDSL, 玩新炸彈人小遊戲都玩得幾過癮

夜晚媽媽煮烏冬俾我地食, 再抖一陣就去會所游水喇...我一遞張住客證過去, 過左期wor, 佢叫我盡快續會

入去換完衫先發覺自己唔記得帶毛巾 (唔係第一次啦 =.="), 就叫阿媽拎過黎俾我, 之後同Kitty落水喇, 咁啱大家都係著住新泳衣呀 (d新泳衣係買左兩年都未著過嘛, 哈哈) 一住游水一住傾左好多野, 你都唔駛咁擔心喇, 一切順其自然啦

之後梳洗後10:15出到黎, 個職員叫我地下次早d wor, 因為佢地10點收工...遲少少遮, 我一拎返張住客證果陣...發覺個角俾人剪左...殘忍過殘酷一丁呀

跟住Kitty再上返黎, 睇完拳霸同筋肉擂台就送佢去撘車lu

睇下我地幾時起weekend夾到時間我再上黎你屋企打舖下